ហេតុអីអាហារលើដី និងលើយន្តហោះដូចគ្នាសោះ តែរសជាតិខុសគ្នាស្រឡះ?
- 2015-02-11 15:47:28
- ចំនួនមតិ 0 | ចំនួនចែករំលែក 0
ហេតុអីអាហារលើដី និងលើយន្តហោះដូចគ្នាសោះ តែរសជាតិខុសគ្នាស្រឡះ?
ចន្លោះមិនឃើញ
តើអ្នកធ្លាប់ដឹងទេថា អាហារដួសចេញពីឆ្នាំងតែមួយ ដោយមួយញ៉ាំនៅលើដី និងមួយទៀតញ៉ាំនៅលើយន្តហោះមានរសជាតិខុសគ្នា? អ្នកធ្វើដំណើរលើយន្តហោះមិនតិចទេ ដែលធ្លាប់រអ៊ូរទាំថា អាហារលើយន្តហោះមិនសូវមានជាតិទាល់តែសោះ។ ចំពោះអ្នកដែលធ្លាប់ធ្វើដំណើរតាមយន្តហោះប្រហែលជាធ្លាប់ដឹងមកហើយថា រសជាតិអាហារនៅលើអាកាស ខុសគ្នានឹងរសជាតិអាហារនៅលើដីយ៉ាងម៉េចនោះ។ ការបកស្រាយខាងក្រោមនឹងអាចប្រាប់ប្រិយមិត្តថា ហេតុអ្វីបានជាអាហារនៅលើយន្តហោះ និងលើដីដូចគ្នាសោះ តែបែរជាមានរសជាតិខុសស្រឡះទៅវិញ។
១. ភាពស្ងួត និងសម្ពាធខ្យល់ទាប
នៅពេលអ្នកឈានជើងឡើងយន្តហោះ បរិយាកាសនៅខាងក្នុង (យន្តហោះ) នឹងជះឥទ្ធិពលលើឃានវិញ្ញាណរបស់អ្នកមុនគេ។ ក្រោយមកទៀត ពេលដែលយន្តហោះ ហោះឡើងកាន់តែខ្ពស់ សម្ពាធខ្យល់ និងសំណើមនឹងធ្លាក់ចុះ។ នៅរយៈកម្ពស់ប្រហែល ៩គីឡូម៉ែត្រ សំណើមមានតែ ១២ភាគរយប៉ុណ្ណោះ ដែលស្ងួតជាងនៅលើវាលខ្សាច់ខ្លះទៅទៀត។
បើតាមការសិក្សារបស់វិទ្យាស្ថានផ្នែករូបវិទ្យា Fraunhofer របស់អាល្លឺម៉ង់កាលពីឆ្នាំ ២០១០ បានឱ្យដឹងថា កាលណាភាពស្ងួតនិងសម្ពាធខ្យល់ទាប លាយឡំគ្នា នោះរសជាតិផ្អែមនិងប្រៃ ដែលអណ្តាតទទួលបាន នឹងត្រូវបានកាត់បន្ថយប្រហែល ៣០ភាគរយ តែចំពោះរសជាតិផ្សេងទៀតលើអាហារដូចជាមិនប៉ះពាល់នោះទេ។ ដូច្នេះហើយទើបអ្នកដំណើរលើយន្តហោះខ្លះ ឆ្ងល់ថាហេតុអ្វីបានជាអាហារលើយន្តហោះមានរសជាតិសាបៗ។
នៅលើយន្តហោះ ការប្រើប្រាស់គ្រឿងផ្សំសម្រាប់អាហារ គឺត្រូវប្រិតប្រៀងខ្លាំងជាងលើដី ដើម្បីធានារសជាតិនៃអាហារនីមួយៗ ឱ្យនៅតែឆ្ងាញ់ពិសារ។ នេះបានន័យថាអាហារមួយចំនួនត្រូវដាក់អំបិល ម្រិច ឬស្ករច្រើនជាងអាហារលើដី។
ការសិក្សាមួយទៀតរបស់អ្នកជំនាញចិត្តសាស្ត្របានឱ្យដឹងថា សំឡេងក៏ជាមូលហេតុដែលធ្វើឱ្យអ្នកគិតថា អាហារដែលអ្នកកំពុងញាំមិនសូវប្រៃនិងផ្អែមនោះទេ ជាពិសេសគឺសំឡេងយន្តហោះ។ ជាក់ស្តែងនៅក្នុងវីដេអូ ធ្វើតែស្តខាងក្រោម បានបង្ហាញថា ពេលមានសំឡេងរំខានខ្លាំង ខណៈកំពុងញ៉ាំអាហារអ្វីមួយ នោះអ្នកអាចនឹងមានអារម្មណ៍ថា អាហារមិនសូវជាប្រៃនិងផ្អែមប៉ុន្មានទេ ដែលផ្ទុយទៅនឹងការញ៉ាំអាហារមានភាពស្ងៀមស្ងាត់ គ្មានសំឡេងរំខានខ្លាំង អ្នកនឹងចូលចិត្តអាហារនោះជាង។
