៥យ៉ាង អ្នកគាំទ្រគួរដឹងពីភរិយាស្រស់ស្អាតរបស់ Jay Chou

2015-01-20 17:11:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ តារាចម្រៀង និងសម្ដែងតៃវ៉ាន់ Jay Chou បានបញ្ចប់ភាពកំលោះរបស់ខ្លួន ដោយសម្រេចចិត្តរៀបការជាមួយភរិយាវ័យក្មេងជាងខ្លួន១៥ឆ្នាំ គឺតារាម៉ូដែល Hannah Quinlivan បន្ទាប់ពីមើលចិត្តគ្នា ៤ឆ្នាំ។ តើ Quinlivan ជានរណា? តើនាងមានអ្វីដែលអាចចងចិត្ត កំពូលតារាតៃវ៉ាន់ម្នាក់នេះបាន ក្រៅពីរូបសម្រស់?

អ្នកគាំទ្រ Jay Chou ភាគច្រើនប្រហែលជាចង់ដឹងអំពីចម្លើយទាំងនេះ។ ដូច្នេះកុំឲ្យសង្ស័យយូរ មកមើលការពិតពិសេសៗទាំង ៥យ៉ាងពាក់ព័ន្ធនឹង ភរិយារបស់ Jay Chou ខាងក្រោមនេះទាំងអស់គ្នា៖

១. តារាម៉ូដែលវ័យ ២១ឆ្នាំ ដែលមានឈ្មោះចិនថា Wu Yi-chen បានកើតនៅកោះតៃវ៉ាន់ នៅថ្ងៃទី១២ ខែសីហា ឆ្នាំ១៩៩៣ ដោយមានឪពុកជាជនជាតិអូស្ត្រាលី និងម្ដាយជាកូនកាត់កូរ៉េ - តៃវ៉ាន់។ នាងមានបងស្រីម្នាក់។ បន្ទាប់ពីបញ្ចប់ការសិក្សាថ្នាក់វិទ្យាល័យ នាងបានចូលរៀននៅសាកលវិទ្យាល័យឯកជន Toki នៅតៃវ៉ាន់ ប៉ុន្តែបានឈប់វិញ ដោយសារតែរវល់ការងារច្រើនពេក។

២. នាងបានបង្ហាញមុខតាមទូរទស្សន៍នៅឆ្នាំ២០០៨ គឺតាំងពីអាយុ ១៤ឆ្នាំ ក្នុងកម្មវិធី Guess របស់លោក Jacky Wu។ បន្ទាប់ពីចូលជាសមាជិកកម្មវិធី "Balckie Chen” Quinlivan ក៏បានក្លាយជាតារាម៉ូដែល។ ប៉ុន្តែនាងមិនសូវទទួលបានការចាប់អារម្មណ៍ពីមហាជនឡើយ រហូតដល់ខែសីហា ឆ្នាំ២០១១ នៅពេលដែលលេចរូបថតរបស់នាងជាមួយ Jay Chou។ ចាប់ពីពេលនោះមក នាងក៏ក្លាយជាគោលដៅរបស់អ្នកសារព័ត៌មាន។

៣. តារាម៉ូដែលកម្ពស់ ១,៦៥ម៉ែត្ររូបនេះ ចាប់ផ្ដើមមានគេទាក់ទងឲ្យចូលថតរឿងភាគ នៅឆ្នាំ២០១២ រួមមានរឿង "Ti Amo Chocolate” និង "The Patisserie With No Name” នៅឆ្នាំ២០១៣។

៤. តាំងពីក្លាយជាសង្សាររបស់ Jay Chou តម្លៃខ្លួនថតពាណិជ្ជកម្មរបស់ Quinlivan បានកើនឡើងគួរឲ្យកត់សម្គាល់។ នាងបានក្លាយជាតារាម៉ូដែល តំណាងក្រុមហ៊ុនផ្សារទំនើប Breeze Center របស់តៃប៉ិ តាំងពីឆ្នាំ២០១០ ហើយឥលូវនេះនាងទាមទារតម្លៃខ្លួនក្នុងការថតពាណិជ្ជកម្មរហូតដល់ ៣ម៉ឺនដុល្លារ ក្នុងមួយឈុត។ សារព័ត៌មាន Apple Daily បានចុះផ្សាយថានាងអាចរកចំណូលបានជាង ២៥ម៉ឺនដុល្លារ កាលពីឆ្នាំមុន។

៥. តើនាងអាចឆក់យកបេះដូងរបស់ Jay Chou បានដោយរបៀបណា ខណៈដែលអតីតសង្សាររបស់តារារូបនេះ ដូចជាតារាល្បីៗ Jolin Tsai និង Patty Hou សុទ្ធតែបរាជ័យ? ប្រភពព័ត៌មានមួយចំនួនបានឲ្យដឹងថា ចរិតរម្យទមរបស់នាង គឺជាចំណុចដែលធ្វើឲ្យម្ដាយរបស់ Jay Chou ពេញចិត្តនាងបំផុត។ នាងគឺជាមនុស្សស្លូតបូតសុភាពរាបសារ និងមិនសូវនិយាយអ្វីច្រើនឡើយនៅពេលបង្ហាញខ្លួនក្នុងកម្មវិធីផ្សេងៗ។ ដោយ Chou ជាកូនប្រុសដែលតែងគោរពតាមសម្ដីរបស់ម្ដាយ ចំណុចនេះបានធ្វើឲ្យនាងមានប្រៀបជាងមិត្តស្រីមុនៗ និងធ្វើឲ្យចំណងស្នេហ៍របស់អ្នកទាំងពីរកាន់តែរឹងមាំ ៕