ឈិន ឡុង ជួយស្ដារមុខកូនប្រុសឡើងវិញតាមរបៀបណា?

2015-02-11 16:41:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីនាពេលកន្លងមក ឈិន ឡុង បានបង្ហាញគោលជំហរមិនជួយកូនប្រុស ឱ្យចូលសង្គមសិល្បៈវិញមែនពិត តែថ្មីៗតារារូបនេះបានប្ដូរចិត្តវិញហើយ ហើយលោកថែមទាំងថា នឹងទៅពន្ធនាគារដើម្បីទទួលកូនទៀតផង។

តារាក្បាច់គុនចិនដែលកម្រធ្វើបទសម្ភាសន៍ ជាមួយសារព័ត៌មានហុងកុងបានថ្លែងថា លោកបានឃើញពីទង្វើរបស់ខ្លួននៅអតីតកាល និងរបៀបដែលលោកបង្រៀនកូន។ អ្នកស្រុក Linzi ខេត្ត Shandong បន្ថែមថា លោកធ្លាប់គិតថា កូនប្រុសរបស់លោកគួរតែបង្កើតកំហុស និងរៀនពីវាដើម្បីឱ្យរីកចម្រើន តែវាបែរជាបង្កើតបញ្ហាទៅវិញ។

តួឯករឿង "Police Story" ឈិន ឡុង បានឱ្យដឹងទៀតថា ទោះលោកមិនដែលបានធ្វើជាឪពុកល្អ និងជួយ Jaycee ចេញពីគុក តែលោកនៅតែមានទំនួទលខុសត្រូវ ដូច្នេះលោកនឹងប្រឹងឱ្យអស់ពីសមត្ថភាព ដើម្បីជួយកូនតាមរយៈការងារសិល្បៈឡើងវិញ។

“ពួកយើងថតអាល់ប៊ុមមួយកាលពីឆ្នាំទៅមិញ ប៉ុន្តែវាត្រូវបញ្ចប់ទៅវិញដោយសារបញ្ហានេះ (បញ្ហារបស់ Jaycee) ប៉ុន្តែរូបគេបានចេញពីពន្ធនាគារហើយ ដូច្នេះខ្ញុំនឹងបញ្ចប់ការថតបទចម្រៀង និងបញ្ចេញវាក្នុងឆ្នាំនេះតែម្ដង"។ ឈិន ឡុងបញ្ជាក់។

អាល់ប៊ុមនោះ ថតបាន៧បទហើយ ពោលគឺនៅសល់៥បទទៀត។ តារាសម្ដែងជើងចាស់វ័យ៦០ឆ្នាំថា ទោះបី Jaycee មិនធ្វើការ តែលោកសង្ឃឹមថា កូនប្រុសនឹងអាចធ្វើអ្វីមួយដោយខ្លួនឯងឡើងវិញ៕

អានអត្ថបទ៖ ឈិន ឡុង៖ ភាពយន្តសំខាន់ជាងគ្រួសារខ្ញុំ

ប្រែសម្រួល៖ អ៊ុំ សុភក្តិ ប្រភព៖ Yahoo