វគ្គផ្ដាច់ព្រ័ត្រ Hun Sen Cup 2015 នៅតែជាប្រធានបទក្ដៅ?

2015-02-16 19:09:13
ចំនួនមតិ 0 | ចំនួនចែករំលែក 0

ចន្លោះមិនឃើញ

វគ្គផ្ដាច់ព្រ័ត្របាល់ទាត់ពានរង្វាន់ Hun Sen Cup 2015 បានបញ្ចប់ទៅ ២ ថ្ងៃហើយ ប៉ុន្តែអ្នកពាក់ព័ន្ធចំនួននៅតែបង្ហាញអារម្មណ៍មិនអស់មិនហើយពីពានរង្វាន់មួយនេះ រវាងក្រុមជើងឯក និង ជាម្ចាស់ផ្ទះ ខេត្តស្វាយរៀង ជាមួយក្រុមជើងឯករង ៤ សម័យកាល ណាហ្គាវើល កាលពីថ្ងៃទី ១៤ កុម្ភៈ ឆ្នាំ ២០១៥។

ណាហ្គាវើល (ប្រផេះ) ស្វាយរៀង (ក្រហម)

ស្វាយរៀង បានយកឈ្នះក្រុមណាហ្គាវើល ដោយលទ្ធផល ២ ទល់ ១ នៅវគ្គផ្ដាច់ព្រ័ត្រដោយថ្វីជើងកីឡាករ ប្រធានក្រុម ប្រាក់ មុន្នីឧត្តម នៅនាទី ៤៥+១ និង ណុប តុលា នៅនាទី ៩០+១ ស្របពេលម៉ោងបន្ថែមមាន ៣ នាទី ហើយ ១ គ្រាប់របស់ណាហ្គា រកបានដោយកីឡាករ ស៊ុន សុបញ្ញា នៅនាទី ៦០ ខណៈប្រធានក្រុម ស៊ុន សុវណ្ណរិទ្ធី ត្រូវលោកអាជ្ញាកណ្ដាល ទុយ វិច្ឆិកា ពិន័យកាតលឿង ២ ដង ស្មើនឹងកាតក្រហម។

អ្នកគាំទ្រលើទីលានម្នាក់សុំមិនបញ្ចេញឈ្មោះបានប្រាប់ក្រោយប្រកួតចប់ថា៖ «ការប្រកួតបញ្ចប់ទៅទាំងបែបនេះដូចមិនអស់ចិត្តសោះ។ ការប្រកួតដាច់ភាគត្រឹមកាតក្រហម បើសិនមិនមានការពិន័យនេះប្រហែលជក់ចិត្តកាន់តែខ្លាំងហើយ ព្រោះក្រុមទាំង ២ ល្អរៀងខ្លួន»។

រីឯលោក ប្រាក់ សុវណ្ណារ៉ា គ្រូបង្វឹករបស់ក្រុមគីរីវង់សុខសែនជ័យ បានសរសេរឆ្លើយតបនៅក្នុងហ្វេសប៊ុកអាជ្ញាកណ្ដាលម្នាក់ក្នុងចំណោម ៤ នាក់ដែលដឹកនាំការប្រកួតវគ្គផ្ដាច់ព្រ័ត្រ Hun Sen Cup 2015 ថា៖ «ទ្រាំទៅកម្មយើងទេ ធ្វើម៉េចបើឯងស្រឡាញ់អាជីពហ្នឹង។ ពួកអ្នកចេះតែថាអោយយើង មិនហ៊ានចាប់យកអាជីពនេះទេ ខ្លាចគេជេរវិញ»។

លោក សំ វ៉ាន់ដេត គ្រូបង្វឹកក្រុមខេត្តស្វាយរៀង

ចំណែក លោក សំ វ៉ានដេត គ្រូបង្វឹករបស់ក្រុមខេត្តស្វាយរៀង បានប្រាប់ Sabay ក្រោយចប់ការប្រកួតថា៖ «យើងគោរពតាមការសម្រេចចិត្តរបស់អាជ្ញាកណ្ដាល ព្រោះបាល់ទាត់យើងមិនអាចលេងដោយអត់មានអាជ្ញាកណ្ដាលបាននោះទេ»។