វីដេអូ៖
២. ការរក្សាអាហារ
ដើម្បីរក្សារសុវត្ថិភាពលើយន្តហោះ អាហារទាំងអស់គឺត្រូវចម្អិនលើដីទុកបម្រុង ដូច្នេះការរក្សាអាហារជាពិសេសកម្តៅ អាចនឹងមិនងាយស្រួល ហើយរស់ជាតិទៀតសោតក៏ត្រូវបាត់បង់។
ចំពោះការកម្តៅអាហារលើយន្តហោះ គឺត្រូវប្រើម៉ាស៊ីនកម្តៅម្យ៉ាង (convection oven) ដែលប្រើខ្យល់ស្ងួតនិងមានកម្តៅ ដើម្បីកម្តៅអាហារ (តែមិនប្រើម៉ាស៊ីន Microwaves នោះឡើយ)។ ម្យ៉ាងទៀត ដើម្បីស្វែងយល់ពីរសជាតិអាហារលើអាកាស ក្រុមហ៊ុនអាកាសចរ ជាច្រើនបានធ្វើពិសោធន៍ញ៉ាំអាហារផ្ទាល់នៅលើយន្តហោះ ដូចដែលអ្នកដំណើរបានធ្វើ ដើម្បីអាចធ្វើអាហារដែលត្រូវចិត្តអ្នកដំណើរ។
៣. រសជាតិស្រា
ចំពោះរសជាតិស្រា (Wine) វិញ គឺត្រូវដូរភ្លាមៗនៅពេលយន្តហោះ ហោះខ្ពស់ទៅលើអាកាស។ ធម្មតានៅលើដី ស្រាមានរសជាតិផ្លែឈើឆ្ងាញ់ និងមិនសូវល្វីង តែដល់ពេលផឹកវាលើយន្តហោះនៅរយៈកម្ពស់ខ្ពស់ បែរមានរសជាតិស្រាល ល្វីងខ្លាំង និងឡើងជាតិអាស៊ីតទៅវិញ។ នេះបើតាមលោក Liam Steevenson ជាអ្នកគ្រប់ក្រុមហ៊ុនចែកចាយស្រា Red & White មួយនៅអង់គ្លេស។
ដូច្នេះ ទើបធ្វើឱ្យអ្នកដំណើរមួយចំនួនមានអារម្មណ៍ប្លែក ពេលផឹកស្រានៅលើយន្តហោះ។ ដើម្បីដោះស្រាយបញ្ហានេះ ក្រុមហ៊ុនអាកាសចរទាំងអស់ត្រូវជ្រើសរើសស្រាណា ដែលមានរសជាតិផ្លែឈើ រួមនឹងជាតិអាល់កុលនិងជាតិល្វីងតិច ដើម្បីតម្រូវតាមសម្ពាធនៅលើអាកាស។ ចំពោះភេសជ្ជៈផ្សេងទៀត គឺអាចនឹងរងការប៉ះពាល់ដូចគ្នាអញ្ចឹងដែរ។
ប៉ុន្តែលោកបានឱ្យដឹងថា ទោះជាយ៉ាងណាស្រានៅតែជាភេសជ្ជៈ ដែលពិបាកនឹងរក្សារសជាតិ ដូច្នេះលោកផ្តល់យោបល់ថា អ្នកដំណើរលើយន្តហោះទាំងអស់គួរប្រញាប់ប្រញាល់ញ៉ាំ នៅពេលឡើងជិះយន្តហោះភ្លាម ដើម្បីទទួលបានរសជាតិដើមរបស់ស្រា៕
ចំពោះប្រិយមិត្តដែលធ្លាប់ជិះយន្តហោះ គិតថាអាហារមានរសជាតិយ៉ាងម៉េចដែរ?
អាន៖ អូអីចឹងទេអាហារអ្នកអវកាស មនុស្សភាគច្រើនមិនដែលឃើញទេ
ប្រែសម្រួល៖ ប៉ែត ផាន់និត
ប្រភព៖ bbc