ថ្នាំផ្ដាសាយ និងថ្នាំងងុយគេង អាចបង្កើនការភ្លេចភ្លាំងនិងវង្វេងស្មារតី

2015-01-28 18:11:06
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកវិទ្យាសាស្ត្របានស្រាវជ្រាវរកឃើញថា ថ្នាំដែលប្រើសម្រាប់ទប់ស្កាត់ជំងឺផ្ដាសាយ និងថ្នាំងងុយគេង អាចបង្កើនហានិភ័យចំពោះការឆាប់ភ្លេចភ្លាំង និងអាចឈានទៅដល់ការវង្វេងស្មារតី។ នេះបើតាមការចុះផ្សាយរបស់គេហទំព័រ The Mirror កាលពីថ្ងៃអង្គារកន្លងទៅ។

អ្នកជំនាញបានធ្វើការសិក្សាទៅលើមនុស្ស ៣៤៣៤នាក់ ដែលមានអាយុចាប់ពី ៦៥ឆ្នាំឡើង និងប្រើប្រាស់ថ្នាំបន្ថយអាការៈផ្ដាសាយហៀរសំបោរ (antihistamine) ព្រមទាំងថ្នាំទប់ស្កាត់កណ្ដាស់ (diphenhydramine) រយៈពេល ៧ឆ្នាំ។ ក្នុងចំណោមនោះ ៦៣៧នាក់ ជួបប្រទះជំងឺឆាប់ភ្លេចភ្លាំង និង ១៦០នាក់ទៀតកំពុងស្ថិតក្នុងស្ថានភាពវង្វេងវង្វាន់ស្មារតី។

សម្រាប់អ្នកប្រើប្រាស់ថ្នាំប្រភេទនេះច្រើន នឹងបង្កើនហានិភ័យឈានទៅរកភាពឆាប់ភ្លេចភ្លាំងរហូតដល់ទៅ ៥៤ភាគរយ លើសអ្នកមិនប្រើប្រាស់។ ការរកឃើញដែលចុះផ្សាយនៅក្នុងព្រឹត្តិបត្រសារព័ត៌មាន Jama Internal Medicine បានបង្ហាញថា អ្នកនឹងមានហានិភ័យខ្ពស់ ប្រសិនបើប្រើប្រាស់ថ្នាំប្រភេទ antidepressant doxepin យ៉ាងតិច ១០មិល្លីក្រាមក្នុងមួយថ្ងៃ ថ្នាំបន្ថយអាការៈផ្ដាសាយហៀរសំបោរ (antihistamine) ៤មិល្លីក្រាមក្នុងមួយថ្ងៃ ឬថ្នាំប្រភេទ oxybutynin ៥មិល្លីក្រាមក្នុងមួយថ្ងៃ លើសពី ៣ឆ្នាំឡើងទៅ។

វេជ្ជបណ្ឌិត Simon Ridley ឯកទេសផ្នែកស្រាវជ្រាវជំងឺភ្លេចភ្លាំងនៅចក្រភពអង់គ្លេស បាននិយាយថា "ការសិក្សាដ៏ធំ ដើម្បីបន្ថែមទម្ងន់ទៅលើតឹកតាងចាស់ៗ ដែលបង្ហាញពីផលប៉ះពាល់នៃការប្រើប្រាស់ថ្នាំមួយចំនួន នាំឲ្យមានការកើនឡើងហានិភ័យតិចតួចនៃជំងឺភ្លេចភ្លាំង... ប៉ុន្តែលទ្ធផលមិនបង្ហាញប្រាប់យើងថា ថ្នាំទាំងអស់នេះអាចបង្កើតជាជំងឺភ្លេចភ្លាំងទេ"។

ចុចអាន៖ អាថ៌កំបាំង៨យ៉ាង ទប់ស្កាត់ជំងឺគ្រុនផ្ដាសាយ

ប្រែសម្រួល៖ គង់ វិសាល ប្រភព៖ mirror