ប្រព័ន្ធបច្ចេកវិទ្យាកំពុងដើរតួនាទីសំខាន់ ក្នុងការទប់ស្កាត់អំពើហិង្សាលើស្ត្រី

2015-02-07 01:15:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ការវិវឌ្ឍន៍ខ្លាំងនៃប្រព័ន្ធបច្ចេកវិទ្យា ក្នុងរយៈពេលប៉ុន្មានឆ្នាំចុងក្រោយនេះ កំពុងចូលរួមចំណែកយ៉ាងខ្លាំងក្លា ទប់ស្កាត់អំពើហិង្សាលើស្ត្រី និងកុមារ។ ប្រព័ន្ធបច្ចេកវិទ្យាទាំងនោះមានទូរសព្ទចល័តទាន់ហេតុការណ៍(Hot Line) បណ្ដាញសង្គម Facebook Twitter Line និង blog ជាដើម។ ថ្លែងក្នុងសិក្ខាសាលាស្តីពីការបញ្ឈប់អំពើហិង្សាលើស្ត្រីនៅកម្ពុជា តាមរយៈការបង្កើតថ្មី នៃបច្ចេកវិទ្យាទូរសព្ទចល័តនៅមជ្ឈមណ្ឌលសហប្រតិបត្តិការកម្ពុជា-ជប៉ុន កាលពីព្រឹកមិញ លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានថ្លែងថា គុណសម្បត្តិនៃការផ្សព្វផ្សាយព័ត៌មានតាមប្រព័ន្ធបច្ចេកវិទ្យាមានលក្ខណៈទូលំទូលាយ ឆាប់រហ័ស ពិសេសអាចឲ្យជនរងគ្រោះស្វែងរកការអន្តរាគមន៍ពីសមត្ថកិច្ចទាន់ពេលវេលា។ ប៉ុន្តែយ៉ាងណាមិញការប្រើប្រាស់ប្រព័ន្ធបច្ចេកវិទ្យានេះក៏នាំមកផលអវិជ្ជមានផងដែរ តួយ៉ាងអ្នកប្រើប្រាស់បណ្ដាញសង្គមមួយចំនួន បានចែកចាយរូបភាពមិនសមរម្យ ធ្វើឲ្យប៉ះពាល់ដល់សិទ្ធិស្រ្តី។

https://www.youtube.com/watch?v=N451qh5kJao

លោកជំទាវ បន្ថែមថា ប្រព័ន្ធអ៊ីនធឺណិតបានផ្តល់ឱកាសឲ្យស្ត្រីបានដឹងពីព័ត៌មាន ចំណេះដឹង និងការបទពិសោធន៍ គំនិតច្នៃប្រឌិត ការផ្តល់នូវភាពអង់អាចដល់ស្ត្រីវ័យក្មេង ជាពិសេសជួយផ្លាស់ប្តូរអាកប្បកិរិយាអវិជ្ជមានរបស់ស្ត្រីកម្ពុជា។

អ្នកនាង ប៊ុន រចនា ម្ចាស់ជយលាភីមួយរូប ដែលសកម្ម ក្នុងការប្រើប្រាស់បណ្ដាញសង្គម និង blog ចែកចាយព័ត៌មាន និងខ្លឹមសារ ទប់ស្កាត់ការប្រើប្រាស់អំពើហិង្សាលើស្រ្តីមានអារម្មណ៍រីករាយជាខ្លាំង ដែលវេទិកានេះបានលើកយកបញ្ហារបស់ស្រ្តីមកពិភាក្សា ជាពិសេសការជម្រុញឲ្យមានការប្រើប្រាស់ជាវិជ្ជមានលើកកម្ពស់សិទ្ធិស្ត្រី។

ទន្ទឹមគ្នាដែរ កញ្ញា ស៊ុំ ដានី ម្ចាស់ជយលាភីម្នាក់ផេ្សងទៀតបានរៀបរាប់ថា ខ្លួននឹងនៅតែបន្ត ចែករំលែកព័ត៌មានទប់ស្កាត់ការប្រើប្រាស់អំពើហិង្សាលើស្ត្រី និងកុមារ ហើយតទៅសង្ឃឹមថា យុវជនទាំងអស់គ្នានឹងចូលផ្សព្វផ្សាយបន្តកាន់តែច្រើនឡើង ពិសេសដល់បងប្អូននៅតាមទីជនបទបានដឹង។

តំណាងសមាគមន៍ស្ត្រីផ្សព្វផ្សាយស្រាបៀរ និងជាម្ចាស់ជយលាភីមួយរូបទៀតដែរនោះ អ្នកនាង ស្រី ទូច ក៏បានលើកឡើងថា សកម្មភាពកន្លងមករបស់អ្នកស្រី ក្រៅពីប្រមូលផ្តុំស្រ្តីផ្សព្វផ្សាយស្រាបៀរមកចូលរួមសិក្ខាសាលា និងការចុះអប់រំផ្ទាល់ សមាគមន៍ក៏មានប្រព័ន្ធទូរសព្ទទាន់ហេតុការណ៍ ដើម្បីឲ្យស្ត្រីអាចប្តឹង និងឈានទៅរកអន្តរាគមន៍បានទាន់ពេល ចំពោះជនណា ដែលបានធ្វើសកម្មភាពមិនគប្បីលើស្ត្រីផ្សព្វផ្សាយស្រាបៀរ។ អ្នកនាង បានចាត់ទុកនេះគឺជាការវិវឌ្ឍន៍ថ្មីទៀត ដែលបានរួមចំណែកផ្តល់ភាពងាយស្រួល ក៏ដូចលើកកម្ពស់សិទ្ធិស្ត្រីផងដែរ។ អ្នកនាងថា តទៅសមាគមន៍នឹងប្រើប្រាស់មធ្យោបាយផ្សេងទៀតមាន Facebook Twitter និង blog ជាដើមធ្វើការផ្សព្វផ្សាយឲ្យភាគីបុរសកាន់តែយល់ច្បាស់ពីសិទ្ធិស្រ្តី៕