ឆន សុវណ្ណរាជ ថាការសេងហាងកាត់ដេរ មិនពាក់ព័ន្ធជនឆបោកទេ

2015-02-20 17:35:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆន សុវណ្ណរាជ និយាយថា ការសេងហាងកាត់សំលៀកបំពាក់ស្ថិតនៅផ្លូវឧកញ៉ា ទេពផន មិនជាប់ពាក់ព័ន្ធនឹងជនសង្ស័យម្នាក់យកឈ្មោះរបស់លោក ឆបោកទូរសព្ទ ពីហាង រ៉ាយុទ្ធឡើយ គឺមកពីផុតកុងត្រា។

តារាចម្រៀងល្បីឈ្មោះរបស់ផលិតកម្ម រស្មីហង្សមាស ឆន សុវណ្ណរាជ ប្រាប់ថា៖ "ហាង ឆន សុវណ្ណរាជ កាត់ដេរហ្នឹង ខ្ញុំសេងឱ្យមេជាងរបស់ខ្ញុំជាង ៤ ខែ មកហើយ។ ការសេងនេះ មិនពាក់ព័ន្ធ រឿងគេយកឈ្មោះខ្ញុំទៅបោកប្រាស់ទិញទូរសព្ទពី ហាង រ៉ាយុទ្ធ កាលពីប៉ុន្មានថ្ងៃនេះទេ"។

លោកបានបន្តថា ការសម្រេចចិត្ត សេងហាងកាត់ដេរឱ្យមេជាងរបស់ខ្លួន គឺមកពីកុងត្រាជួលផ្ទះរយៈពេលជាង ៤ ឆ្នាំ ត្រូវផុតកំណត់។ ម្យ៉ាងទៀតដោយសារតែការងារក្នុងសិល្បៈរវល់ខ្លាំងពេកមិនមានពេលគ្រប់គ្រាន់មើលការខុសត្រូវ ក៏ដូចជាបងស្រីរបស់ខ្លួនចេញទៅរស់នៅក្រៅប្រទេសដូច្នេះហើយ ទើបលោកសម្រេចចិត្តសេងហាងនេះតែម្ដង។

ទោះជាយ៉ាងណាក៏ដោយ ឆន សុវណ្ណរាជ អះអាងថា ហាងកាត់ដេរស្ថិតនៅបណ្ដោយផ្លូវ ឧកញ៉ា ទេពផន នៅតែបន្តប្រើឈ្មោះរបស់ខ្លួនដដែល មិនទាន់ទម្លាក់ចេញទេ។ នេះដោយសារតែមេជាងដែលជាអ្នកសេងហាងស្នើសុំដាក់បន្ត ដោយមិនទាន់ធ្វើឈ្មោះថ្មីរួចរាល់។

ឆន សុវណ្ណរាជ ចូលរួមប្រគំតន្ត្រីសិល្បៈកាលពីពេលថ្មីៗកន្លងទៅ

ដោយឡែកពាក់ព័ន្ធនឹងរឿងគេយកឈ្មោះរបស់ខ្លួនទៅប្រើដើម្បីបោកប្រាស់អ្នកដទៃ Coach របស់កម្មវិធី The Voice Cambodia លើកឡើងថា លោកមិនបានដឹងរឿងអ្វីឡើយ។

លោកបញ្ជាក់ដូច្នេះថា៖ "ឈ្មោះ សំណាង ជាអ្នកឆបោកទូរសព្ទពីហាង រ៉ាយុទ្ធ ហ្នឹងជាអ្នកស្គាល់គ្នាធម្មតាទេ ព្រោះបងស្រីរបស់គាត់ធ្លាប់ចូលហ៊ុនជាមួយខ្ញុំ តែពេលនេះលែងមានអ្វីពាក់ព័ន្ធនឹងគ្នាទៀតហើយ។ ខ្ញុំមិននឹកស្មានគេយកឈ្មោះខ្ញុំទៅប្រើដើម្បីឆបោកគេដូច្នេះសោះ ទើបតែម្ចាស់ហាង call មក បានខ្ញុំដឹង"។

