នំអន្សមយក្សធំជាងមុនតម្លៃ ២ ម៉ឺនដុល្លារ នឹងដាក់តំាងក្នុងកម្មវិធី អង្គរសង្ក្រាន្តឆ្នំា ២០១៥

2015-02-16 19:03:07
ចំនួនមតិ 0 | ចំនួនចែករំលែក 0

ចន្លោះមិនឃើញ

សមាគមចុងភៅកម្ពុជាគ្រោងនឹងធ្វើនំអន្សមយក្ស ជាលើកទី ២ ដែលមានទំហំធំជាងនំអន្សមយក្ស កាលពីឆ្នំា ២០១៤ សម្រាប់ដាក់ តំាងបង្ហាញនៅក្នុងកម្មវិធីអង្គរសង្ក្រាន្ត ដែលនឹងព្រឹត្តទៅនៅថ្ងៃទី ១៤ ដល់ ១៦ ខែ មេសា ឆ្នាំ ២០១៥ ខាងមុខនេះ។ នេះបើតាមការចេញផ្សាយរបស់ភ្នាក់ងារ AKP

បើតាម AKP គោលបំណងផលិតនំអន្សមយក្សនេះឡើង គឺដើម្បីមានឱកាសចូលក្នុងសៀវភៅកំណត់ហេតុ ពិភពលោកប្រចំាឆ្នំា ២០១៥ នេះផងដែរ។

លោក ចាន់ សុភា អ្នកចាត់ការទូទៅ នៃសមាគមចុងភៅកម្ពុជា បានឱ្យអ្នកសារព័ត៌មានដឹងថា ការបង្កើតឱ្យមាន នំអន្សមយក្សនេះ ក៏ដើម្បីបង្ហាញនូវអ្វី ដែលប្លែកៗ ជាផលិតផលប្រពៃណីរបស់ខ្មែរ ដើម្បីឱ្យភ្ញៀវទេសចរដែល បានមកទស្សនាប្រទេសកម្ពុជា កាន់តែបានយល់ច្បាស់ អំពីប្រពៃណីខ្មែរ ជាពិសេស គឺចង់បង្ហាញថា កូនខ្មែរ ក៏មានសមត្ថភាព ធ្វើអ្វីក៏បានដូចប្រទេសដទៃដែរ។

លោក ចាន់ សុភា បានឱ្យដឹងទៀតថា សម្រាប់ការធ្វើនំ អន្សមយក្ស លើកនេះ គ្រោងនឹងចំណាយ ថវិកាចំនួនជាង ២០.០០០ ដុល្លារអាមេរិក ហើយរហូតមកដល់ ពេលនេះ សមាគមមិនទាន់មានថវិកាគ្រប់គ្រាន់នៅឡើយ។ ដូច្នេះលោកអំពាវ នាវឱ្យប្រជាពលរដ្ឋកម្ពុជា ទំាងអស់ជួយជ្រោមជ្រែងគ្នាដើម្បីឱ្យនំអន្សមយក្សរបស់យើងជាប់នៅក្នុងសៀវភៅកំណត់ហេតុពិភពលោក ប្រចំាឆ្នំា ២០១៥ នេះឱ្យបាន។

កាលពីឆ្នាំមុន សមាគមចុងភៅ (Cambodia Chefs’ Association)និងបុគ្គលិកជាង ៥០នាក់ បានផលិតនំអន្សមជ្រូកយក្សធ្វើពី អង្ករដំណើបទម្ងន់ជាង ៣០០ គីឡូក្រាម ដោយបានចំណាយថវិកា ៧៥០០ ដុល្លារអាមេរិក ដាក់ដង្ហែ និង តាំងបង្ហាញនៅខាងមុខរមណីយដ្ឋានអង្គរវត្ត៕

អត្ថបទ៖មៃ សុខលីម