ចំពោះលោក មាស ចាន់ណា គ្រូបង្វឹករបស់ក្រុមណាហ្គាវើល វិញបានស្នើសុំទៅសហព័ន្ធកីឡាបាល់ទាត់កម្ពុជា ដែលជាអាណាព្យាបាលក្លិបបាល់ទាត់ទាំងអស់សូម ជួយសម្របសម្រួលដល់ការប្រកួតផ្ដាច់ព្រ័ត្រគ្រប់ពានរង្វាន់ទាំងអស់កុំឱ្យមានបញ្ហាបែបនេះទៀត។ ទោះបីជាការប្រកួតប្រព្រឹត្តិឡើងបែបណាក៏ដោយ តែសកម្មភាពទាំងអស់មានផ្សាយផ្ទាល់តាមប៉ុស្ដិ៍ទូរទស្សន៍ ហើយសម័យនេះគ្រប់គ្នាសុទ្ធតែចេះប្រើ ហ្វេសប៊ុក អ្នកគាំទ្រទាំងអស់សុទ្ធតែអាចវិនិច្ឆ័យបានដូចគ្នា។

លោក មាស ចាន់ណា គ្រូបង្វឹកណាហ្គាវើល

លោកគ្រូវ័យ ៣០ឆ្នាំប្លាយរូបនេះបានបន្ថែមថា៖ «ខាងខ្ញុំមិនបានដាក់ពាក្យប្ដឹងទាស់អ្វីនោះទេ បើយើងធ្វើខ្លាំងអាចនឹងមានអ្នកខ្លះបាត់បង់អាជីពពីបាល់ទាត់នេះ។ ប៉ុន្ដែយើងគ្រាន់ចង់ឱ្យពួកគាត់កែប្រែខ្លួនឡើងវិញ កុំព្យាយាមគិតម្ខាង ៤០% ឬ ម្ខាង ៦០%»។

ក្រុមខេត្តស្វាយរៀង លើកពាន Hun Sen Cup 2013

ការប្រកួតចាប់ឡើងកម្ដៅនៅក្នុងតង់ទី២ ពោលគឺក្រោយខាងណាហ្គាវើល យល់ខ្លួនគួរតែបានបាល់ពិន័យ ១១ ម៉ែត្រ មុនប្រធានក្រុម ស៊ុន សុវណ្ណរិទ្ធី ពិន័យកាតលឿងលើកទី១ នៅនាទី ៧២ និង កាតកាតក្រហមលើកទី២ នៅ ២ នាទីបន្ទាប់ គឺក្នុងនាទី ៧៤ នៃការប្រកួត។

ឆ្លើយតបនឹងសំនួរដែលសួរថា មានអ្នកគាំទ្រមួយចំនួន លើកឡើងថា កីឡាកររបស់ណាហ្គា ឆេវឆាវបន្តិចទើបមានបញ្ហាកើតឡើង។ លោក មាស ចាន់ណា លើកឡើថា៖ «ប្រសិនបើកីឡាករខ្ញុំឆេវឆាវ នោះមិនមែនកាតក្រហមតែ ១ នោះទេ ពួកគាត់តវ៉ាខ្លាំងនៅពេលចប់ការប្រកួតប៉ុណ្ណោះ។ ខ្ញុំសូមអរគុណដល់ពួកគាត់ដែលព្យាយាមតាំងចិត្តប្រកួតរហូតដល់ចប់ចុងចប់ដើម»។

លោក គល់ សុផាន់ណា អគ្គលេខាធិការសហព័ន្ធកីឡាបាល់ទាត់កម្ពុជា និង លោក ម៉ៃ តុលា មន្រ្តីបច្ចេកទេសរបស់សហព័ន្ធ និងអគ្គលេខធិការរង មិនអាចទាក់ទងដើម្បីបំភ្លឺក្នុងរឿងនេះបានទេនៅព្រឹកថ្ងៃទី ១៦ កុម្ភៈ នេះ ដោយទូរស័ព្ទចូលមិនមានអ្នកទទួល៕

ខាងក្រោមជាវីដេអូនៃការប្រកួតផ្ដាច់ព្រ័ត្ររវាងណាហ្គាវើល និង ខេត្តស្វាយរៀង៖

http://youtu.be/gBheRbKV3rk