ស្ដាប់ចម្លើយគួរឲ្យសង្ស័យរបស់ Jessica ពេលគេសួរពីសង្សារលួចលាក់

2015-01-29 19:19:36
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី២៨ ខែមករា អតីតសមាជិកក្រុម Girls' Generation Jessica បានផ្ដល់បទសម្ភាសន៍មួយ នៅពេលចូលរួមកម្មវិធី “Yves Saint Laurent Beauté Hong Kong x Google Glass Event at Lane Crawford” អំពីទស្សនកិច្ចរបស់នាងនៅទីក្រុងហុងកុង។ ក្នុងសម្ភាសន៍នោះ អ្នកសារព័ត៌មាន លើកសំណួរអំពីការណាត់ជួបរបស់នាងជាមួយអតីតមិត្តរួមក្រុម Yuri និងសំណួរមួយទៀតពាក់ព័ន្ធនឹង Tyler Kwon ដែលគេសង្ស័យថាជាសង្សាររបស់នាង។

នៅមុខអ្នកសារព័ត៌មានជាច្រើននាក់ តារាវ័យ ២៥ឆ្នាំរូបនេះ បានរៀបរាប់ពីអារម្មណ៍រីករាយរបស់នាងពេលមកដល់ទីក្រុងហុងកុង ហើយនៅពេលនោះអ្នកកាសែតសួរ ថាតើនាងមានដឹងថា Yuri មកដល់ហុងកុង ដើម្បីចូលរួមកម្មវិធី "iiJin Fall/Winter 2015 Fashion Show” ដែរ ឬអត់។ Jessica ឆ្លើយតបថា នាងមិនបានដឹងរឿងនេះទេ ហើយក៏គ្មានគម្រោងជួប Yuri ដែរ។

ក្រោយមកអ្នកកាសែតបានប្ដូរសំណួរថ្មី អំពីតារាហុងកុងរូបណាដែលនាងចង់សម្ដែងជាមួយ។ Jessica ប្រាប់ថាតារាសម្ដែង Nicholas Tse និងនាងជាមិត្តល្អ ដូច្នេះនាងរីករាយជានិច្ចបើសិនជាបានសម្ដែងជាមួយគេ សូម្បីតែឈុតស្នេហាក៏ដោយ។

ពេលនោះអ្នកកាសែតម្នាក់បានសួរថា "អ៊ីចឹង មិត្តប្រុស (សំដៅលើ Tyler Kwon) របស់កញ្ញាមិនប្រចណ្ឌទេ?"។ ប៉ុន្តែ Jessica បានបង្វែរប្រធានបទភ្លាមៗដោយឆ្លើយថា "ប្រហែលជាអ្នកទេ ដែលជាអ្នកប្រចណ្ឌ" ធ្វើឲ្យគ្រប់គ្នាស្រឡាំងកាំង តែក៏ផ្ទុះសំណើចដោយសារចម្លើយរបស់នាងដែរ។

ទស្សនាវីដេអូសម្ភាសន៍ខាងក្រោមនេះ៖

បន្ទាប់ពីដកខ្លួនពីក្រុម Girls' Generation កាលពីខែកញ្ញា ឆ្នាំ២០១៤ Jessica បានផ្ដោតសំខាន់លើការងារផ្សព្វផ្សាយក្រុមហ៊ុន Fashion របស់ខ្លួនដែលមានយីហោ BLANC & ECLARE រួមទាំងសកម្មភាពសិល្បៈផ្សេងៗទៀតនៅប្រទេសចិន និងហុងកុង។ ពាក្យចចាមអារ៉ាមផ្សេងៗទៀតនិយាយថា នាងកំពុងសម្ងំរស់នៅជាមួយមិត្តប្រុស Tyler Kwon ដោយលួចលាក់នៅទីក្រុងហុងកុង ប៉ុន្តែ Jessica បានបដិសេធចំពោះរឿងនេះ៕