ហ្វេសបុកគំរាមប្ដឹងភោជនីយដ្ឋានមួយនៅវៀតណាម
- 2014-10-04 16:09:10
- ចំនួនមតិ 0 | ចំនួនចែករំលែក 0
ហ្វេសបុកគំរាមប្ដឹងភោជនីយដ្ឋានមួយនៅវៀតណាម
ចន្លោះមិនឃើញ
ថ្មីៗនេះ ហ្វេសបុកបានគំរាមប្ដឹងភោជនីយដ្ឋានមួយនៅវៀតណាម ដោយសារធ្វើអាជីវកម្មទាញផលចំណេញពីឈ្មោះក្រុមហ៊ុនទំនាក់ទំនងសង្គមដ៏ធំមួយនេះ។
លោកស្រី Nang Ganh ដែលជាម្ចាស់ភោជនីយដ្ឋាន Nang Ganh បានចាប់ផ្ដើមដំណើរការជំនួញតូចមួយ ដោយការកុម្ម៉ង់អាហារតាមហ្វេសបុក។ ដោយសារការបញ្ជាទិញអាហារតាមហ្វេសបុកមានការកើនឡើងជាលំដាប់ ម្ចាស់ភោជនីយដ្ឋាននេះមានបំណងបើកទៅជាកន្លែងរកស៊ីជាក់លាក់មួយ ហើយបន្ទាប់មកនាងបានបញ្ចេញគំនិតនោះតាមហ្វេសបុក និងស្នើសុំការជួយឧបត្ថម្ភពីមិត្តភ័ក្ដិ។
ក្រោយមកគំនិតរបស់នាងបានទទួលការចាប់អារម្មណ៍ពីអ្នកវិនិយោគជាច្រើន និងប្រមូលដើមទុនបានប្រហែល ៣ ម៉ឺនដុល្លារ បង្កើតជាភោជនីយដ្ឋានមួយដែលមានពាក្យស្លោកថា "ភោជនីយដ្ឋានទីមួយដែលកើតចេញពីហ្វេសបុក"។
ពេលនេះ ក្រុមហ៊ុនហ្វេសបុកបានគំរាមប្ដឹង Nang Ganh ប្រសិនបើនាងមិនព្រមដកពាក្យហ្វេសបុកចេញពីពាក្យស្លោកទេនោះ។ ក្រុមហ៊ុនយក្សដែលមានអ្នកប្រើប្រាស់បណ្ដាញសង្គមរបស់ខ្លួនជាង១ពាន់លាននាក់ បានផ្ញើលិខិតផ្លូវការមួយទៅ Nang Ganh ដោយបញ្ជាក់ថា ពាក្យស្លោកនេះនាំឲ្យគេយល់ច្រឡំថាភោជនីយដ្ឋានបើកដំណើរការ និងគាំទ្រដោយក្រុមហ៊ុនហ្វេសបុក។
ទោះយ៉ាងណា ម្ចាស់ភោជនីយដ្ឋានបាននិយាយថា នាងមិនដែលមានបំណងចង់ទាញយកផលចំណេញពីហ្វេសបុកទេ ហើយនាងសង្ឃឹមថានឹងមានកិច្ចព្រមព្រៀងជាមួយក្រុមហ៊ុនដ៏ធំនេះ ព្រោះបើប្ដូរពាក្យស្លោកភោជនីយដ្ឋាន ត្រូវចំណាយប្រាក់ប្រហែល ១ ម៉ឺនដុល្លារឯណោះ៕
-អានអត្ថបទ "ប៉ូលិសយកមងស្ទាក់ចាប់ក្មេងប្រណាំងម៉ូតូតាមផ្លូវ"
ប្រែសម្រួល៖ គង់ វិសាល
ប្រភព៖ news.asiantown