ឈិន ឡុង៖ ភាពយន្តសំខាន់ជាងគ្រួសារខ្ញុំ

2015-02-10 22:32:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីបញ្ជាក់ឱ្យកាន់តែច្បាស់ពីជំហរការងារ និងគ្រួសារ តារាក្បាច់គុន Jackie Chan (ឈិន ឡុង) បានឱ្យដឹងថា "ការថតខ្សែភាពយន្តមានសារៈសំខាន់ជាង ចំណាយពេលជាមួយគ្រួសារខ្ញុំទៅទៀត"។

ឈិន ឡុង និងមិត្តរួមការងារ

ការឱ្យដឹងខាងលើ គឺតារាវ័យ៦០ឆ្នាំ បានថ្លែងទៅកាន់ក្រុមអ្នកសារព័ត៌មាន នៅឯសន្និសីទកាសែតមួយក្នុងប្រទេសសិង្ហបុរី កាលពីព្រឹកថ្ងៃអង្គារនេះ នៅពេលលោកត្រូវបានសួរដេញដោលពីរឿងកូនប្រុស។

ឈិន ឡុង និយាយជាភាសាចិនថា “ខ្ញុំមានអារម្មណ៍ថា ការថតរឿងគឺសំខាន់ជាងការជួបគ្រួសារខ្ញុំ”។ នៅពេលអ្នកសារព័ត៌មានសួរថា តើលោកនឹងចំណាយពេលជាមួយគ្រួសារទេ ក្នុងឱកាសចូលឆ្នាំចិន? តារារូបនេះតបថា “វាជារឿងដូចគ្នាទេ បើទោះបីខ្ញុំជួបពួកគេ (គ្រួសារ) ថ្ងៃនេះ ស្អែក ឬខាងស្អែក។ ប៉ុន្តែពេលភាពយន្តត្រូវបញ្ចប់ ពួកគេ (ក្រុមការងារ) ច្បាស់ជាទៅអស់ ដូច្នេះខ្ញុំគិតថា ភាពយន្តសំខាន់ជាង។ ខ្ញុំនឹងជួបគ្រួសារខ្ញុំក្នុងពេលឆាប់ៗ ឬនៅពេលក្រោយ"។

កន្លងមក Jaycee វ័យ៣២ឆ្នាំ ដែលជាកូនប្រុស ឈិន ឡុង បានបន្ទោសឈិន ឡុងថា ព្រងើយកន្តើយ មិនចេះថែរក្សាខ្លួនឱ្យបានល្អ ដែលបណ្ដាលឱ្យរូបគេធ្លាក់ក្នុងសង្គមគ្រឿងញៀន។ សម្ដីនេះបានក្លាយជាប្រធានបទក្ដៅគគុកលើបណ្ដាញសារព័ត៌មាន ដែលជាហេតុឱ្យគេយល់ថា ទំនាក់ទំនងរបស់អ្នកទាំងពីរ អាចមានភាពរង្គោះរង្គើបន្តិចបន្ទួច។

Jaycee ត្រូវតុលាការទីក្រុងប៉េកាំងកាត់ទោសឱ្យជាប់ឃុំ៦ខែ ពីបទប្រើប្រាស់គ្រឿងញៀន និងផ្ដល់កន្លែងដល់អ្នកជក់គ្រឿងញៀន កាលពីខែសីហា ឆ្នាំ២០១៤ ហើយតារាសម្ដែងរូបនេះនឹងចេញពីពន្ធនាគារវិញនៅថ្ងៃសុក្រខាងមុខនេះ។

ក្នុងសន្និសីទខាងលើ ឈិន ឡុង ត្រូវអ្នកសារព័ត៌មានសួរទៀតថា "តើលោកនឹងនិយាយអ្វីខ្លះ ពេល Jaycee ត្រូវដោះលែងពីពន្ធនាគារ?"។ តារារូបនេះនិយាយថា លោកនឹងមិនធ្វើអ្វីទាំងអស់ ព្រោះមិនចង់បញ្ឈឺចិត្តកូនប្រុសម្ដងទៀតទេ។

“ខ្ញុំជឿថា៦ខែក្នុងគុក ធ្វើឱ្យគាត់ព្រួយបារម្ភពីជីវិតជូរចត់ក្នុងពេលអនាគត...ខ្ញុំយល់ថាគាត់បានទទួលទណ្ឌកម្ម ដែលគាត់សមនឹងទទួលហើយ...ខ្ញុំច្បាស់ណាស់ថា គាត់យល់...គាត់មិនមែនក្មេងទៀតទេ"។ ឈិន ឡុង បន្ថែម។

ថ្មីៗនេះ ឈិន ឡុង និងតារាសម្ដែងច្រើនទៀតដូចជា John Cusack, Adrien Brody, Choi Siwon សមាជិកក្រុម Super Junior, Mika Wang និង Lin Peng បានទៅចូលរួមការចាក់បញ្ចាំងរឿង "Dragon Blade" លើកដំបូងនៅសិង្ហបុរី។ ភាពយន្តចុងក្រោម "Dragon Blade" របស់តារារូបនេះ នឹងមានចាក់បញ្ចាំងតាមតំបន់នៅថ្ងៃទី១៩ ខែកុម្ភៈ ឆ្នាំ២០១៥ខាងមុខ៕

បើឈិន ឡុង និងPacquiao សម្ដែងរឿង “The Expendables 4” យល់ម៉េចដែរ?

ប្រែសម្រួល៖ អ៊ុំ សុភក្តិ ប្រភព៖ Yahoo