Huang Xiaoming ប្ដឹងមន្ទីរពេទ្យដែលយករូបថតស្រាតខ្លួនប្រើខុសច្បាប់

2015-02-16 22:13:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ តារាសម្ដែងចិន Huang Xiaoming បានដាក់ពាក្យប្ដឹងមន្ទីរពេទ្យមួយនៅទីក្រុងប៉េកាំង ដែលបានយករូបថតរបស់គេទៅកាត់តជារូបស្រាត និងប្រើប្រាស់ដើម្បីផ្សព្វផ្សាយសេវាកម្មរបស់ខ្លួន។

សារព័ត៌មាន Oriental Daily News បានឲ្យដឹងថា តារាសម្ដែងរឿង "បិសាចក្រមុំសក់ស" រូបនេះបានបញ្ចេញសេចក្ដីថ្លែងការណ៍មួយ ដោយចោទប្រកាន់មន្ទីរពេទ្យមួយនោះចំពោះការធ្វើរឿងអសីលធម៌ ដោយសង្កត់ថា ទង្វើនេះបានបំពានសិទ្ធិរបស់គេ ក៏ដូចជាបង្ខូចកេរ្តិ៍ឈ្មោះរបស់គេ ដែលមិនដែលធ្លាប់ពាក់ព័ន្ធនឹងពេទ្យនោះទាល់តែសោះ។

តារាសម្ដែងរូបនេះ បានទាមទារឲ្យមន្ទីរពេទ្យ ដករូបគេទាំងអស់ដែលបានចុះផ្សាយក្នុងទស្សនាវដ្ដីផ្សេងៗ ធ្វើការសូមទោសរូបគេជាសាធារណ និងសងជំងឺចិត្តចំនួន ៤៨ ១៥៩ដុល្លារ។

ជាមួយគ្នានោះដែរ លោក Huang Bin ជាអ្នកគ្រប់គ្រងរបស់តារាសម្ដែងរូបនេះបានបញ្ជាក់ថា Huang បានដាក់ពាក្យបណ្ដឹងនេះមិនមែនដើម្បីចង់បានផលប្រយោជន៍សម្រាប់ខ្លួនឯងនោះទេ ប៉ុន្តែគឺក្នុងគោលបំណងលើកកម្ពស់ការយល់ដឹងពីការប្រើប្រាស់ច្បាប់ដើម្បីការពារខ្លួនឯងតែប៉ុណ្ណោះ។

Huang Xiaoming វ័យ ៣៧ឆ្នាំ គឺជាតារាសម្ដែង និងម៉ូដែលលេចធ្លោម្នាក់នៅប្រទេសចិន ដែលបានចាប់ផ្ដើមអាជីពសិល្បៈកាលពីឆ្នាំ១៩៩៨។ Huang ចាប់ផ្ដើមល្បីខ្លាំងបន្ទាប់ពីសម្ដែងជាតួ "យ៉ាងគួ" ក្នុងរឿង "រន្ទះដាវឥន្ទ្រីទេព" កាលពីឆ្នាំ២០០៦ និងក្រោយមកបានសម្ដែងរឿងជាច្រើនទៀតដូចជា "The Crossing”, “American Dream in China”, និង "White Haired Witch” ជាដើម៕

ចុចអាន៖ឪពុកសម្លាប់ខ្លួន ពេលឃើញរូបកូនថតស្រាតដាក់ទស្សនាវដ្ដី Playboy

ប្រែសម្រួល៖ វ៉ាន់ថន ប្រភព៖ yahoo