អាជ្ញាកណ្ដាល ១៨នាក់ត្រៀមដឹកនាំវគ្គជម្រុះតាមពូលពាន Hun Sen Cup 2015

2015-01-21 00:12:23
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាបាល់ទាត់កម្ពុជា ត្រៀមអាជ្ញាកណ្ដាលចំនួន ១៨ នាក់ ដើម្បីដឹកនាំការប្រកួតក្នុងវគ្គជម្រុះតាមពូល នៃពានរង្វាន់លំដាប់ថ្នាក់ទី២ នៅកម្ពុជា Hun Sen Cup 2015 ដែលនឹងមកដល់ចាប់ពីថ្ងៃស្អែកតទៅ នៅទីលានបាល់ទាត់មជ្ឈមណ្ឌល និង សាលាបាល់ទាត់ជាតិបាទី។

សម្ភារៈរបស់អាជ្ញាកណ្ដាល

យោងតាមលោក ទុយ វិច្ឆការ តំណាងអាជ្ញាកណ្ដាលកម្ពុជាបានប្រាប់ Sabay ថា ក្នុងចំណោមអ្នកទាំង ១៨ រូបក្នុងនោះមានអាជ្ញាកណ្ដាលចំនួន ៩ រូប និង ជំនួយការអាជ្ញាកណ្ដាល ៩ រូប ហើយភាគច្រើននៃអ្នកទាំងអស់ជាសមាជិកអាជ្ញាកណ្ដាលបាល់ទាត់កម្រិត FIFA ប្រចាំកម្ពុជាផងដែរ។

អាជ្ញាកណ្ដាលទាំងអស់នឹងដឹកនាំការប្រកួតទាំង ៤ ពូលដែលមានក្រុមចំនួន ១៦ ចុងក្រោយ ហើយសរុបទាំងអស់មាន ២៤ ប្រកួតដោយគិតតែវគ្គជម្រុះតាមពូល។ អាជ្ញាកណ្ដាលដែលបង្ហាញសមត្ថភាពរបស់ខ្លួនល្អនឹងត្រូវមានឱកាសទៅកាត់សេចក្ដីនៅវគ្គបន្ទាប់ទៀតដែលគ្រោងរៀបចំនៅកីឡដ្ឋានខេត្តស្វាយរៀង។

កាលពីវគ្គជម្រុះតាមមណ្ឌល ក្នុងពានរង្វាន់នេះ សហព័ន្ធកីឡាបាល់ទាត់កម្ពុជាបានរៀបចំ អាជ្ញាកណ្ដាលចំនួន ៣៥ នាក់បញ្ជូនទៅកាន់មណ្ឌលចំនួន ៤ ដើម្បីដឹកនាំការប្រកួតចាប់ពីថ្ងៃទី ៨ ដល់ ១២ ខែ មករា ឆ្នាំ ២០១៥ កន្លងទៅ។សហព័ន្ធត្រៀមទឹកប្រាក់ចំនួន ៣ លានរៀលដល់អាជ្ញាកណ្ដាលដែលកាត់សេចក្ដីការប្រកួតវគ្គផ្ដាច់ព្រ័ត្រនៅឆ្នាំនេះ៕

អត្ថបទពាក់ព័ន្ធ៖ ជនជាតិខ្មែរ ៩ រូបជាប់ឈ្មោះក្នុងបញ្ជីអាជ្ញាកណ្ដាលលំដាប់ FIFA ឆ្នាំ ២០១៥

អត្ថបទ៖ ម៉ឺន រស្មី