វ៉ាង ស្រីណូ ត្អូញថា ហត់ ក្រោយវិលវិញ!

2015-02-13 19:04:15
ចំនួនមតិ 0 | ចំនួនចែករំលែក 0

ចន្លោះមិនឃើញ

វ៉ាង ស្រីណូ ចាប់ផ្ដើមមានទីផ្សារសិល្បៈឡើងវិញ ធ្វើឲ្យមានការហត់នឿយជាខ្លាំង បន្ទាប់ពីបានវិលរកវិស័យនេះ ជាផ្លូវការម្ដងទៀត នៅដើមឆ្នាំ ២០១៥ ដោយមានទាំងការដើរម៉ូដ ឬ ចម្រៀងខារ៉ាអូខេ ឲ្យផលិតកម្មនានា ជាដើម។

តារាសិចស៊ីរូបនេះ និយាយថា៖ " ធម្មតាឲ្យតែការងារច្រើន ប្រាកដជាហត់នឿយអញ្ចឹងហើយ ព្រោះទើបនឹងចូលមកវិញ"។ វ៉ាង ស្រីណូ និយាយថា កញ្ញាបានសម្រេចចិត្តចាកចេញពីវិស័យសិល្បៈ ៣ ឆ្នាំ កន្លងមកហើយ ដោយគ្រាន់តែលេចមុខម្ដងម្កាលនៅក្នុងកម្មវិធីរបស់អ្នករួមអាជីពមួយចំនួនតែប៉ុណ្ណោះ។ នាង មានការមមាញឹកក្នុងការងាររកស៊ី ទើបសម្រេចចិត្តចាកចេញ ពីសិល្បៈបណ្ដោះអាសន្ន។

ទោះបីជាយ៉ាងណា ការវិលរកសិល្បៈម្ដងទៀត ដោយសារនាងមិនសូវមមាញឹកដូចពីមុននោះទេ ព្រោះបានរៀបចំស្រេចបាច់អស់ហើយ និង កំពុងតែកាក់កបទៀតផង។ ដោយសារតែដុះដាលពីសិល្បៈ ដូច្នេះ មិនអាចបោះបង់ពីសិល្បៈនោះទេ។ នាងបញ្ជាក់។

ទោះបីជាយ៉ាងណា តារាស្រីរូបនេះ ក៏បានប្រាប់អំពីការរកស៊ីតាមអនឡាញផងដែរ។ ស្រីណូ បន្តថា ជំនួញបែបនេះ ក៏នឹងធ្វើឲ្យនាងមានការមមាញឹកបន្ថែមទៀតដែរ ព្រោះត្រូវឡើងចុះយកទំនិញពីក្រៅប្រទេសមកលក់ក្នុងស្រុកខ្មែរជាដើម។ ដោយឡែកពាក់ព័ន្ធទៅនឹងសិល្បៈ តារារូបនេះនិយាយថា នាងកំពុងដើរមួយជំហាន គិតមួយជំហានសិន និង បត់បែនតាមសភាពជាក់ស្ដែង ព្រោះទើបចាប់ផ្ដើមជាថ្មី។

“យ៉ាងណា ខ្ញុំនៅតែត្រូវការគាំទ្រពីទស្សនិកជនបន្តទៀត សូមតែដូចពីមុនក៏បានដែរ ព្រោះខានយូរឆ្នាំហើយដែរ"។ វ៉ាង ស្រីណូ បញ្ជាក់យ៉ាងដូច្នេះ៕