ទិនហ្វី បង្ហាញមុខលើកនេះធ្វើឲ្យគេភ្ញាក់ផ្អើលគ្រប់គ្នា

2015-02-10 17:18:51
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងអ្នកដឹកនាំរឿងហុងកុង Stephen Chow (ទិនហ្វី) បានទទួលការចាប់អារម្មណ៍ច្រើនបំផុត នៅពេលចូលរួមកម្មវិធីសន្និសីទប្រឹក្សានយោបាយប្រចាំឆ្នាំ នៅខេត្ត Guangdong ប្រទេសចិន កាលពីថ្ងៃទី៧ ខែកុម្ភៈ កន្លងទៅ។

សារព័ត៌មាន HK Top Ten News បានឲ្យដឹងថា កម្លាំងសន្តិសុខនៅកិច្ចប្រជុំ CPPCC លើកទី១១នេះត្រូវបានដាក់បន្ថែមដើម្បីទប់ស្កាត់ភាពចលាចលពីហ្វូងមនុស្ស នៅពេលដែលតួឯក "Kungfu Hustle” រូបនេះធ្វើដំណើរមកដល់។

ទោះយ៉ាងណាតារាវ័យ ៥២ឆ្នាំរូបនេះ បាននិយាយថារូបគេចូលរួមកម្មវិធីប្រជុំលើកនេះដោយមិនបានត្រៀមខ្លួនអ្វីទាំងអស់។ ផលិតកររូបនេះបានប្រាប់អ្នកសារព័ត៌មានថា ថ្មីៗនេះគេទើបតែបញ្ចប់ការថតភាពយន្ត "Mermaid” ដូច្នេះហើយបានជាគ្មានពេលត្រៀមខ្លួនសម្រាប់ការប្រជុំមួយនេះ។

នៅពេលអ្នកសារព័ត៌មានសួរអំពីក្ដីបារម្ភធំរបស់លោក Stephen បានឆ្លើយថា "ខ្ញុំមានក្ដីបារម្ភខ្លាំងអំពីការថែរក្សាបរិស្ថាន។ ខ្ញុំនឹងបញ្ចេញមតិយោបល់ខ្លះៗអំពីបញ្ហានេះ បើសិនជាមានឱកាសចូលរួមកម្មវិធីបែបនេះលើកក្រោយ"។

ទីនហ្វីបានសម្រាកពីការសម្ដែងជាង ៦ឆ្នាំហើយ ដោយចាប់តាំងពីរឿង "CJ7”មក តារារូបនេះបានបន្តអាជីពសិល្បៈត្រឹមតែជាអ្នកនិពន្ធ ដឹកនាំ និងផលិតករភាពយន្តតែប៉ុណ្ណោះ។ ក្រៅពីសិល្បៈ បច្ចុប្បន្ន Stephen Chow ជាទីប្រឹក្សាផ្នែកនយោបាយម្នាក់ របស់ក្រុមប្រឹក្សានយោបាយសម្រាប់ប្រជាជនចិន ៕