តារាចម្រៀងល្បីឈ្មោះមានប្រភពចេញពីខេត្ត កំពង់ស្ពឺ រូបនេះ ស្នើឱ្យមហាជនមានការប្រុងប្រយ័ត្នចំពោះជនឆបោកមួយចំនួនចូលចិត្តយកឈ្មោះតារាចម្រៀង ឬអ្នកមានមុខមាត់ក្នុងសង្គមយកទៅប្រើប្រាស់ដើម្បីប្រយោជន៍ផ្ទាល់ខ្លួន។ លោកនិយាយថា ប្រសិនបើមានបញ្ហាដូច្នេះកើតឡើង ត្រូវចេះ call សួរនាំម្ចាស់ដើម ឬគួរកុំទុកចិត្តមុននឹងជឿជាក់លើនរណាម្នាក់ដែលយកឈ្មោះអ្នកដទៃទៅប្រើប្រាស់។

ពាក់ព័ន្ធនឹងរឿងឆបោកទូរសព្ទ iPhone 6 និង Samsung Galaxy Note មានតម្លៃជាង ១២០០ ដុល្លារ ដែលឈ្មោះសំណាង បានយកឈ្មោះ ឆន សុវណ្ណរាជ ទៅប្រើប្រាស់នោះ លោក គង់ សុខឡេង ត្រូវជាបងប្រុសម្ចាស់ហាងលក់ទូរសព្ទ រ៉ាយុទ្ធ ប្រាប់ថា ជនឆបោករូបនេះ បានមកទិញទូរសព្ទពីហាងប្អូនប្រុសរបស់ខ្លួន ដោយនិយាយថា ជំពាក់សិន ហើយចាំទៅយកលុយនៅហាង ឆន សុវណ្ណរាជកាត់ដេរ ស្ថិតនៅតាមបណ្ដោយផ្លូវ ឧកញ៉ា ទេពផន ព្រោះគេជាអ្នកមានភាគហ៊ុនក្នុងហាងជាមួយតារាចម្រៀងខាងលើ។

លោកប្រាប់បន្តថា ប្អូនប្រុសរបស់ខ្លួនក៏ទុកចិត្តនៅពេលលឺឈ្មោះ ឆន សុវណ្ណរាជ ព្រោះធ្លាប់ស្គាល់គ្នាពីមុនមក ហើយក៏ព្រមធ្វើដំណើរទៅជាមួយជនឆបោកដល់ហាងកាត់សំលៀកបំពាក់ខាងលើ។ ជនសង្ស័យរូបនេះ បានប្រាប់ឱ្យអ្នកចាំយកលុយរងចាំខាងក្រៅ គេទៅក្នុងហាងដើម្បីយកលុយមកឱ្យ។

ក៏ប៉ុន្តែរង់ចាំមួយទៅពីរម៉ោងមិនឃើញចេញមកក្រៅអ្នកទៅយកលុយក៏ចូលទៅក្នុងហាងដើម្បីសួរនាំ តែត្រូវកូនជាងម្ចាស់ប្រាប់ បុរសឈ្មោះ សំណាង ចេញផ្លូវក្រោយបាត់ទៅហើយ។ ប្អូនប្រុសរបស់លោកក៏ call សួរ ឆន សុវណ្ណរាជ ទើបដឹងថា ជននេះធ្លាប់បោកប្រាស់គេច្រើនមកហើយ។

ជនជាប់សង្ស័យឈ្មោះ សំណាង មិនអាចទាក់ទងធ្វើការអត្ថាធិប្បាយបានទេ ក៏ប៉ុន្តែ លោក គង់ សុខឡេង អះអាងថា លោកបានដាក់ពាក្យបណ្ដឹងរួចរាល់អស់ហើយ។

ឆន សុវណ្ណរាជ នៅមិនទាន់រកទីតាំងដើម្បីបើកហាងកាត់សំលៀកបំពាក់ឡើងវិញបាននៅឡើយទេ ក្រោយហាងកាត់ដេររបស់លោកផុតកុងត្រា។ លោក ឆន សុវណ្ណរាជ តារាចម្រៀងមកពីផលិតកម្មហង្សមាស គឺជា Coach នៅក្នុងកម្មវិធិ The Voice Cambodia ហើយកូនក្រុមរបស់លោក គឺ ប៊ុត សីហា បានក្លាយជាជយលាភីនៅក្នុងកម្មវិធិនេះ៕

អានអត្ថបទបន្ត៖ អ្នកដឹកនាំរឿង ដែលមានប្រវត្តិហុតទឹកគុយទាវសល់ពីគេ

អានអត្ថបទបន្ត៖ នេះនែ!…៥ សន្លឹក ដៃខាងស្ដាំ ឆាយ វីរៈយុទ្ធ ពិតជាប្លែកក្នុងឆ្នាំ ២០១៥

អានអត្ថបទបន្ត៖ ថ្មីទៀត…! ពីតារាល្បីៗខ្មែរជាប់ខ្សែចិន