តារា​ចម្រៀង​ប៉ុប​អាមេរិក Lady Gaga បាន​ភ្ជាប់​ពាក្យ​ជាមួយ​សង្សារ​របស់​នាង​ហើយ គឺ​តារា​សម្ដែង​រឿង "Chicago Fire” Taylor Kinney។ តារា​ចម្រៀង​រហស្សនាម Mother Monster ​បាន​ប្រកាស​ដំណឹង​នេះ​កាល​ពី​ថ្ងៃ​ចន្ទ គឺ​២​ថ្ងៃ​ក្រោយ​​​ថ្ងៃ​បុណ្យ Valentine's ដោយ​បាន​បង្ហោះ​រូបថត​មួយ​សន្លឹក​លើ Instagram ដែល​មាន​រូប​ចិញ្ចៀន​ភ្ជាប់​ពាក្យ​រាង​បេះដូង។

ម្ចាស់​បទ "Bad Romance" រូប​នេះ​ បាន​និយាយ​ថា "គាត់​បាន​ប្រគល់​បេះដូង​គាត់​មក​ឲ្យ​ខ្ញុំ​នៅ​ថ្ងៃ Valentine's ហើយ​ខ្ញុំ​និយាយ​ថា យល់​ព្រម!”។

តារា​ចម្រៀង​ប៉ុប​វ័យ ២៨ឆ្នាំ ដែល​មាន​ឈ្មោះ​ពិត Stefani Joanne Angelina Germanotta និង​មិត្ត​ប្រុស​ជា​តារា​សម្ដែង​វ័យ ៣៣ឆ្នាំ បាន​ជួប​គ្នា​នៅ​ពេល​ថត​បទ "You and I” ជាមួយ​គ្នា​កាល​ពី​ឆ្នាំ​២០១១។ ពួក​គេ​តែង​រក្សា​ទំនាក់​ទំនង​នេះ​ជា​លក្ខណៈ​ឯកជន​បំផុត ដោយ​មិន​សូវ​បង្ហាញ​ខ្លួន​ជាមួយ​គ្នា​ជា​សាធារណ​ញឹកញាប់​ឡើយ ៕ ​

បទ "You and I” ដែល​អ្នក​ទាំង​ពីរ​បាន​សម្ដែង​រួម​គ្នា៖

http://youtu.be/X9YMU0WeBwU

ចុច​អាន៖Lady Gaga បង្ហាញ​ល្វែង​លើ​ទាំង​ស្រុង​ លើ​ឆាក​តន្ត្រី​ទីក្រុង Vienna