Lee Minho បដិសេធចូលសម្ដែងរឿងថ្មីជាមួយ Brad Pitt និង Fan Bingbing

2015-02-04 18:37:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ អ្នកតំណាងផលិតកម្មរបស់តារាសម្ដែងកូរ៉េខាងត្បូង Lee Min Ho បានបញ្ជាក់ថាតារារូបនេះ នឹងមិនសម្ដែងភាពយន្ត "Raid” ដែលមានវត្តមានរបស់តារាសម្ដែងអាមេរិក Brad Pitt និងតារាសម្ដែងចិន Fan Bingbing ឡើយ។

ប្រភពព័ត៌មានចិនមួយបានបង្ហាញថា ខ្សែភាពយន្ត "Raid” នឹងត្រូវផលិតឡើងដើម្បីរំឭកខួបលើកទី៧០នៃសង្គ្រាមលោកលើកទី២ ដោយភាពយន្តនេះរៀបរាប់ពីកងទ័ពចិន និងទ័ពអាកាសអាមេរិក អំឡុងពេលសង្គ្រាមនោះ។ ក្រុមផលិតករផលិតភាពយន្តនេះបានបញ្ជាក់ថា ផលិតកម្មត្រៀមចំណាយដើមទុនចំនួន ១០០លានដុល្លារ សម្រាប់ភាពយន្តមួយនេះ ហើយតារាសម្ដែងដែលអាចនឹងមានវត្តមានក្នុងភាពយន្តនេះមានដូចជា តារាសម្ដែងអាមេរិក Brad Pitt តារាសម្ដែងកូរ៉េ Lee Min Ho និងតារាសម្ដែងចិន Fan Bingbing និង Zhang Hanwei។

ទោះជាយ៉ាងណា បន្ទាប់ពីទទួលបានរបាយការណ៍មួយនេះ ផលិតកម្មរបស់ Lee Min Ho បានបដិសេធ ដោយនិយាយថា "ពួកយើងពិតជាទទួលបានសំណើ ឲ្យ Lee Min Ho ចូលសម្ដែងខ្សែភាពយន្តនេះពិតមែន ហើយក៏បានពិនិត្យមើលសាច់រឿងហើយដែរ ប៉ុន្តែពួកយើងបដិសេធ។ ពួកយើងទទួលបានសំណើជាច្រើនទៀតដែរពីប្រទេសចិន ប៉ុន្តែមិនទាន់សម្រេចចិត្តនៅឡើយ ដោយបច្ចុប្បន្ន Lee Min Ho ចង់ចូលសម្ដែងរឿងភាគ និងភាពយន្តតាមទូរទស្សន៍ច្រើនជាង"។

ថ្មីៗនេះដែរ ភាពយន្តខ្នាតធំដំបូងរបស់តារាវ័យ ២៧ឆ្នាំ Lee Min Ho បានចាប់ផ្ដើមបញ្ចាំងនៅប្រទេសកូរ៉េខាងត្បូងកាលពីថ្ងៃទី២១ ខែមករា និងបានក្លាយជាភាពយន្តលេខមួយនៅកូរ៉េ ដោយអាចរកចំណូលបាន ៧,៥៧លានដុល្លារ ក្នុងរយៈពេល ៥ថ្ងៃដំបូង ៕

ចុចអាន៖ចង់មើលមុខ Lee Min Ho មិនទាន់កែអត់?

ប្រែសម្រួល៖ វ៉ាន់ថន ប្រភព៖ soompi