គ្រូត្រាយអាស៊ី៖ «បើគ្មានកាតក្រហម ក្រុមខ្ញុំនឹងស្វិតស្វាញជាងនេះ»
- 2015-02-12 22:14:15
- ចំនួនមតិ 0 | ចំនួនចែករំលែក 0
គ្រូត្រាយអាស៊ី៖ «បើគ្មានកាតក្រហម ក្រុមខ្ញុំនឹងស្វិតស្វាញជាងនេះ»
ចន្លោះមិនឃើញ
លោក ឈូក ពិសិដ្ឋ គ្រូបង្វឹកក្រុមត្រាយអាស៊ីភ្នំពេញ នៅតែមានជំនឿចិត្តថា ប្រសិនបើក្រុមលោកនៅសល់គ្នា ១១ នាក់ ក្នុងវគ្គពាក់កណ្ដាលផ្ដាច់ព្រ័ត្រពានរង្វាន់ Hun Sen Cup 2015 ម្សិលមិញ នោះការប្រកួតនឹងស្វិតស្វាញ និង ល្អមើលលើសមួយកម្រិតទៀត។
លោក ឈូក ពិសិដ្ឋ គ្រូក្រុមត្រាយអាស៊ី
លោកគ្រូបង្វឹកវ័យក្មេងកាន់កិច្ចការធំបបណ្ដោះអាសន្នរូបនេះលើកឡើងក្រោយចប់ការប្រកួតថា៖ «ខ្ញុំទទួលយកការប្រកួតនេះបាន ហើយខ្ញុំមានមោទនភាពដែលកូនក្រុមលេងបានល្អ ធ្វើបានល្អទោះមានគ្នាត្រឹម ១០ នាក់ក៏ដោយ»។ លោកមិនមានប្រតិកម្មចំពោះលោកអាជ្ញាកណ្ដាល ថោង ច័ន្ទកិត្យា ដែលសម្រេចពិន័យកាតក្រហមដល់កីឡាកររបស់លោក នុត ស៊ីនួន នៅនាទី ៣០ នៃការប្រកួតនេះនោះទេ ដោយលើកឡើងថាជាការសម្រេចចិត្តរបស់អាជ្ញាកណ្ដាល។
ត្រាយអាស៊ីភ្នំពេញ បានប្រកួតចាញ់ក្រុមម្ចាស់ផ្ទះស្វាយរៀង ២ ទល់ ០ នៅវគ្គពាក់កណ្ដាលផ្ដាច់ព្រ័ត្រ។ ២ គ្រាប់របស់ស្វាយរៀង រកបានដោយប្រធានក្រុម ប្រាក់ មុន្នីឧត្តម នៅនាទី ៤០ និង ៨៨។ត្រាយអាស៊ី ទើបតែបង្កើតឡើងនៅខែធ្នូ ចុងឆ្នាំ ២០១២ ប៉ុណ្ណោះ ហើយចូលឆ្នាំ ២០១៣ក្រុមមួយនេះបានឈ្នះជើងឯកនៅក្របខណ្ឌក១ មុនបង្ហាញខ្លួននៅលីកកំពូលកម្ពុជា ក្នុងរដូវកាល ២០១៤ កន្លងទៅ ថែមទាំងឈរចំណាត់ថ្នាក់លេខ ៥ ក្នុងចំណោមក្រុមទាំង ១២ ទៀតផង។ នេះជាឆ្នាំទី២ ហើយដែលត្រាយអាស៊ី បង្ហាញខ្លួនក្នុងពានរង្វាន់ Hun Sen Cup ខណៈឆ្នាំមុនធ្លាក់ត្រឹមវគ្គចែកពូល ក្រោយប្រកួតស្មើភ្នំពេញក្រោន ១ – ១ តែចាញ់អគ្គស្នងការដ្ឋាននគរបាលជាតិ ១ – ០ និង ឈ្នះក្រុមខេត្តកំពង់ឆ្នាំង ១៥ – ០។
ជម្រើស ១១ នាក់ដំបូងរបស់ក្រុមត្រាយអាស៊ី ម្សិលមិញ
លោក ឈូក ពិសិដ្ឋ សូមអភ័យទោសដល់អ្នកគាំទ្រក្រុមខ្លួនទាំងអស់ដែលខកខានកៅអីវគ្គផ្ដាច់ព្រ័ត្រ ប៉ុន្ដែលោកសន្យាថានឹងប្រឹងប្រែងរកចំណាត់លេខ ៣ ចាកក្នុងប្រវត្តិសាស្ត្រក្រុមឱ្យបាន។
លោក សំ វ៉ាន់ដេត គ្រូបង្វឹករបស់ក្រុមខេត្តស្វាយរៀង
ចំណែកលោក សំ វ៉ាន់ដេត គ្រូបង្វឹកក្រុមខេត្តស្វាយរៀង លើកឡើងថា ការប្រកួតពីមួយវគ្គទៅមួយវគ្គកាន់តែពិបាក។ លោកសប្បាយចិត្តដែលបានជួយក្រុមឡើងទៅវគ្គផ្ដាច់ព្រ័ត្រជាលើកទី ៤ ប្រចាំពានរង្វាន់នេះអមដោយសំឡេងគាំទ្រពីប្រជាពលរដ្ឋប្រចាំខេត្តដែលបានអញ្ជើញទស្សនាផ្ទាល់ជុំវិញទីលាន។
ក្រុមត្រាយអាស៊ី ត្រូវប្រកួតជាមួយក្រុម អគ្គស្នងការដ្ឋាននគរបាលជាតិ ដណ្ដើមចំណាត់ថ្នាក់លេខ ៣ នៃពាន Hun Sen Cup នៅវេលាម៉ោង ២ រសៀល ថ្ងៃទី ១៤ កុម្ភៈ ខាងមុខ លើវាលស្មៅកីឡដ្ឋានខេត្តស្វាយរៀង ស្របពេលក្រុមម្ចាស់ស្រុក ខេត្តស្វាយរៀង ជួបក្រុម ណាហ្គាវើល នៅវេលាម៉ោង ៤:៣០ នាទីល្ងាច ដណ្ដើមជើងឯកប្រចាំឆ្នាំ ២០១៥៕
អត្ថបទពាក់ព័ន្ធ៖ ក្រុមណាខ្លះធ្លាប់លើកពាន Hun Sen Cup ៨ឆ្នាំកន្លងមក?
អត្ថបទ៖ ម៉ឺន រស្មី
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
