ទីបំផុតម៉ាឡេស៊ីអះអាងថា MH370 ជួបឧប្បត្តិហេតុ ឯជនរងគ្រោះស្លាប់ទាំងអស់

2015-01-30 15:34:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុត ក្ដីសង្ឃឹម និងការទន្ទឹងរង់ចាំរបស់ក្រុមគ្រួសារជនរងគ្រោះលើជើងហោះហើរ MH370 បានរលាយសូន្យឈឹងទាំងមិនជ្រះស្រលះក្នុងចិត្ត បន្ទាប់ពីមន្ត្រីរដ្ឋាភិបាលម៉ាឡេស៊ីធ្វើការអះអាងជាផ្លូវការកាលពីថ្ងៃព្រហស្បតិ៍ម្សិលមិញថា យន្តហោះដែលដឹកមនុស្សសរុប ២៣៩នាក់នោះ បានជួបឧប្បត្តិហេតុ។ ចំណែកឯជនរងគ្រោះស្លាប់ទាំងអស់ ដោយគ្មាននរណាម្នាក់នៅរស់រានមានជីវិតឡើយ។ នេះបើតាមការចុះផ្សាយពីគេហទំព័រសារព័ត៌មាន BBC របស់អង់គ្លេស កាលពីយប់មិញនេះ។

ការប្រកាសពីគ្រោះថ្នាក់ ធ្វើឡើងមុនពេលរកឃើញតួយន្តហោះទៅទៀត ខណៈប្រតិបត្តិការរុករកនៅតែបន្តធ្វើឥតស្រាកស្រាន្ត។ គិតមកដល់ត្រឹមពេលនេះ ក្រុមអ្នកស្រាវជ្រាវពុំទាន់រកឃើញដានណាមួយ ទាក់ទងនឹងយន្តហោះដឹកអ្នកដំណើរឆ្ពោះទៅរដ្ឋធានីប៉េកាំងនេះទេ ចាប់តាំងពីបាត់ខ្លួនកាលពីថ្ងៃទី០៨ ខែមិនា ដើមឆ្នាំ២០១៤ មក។ មន្ត្រីម៉ាឡេស៊ី បានបញ្ជាក់ថាប្រតិបត្តិការរុករក នៅតែបន្តធ្វើរហូត ប៉ុន្តែមនុស្សទាំង ២៣៩នាក់នៅលើយន្តហោះ ពេលនេះសន្មតថាបាត់បង់ជីវិតអស់ហើយ។

ទីតាំងរបស់យន្តហោះ នៅតែពុំអាចប្រមាញ់បាន បើទោះបីជាមានប្រតិបត្តិការរុករកដ៏ធំជាលក្ខណៈអន្តរជាតិនៅសមុទ្រឥណ្ឌាភាគខាងត្បូងក៏ដោយ។ ការអះអាងកាលពីថ្ងៃព្រហស្បតិ៍ម្សិលមិញនេះ នឹងបើកផ្លូវឲ្យមានការផ្ដល់សំណងជាផ្លូវការទៅគ្រួសារជនរងគ្រោះ។ យ៉ាងណាក្តី មន្ត្រីម៉ាឡេស៊ីបាននិយាយថាការរុករកយន្តហោះដែលបាត់ខ្លួន នៅតែជារឿងអាទិភាព និងបន្តទៅមុខដោយភាពជឿជាក់។

ប្រធាននាយកដ្ឋានអាកាសចរណ៍ស៊ីវិលម៉ាឡេស៊ី (DCA) លោក Azharuddin Abdul Rahman បាននិយាយថា ”ដោយភាពក្ដុកក្ដួលចេញពីបេះដូង និងទុកព្រួយដ៏ជ្រាលជ្រៅបំផុត យើងសូមអះអាងជាផ្លូវការថា ជើងហោះហើររបស់ក្រុមហ៊ុនអាកាសចរណ៍ម៉ាឡេស៊ី MH370 បានជួបឧប្បត្តិហេតុ"។ លោកបានបន្តទៀតថា "ជនរងគ្រោះ និងក្រុមការងារទាំង ២៣៩នាក់ នៅលើនោះ សន្មតថាបាត់បង់ជីវិតអស់ហើយ"។

រំលឹកឡើងវិញ ជើងហោះហើរ MH370 ធ្វើការហោះហើរពីរដ្ឋធានីកូឡាឡាំពួរប្រទេសម៉ាឡេស៊ី ទៅរដ្ឋធានីប៉េកាំង ប្រទេសចិន បានបាត់ខ្លួនយ៉ាងអាថ៌កំបាំងកាលពីថ្ងៃទី០៨ ខែមីនា ឆ្នាំ២០១៤ កន្លងទៅ។ ទាំងលើផ្ទៃទឹករាប់ម៉ឺនគីឡូម៉ែត្រក្រឡា ទាំងបាតសមុទ្រក្នុងរង្វង់ជាង ៩០០០គីឡូម៉ែត្រក្រឡានៃមហាសមុទ្រឥណ្ឌា ត្រូវរុករកសព្វអស់ហើយ ដោយប្រើទាំងឧបករណ៍ទំនើបៗផង ប៉ុន្តែមិនទទួលបានដានសូម្បីបន្តិច៕

ចុចអានព័ត៌មានជាច្រើនទៀតទាក់ទងនឹងគ្រោះថ្នាក់ MH370

ប្រែសម្រួល៖ គង់ វិសាល ប្រភព៖ BBC