ចប់ Hun Sen Cup ប្រាក់ មុន្នីឧត្តម ជាបេះដូងរបស់ ក្រុមខេត្តស្វាយរៀង
- 2015-02-17 18:41:23
- ចំនួនមតិ 0 | ចំនួនចែករំលែក 0
ចប់ Hun Sen Cup ប្រាក់ មុន្នីឧត្តម ជាបេះដូងរបស់ ក្រុមខេត្តស្វាយរៀង
ចន្លោះមិនឃើញ
កីឡាករ ប្រាក់ មុន្នីឧត្តម ជាសមាជិកក្នុងក្រុមជម្រើសជាតិកម្ពុជា និង ជាប្រធានក្រុមបាល់ទាត់ខេត្តស្វាយរៀង ទើបជួយក្លិបរបស់ខ្លួនដណ្ដើមបានពានរង្វាន់ Hun Sen Cup 2015 កាលពីពេលថ្មីៗ បានបង្ហាញសមត្ថភាពកាន់តែច្បាស់ ដល់អ្នកគាំទ្រ ក៏ដូចជាថ្នាក់ដឹកនាំក្រុមថារូបគេជាសរសៃឈាមចម្បងមិនអាចខ្វះបានសម្រាប់ក្រុម។
ប្រាក់ មុន្នីឧត្តម ក្រោមការចោមរោមពីអ្នកគាំទ្រ
អមដោយទម្រង់លេងដ៏ល្អប្រចាំក្រុម ប្រាក់ មុន្នីឧត្តម ទទួលងារជាអ្នកទាត់បាល់បញ្ជូលទីដៃគូប្រកួតច្រើនជាងគេប្រចាំឆ្នាំទី ៩ នេះ ពោលគឺរកបាន ២៤ គ្រាប់ម្នាក់ឯង បូកតាំងពីប្រកួតជម្រុះ ៣ ប្រកួត, វគ្គ ៨ ក្រុមចុងក្រោយ, វគ្គ ១/២ និង វគ្គផ្ដាច់ព្រ័ត្រ។ ក្នុងអំឡុងពេលប្រកួតម្ដងៗ ដែលរៀបចំនៅកីឡដ្ឋានខេត្តស្វាយរៀង អ្នកគាំទ្រម្នាក់បានស្រែកថា៖ «Super Star ឈ្មោះអី?»។ ចំណែកអ្នកផ្សេងទៀតបន្តយ៉ាងស្រុះគ្នាថា៖ «ប្រាក់ មុន្នីឧត្តម» គួបផ្សំនឹងសំឡេងវាយស្គរ និង គ្រវីទង់របស់ក្រុម (វីដេអូខាងក្រោម)។ ចំណែកសាមីខ្លួនបានប្រាប់ Sabay ថា ក្រោយចប់ការប្រកួតវគ្គផ្ដាច់ព្រ័ត្រថា៖ «អរគុណដល់អ្នកគាំទ្រតែងតែលើកទឹកចិត្តក្រុមខេត្តស្វាយរៀង។ តាមពិតខ្ញុំអាចធ្វើបានល្អក៏ដោយសារតែមានការសហការពីមិត្តរួមក្រុម រួមទាំងមានការហ្វឹកហាត់បានដិតដល់ពីលោកគ្រូប្រចាំក្រុមផងដែរ»។
ប្រាក់ មុន្នីឧត្តម ទទួលពានអ្នកទាត់បញ្ជូលទីច្រើនជាងគេ
ក្នុងនាមជាកីឡាករ Top Score ប្រចាំពានរង្វាន់ កីឡាករវ័យ ២០ ឆ្នាំប្លាយរូបនេះ បានសន្យាថានឹងខិតខំប្រឹងប្រែងហ្វឹកហាត់បន្តទៀតដើម្បីពង្រឹងសមត្ថភាព បន្តជួយក្រុមក្នុងពានរង្វាន់មិត្តហ្វូនខេមបូឌានលីក ដែលនឹងមកដល់នៅពេលឆាប់ៗ ខាងមុខ។ ជុំវិញនឹងកម្រិតបច្ចេកទេសរបស់កីឡាករ ប្រាក់ មុន្នីឧត្តម លើទីលានលោក សំ វ៉ាន់ដេត គ្រូបង្វឹករបស់ក្រុមខេត្តស្វាយរៀង បានលើកឡើងថា៖ «គេជាបេះដូងរបស់ក្រុមខេត្តស្វាយរៀង ទាំងសម្រាប់អ្នកគាំទ្រ និង សម្រាប់ក្រុមទាំងមូល»។ កីឡាករ ប្រាក់ មុន្នីឧត្តម បានបង្ហាញខ្លួនដំបូងជាមួយក្រុមឈុតធំរបស់ព្រះខ័នរាជ (បច្ចុប្បន្នស្វាយរៀង) នៅពានរង្វាន់ Hun Sen Cup ឆ្នាំ ២០០៧ ដែលជាឆ្នាំដំបូង តែកាលនោះត្រឹមជាកីឡាករបម្រុងប៉ុណ្ណោះ។ លុះចូលដល់ឆ្នាំបន្ទាប់ទើបអាចបង្ហាញខ្លួនលើទីលានខ្លះៗ។ នៅឆ្នាំ ២០០៩ សមត្ថភាពរបស់គេ កាន់តែឡើងទម្រង់យ៉ាងខ្លាំងរហូតជាប់ឈ្មោះក្នុងឈុតស៊ីហ្គេម ទៅប្រកួតនៅប្រទេសឡាវ ទៀតផង។ ចូលដល់ដើមរដូវកាល ២០១៣ ប្រាក់ មុន្នីឧត្តម បានរបួសជើងក្រោយប៉ះជាមួយអ្នកចាំទី អ៊ុំ វិចិត្រ ហើយត្រូវសម្រាករហូតដល់ជុំទី២ ទើបបង្ហាញខ្លួនឡើងវិញបាន ដល់សព្វថ្ងៃ៕ វីដេអូអ្នកគាំទ្ររបស់ខេត្តស្វាយរៀង ស្រែកហៅឈ្មោះ ប្រាក់ មុន្នីឧត្តម៖ http://youtu.be/h6xri4l_tAY អត្ថបទ៖ ម៉ឺន រស្មី
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
