ភាពយន្តខ្មែរ "អេតចាយ"ឈ្នះពានមហាជននៅ Tropfest SEA

2015-02-17 18:54:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុតភាពយន្តខ្នាតខ្លី "The Scavenger” ឬ "អេតចាយ" របស់យុវជនឈិន សុធាបានក្លាយជាជយលាភីពានមហាជននៅមហោស្រពភាពយន្ត Tropfest អាស៊ីអាគ្នេយ៍។

បើតាមទំព័រ Facebook ផ្លូវការរបស់កម្មវិធីខាងលើបង្ហោះថា រឿង "The Scavenger” ទទួលបានសំឡេងគាំទ្រជាង ១ ម៉ឺនសំឡេងលើភាពយន្តប្រកួតប្រជែងទាំង ១៥ ផ្សេងទៀត។ ការឈ្នះពានរង្វាន់នេះ យុវជន សុធាទទួលបានកាមេរ៉ា Canon EOS 70D មួយគ្រឿង អមដោយទឹកប្រាក់ ៥០០ ដុល្លារ។

រឿង "អេតចាយ" រៀបរាប់ពីជីវិតស្ត្រីអ្នករើសអេតចាយមេម៉ាយម្នាក់ ដែលព្យាយាមលាក់បាំងកូនប្រុសរបស់ខ្លួនថា ឪពុករបស់គេនឹងត្រឡប់មកនៅថ្ងៃណាមួយ និងទិញកង់ថ្មីឲ្យគេជិះទៅសាលា។ តែថ្ងៃមួយគ្រប់យ៉ាងត្រូវបែកការណ៍ ពេលកូនប្រុសរកឃើញបំបែកកង់ផ្សេងៗគ្នាដែលម្ដាយរូបនេះសន្សំពីកន្លែងរើសសំរាម។

ភាពយន្តខ្នាតខ្លីចំនួន ១៦ រឿងរបស់ផលិតករក្នុងតំបន់អាស៊ីអាគ្នេយ៍ត្រូវបានដាក់ប្រកួតប្រជែង វគ្គផ្ដាច់ព្រ័ត្រពានមហាជននេះ ដោយក្នុងនោះភាពយន្តកម្ពុជាមាន ៥ រឿង។ ភាពយន្តខ្នាតខ្លីទាំង ៥ រឿងរបស់កម្ពុជានោះរួមមានរឿង "A Fistful of Pebbles”, “Colourful Knots”, “The Scavenger”, “Buble” និង "The Ride”។ សម្រាប់រឿងនេះ ភាពយន្តណាដែលទទួលបានសំឡេងបោះឆ្នោតគាំទ្រច្រើនជាងគេពីមហាជននឹងក្លាយជាជយលាភី។

ដោយឡែក មុននេះផលិតករភាពយន្តខ្នាតខ្លីកម្ពុជាពីររូបគឺ យុវជនលី ប៉ូឡែន និង ចាប សំចាន់រិទ្ធ បានឈ្នះជយលាភីលេខ១ និងលេខ៣ ពីមហោស្រពភាពយន្ត Tropfest South East Asia (SEA) ពីការកាត់ក្ដីរបស់គណៈកម្មការជំនាញដែលជាពានធំនៃកម្មវិធី៕

http://youtu.be/iN_sFeuCRgs

អាន៖ Huang Xiaoming ប្ដឹងមន្ទីរពេទ្យដែលយករូបថតស្រាតខ្លួនប្រើខុសច្បាប់

អត្ថបទ៖ សីហា