តារាខ្មែរ ៦ នាក់ គ្រោងចេញទៅច្រៀងនៅអាមេរិក

2015-02-20 17:25:47
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង និង កំប្លែងចំនួន ៦ រូប រួមមាន នាយ ប្លាកទិន នាយក្រិន អ្នកនាង ប្រិមប្រិយ អ្នកនាង យ៉ុង ចន្ទ័សុធារី អ្នកនាង អៀង ម៉ាឡា និង លោក ប្រាក់ អរុណ គ្រោងនឹងចេញទៅច្រៀង លើទឹកដីសហរដ្ឋអាមេរិក នៅរដូវចូលឆ្នាំប្រពៃណីខ្មែរខាងមុខនេះ។ នេះបើតាមការឲ្យដឹងពី លោក ជាង លីម ប្រធានក្រុមហ៊ុន Khmer Entertainment of America,Inc ដែលជាអ្នកធានា តារាចម្រៀងទាំង ៦ ខាងលើចេញទៅ។

លោក ជាង លីម បានប្រាប់ Sabay តាមរយៈទូរសព្ទកាលពីម្សិលមិញថា មូលហេតុដែលនាំឲ្យក្រុមហ៊ុនរបស់លោក សម្រេចយកតារាចម្រៀង និង កំប្លែងទាំង ៦ នាក់ ខាងលើ ក៏ព្រោះតែក្រុមហ៊ុនរបស់លោកបានពិនិត្យឃើញថា អ្នកទាំង ៦ នាក់នេះ កំពុងតែមានប្រជាប្រិយភាពខ្លាំង សម្រាប់បងប្អូនខ្មែររស់នៅលើទឹកដីអាមេរិក ដោយពួកគាត់ចង់ឃើញអ្នកទាំង ៦ នាក់នេះ ទៅច្រៀងឲ្យស្ដាប់ខ្លាំងណាស់។

លោកបានបន្តថា តាមគម្រោងក្រុមហ៊ុនរបស់លោកគ្រោងធានាអ្នកទាំង ៦ នាក់នេះ ចេញទៅនៅ អំឡុងចុងខែ មិនា ឬ ដើមខែ មេសា ខាងមុខនេះ ដើម្បីច្រៀងរដូវចូលឆ្នាំខ្មែរ ដោយមានរយៈពេលពី ៣ ទៅ ៦ ខែ ទៅតាមសន្ទុះនៃការគាំទ្រ របស់ពួកគេ។

ប្រធានក្រុមហ៊ុនរូបនេះ មិនបានប្រាប់ពីតម្លៃខ្លួនតែតារាចម្រៀងនីមួយៗទទួលបានឡើយ ដោយលោកសូមរក្សាសិទ្ធិមិននិយាយ។ បច្ចុប្បន្នឯកសារគ្រប់បែបយ៉ាង មេធាវីរៀបចំដាក់ចូលស្ថានទូតហើយ រង់ចាំតែថ្ងៃចូលសម្ភាសន៍ប៉ុណ្ណោះ។

តាមការបញ្ជាក់ពី លោក ជាង លីម បច្ចុប្បន្នលោកបានឲ្យតារាចម្រៀងទាំង ៦ នាក់ខាងលើ ហាត់សមឲ្យបានច្រើនមុននឹងចេញទៅ នៅបទរាំវង្ស រាំក្បាច់ សារ៉ាវ៉ាន់ ជាដើម ដើម្បីច្រៀង បម្រើអារម្មណ៍បងប្អូនខ្មែរនៅទីនោះ ។

ចំពោះថា តើអាចចេញទៅបានដូចបំណងឬយ៉ាងណា? លោក ជាង លីម មិនមានការបារម្ភឡើយ ដោយលោកបានលើកឡើងថា ក្រុមហ៊ុន Khmer Entertainment of America,Inc ដែលបង្កើតឡើងតាំងពីឆ្នាំ ២០០៥ មក ធ្លាប់បានធានាតារាចម្រៀងទៅច្រៀងនៅសហរដ្ឋអាមេរិកច្រើនលើកណាស់ មិនដែលមានបញ្ហាឡើយ។ លោកបានរៀបរាប់ឲ្យដឹងថា តារាចម្រៀងដែលធ្លាប់ធានាទៅច្រៀងកន្លងទៅ មានដូចជា លោក ឆន សុវណ្ណារាជ កញ្ញា សុគន្ធ និសា អ្នកនាង ឈួន សុវណ្ណឆៃ អ្នកនាង ឈួន ស្រីម៉ៅ អ្នកនាងទូច ស្រី លក្ខណ ជាដើម។

ជាង លីម បានអះអាងជាចុងក្រោយដោយសង្ឃឹមយ៉ាងមុតមាំថា តារាទាំង ៦ នាក់ ខាងលើ ច្បាស់ជាបានចេញទៅឆាប់ៗនេះ តាមការគ្រោងទុក ជាក់ជាមិនខាន ព្រោះបងប្អូនខ្មែរនៅអាមេរិកកំពុងតែទន្ទឹងរង់ចាំ ។