Diamond Music ត្រៀមចេញ៣អាល់ប៊ុម សង្ឃឹមពង្រីកទីផ្សារក្នុងរដូវចូលឆ្នាំ

2015-02-24 18:08:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម Diamond Music កំពុងត្រៀមពង្រីកទីផ្សារបន្ថែមទៀតនៅរដូវចូលឆ្នាំខាងមុខនេះ ដោយចរាចរបទចម្រៀងចំនួន៣អាល់ប៊ុមរួមមានចង្វាក់ប្រពៃណី និងចង្វាក់ញាក់កន្ត្រាក់អារម្មណ៍ជាដើម ។ នេះបើយោងតាមអ្នកគ្រប់គ្រងតារាចម្រៀង និងជាអ្នកនិពន្ធក្នុងផលិតកម្មលោក មុំ មុនីរិទ្ធ។

អ្នកគ្រប់គ្រងខាងលើប្រាប់ Sabayថា៖“កុំឱ្យគេថា ស្ងាត់ស្ងៀមពេក គេចេញបទចូលឆ្នាំ យើងត្រូវតែចេញហ្នឹងគេអញ្ចឹងហើយ"។ មុំ មុនីរិទ្ធ បានបន្តទៀតថា ការសម្រេចចិត្តរបស់គណៈគ្រប់គ្រងបែបនេះ ក៏ជាឆ្លើយតាមសំណូមពរពីអ្នកគាំទ្រនាពេលកន្លងមកផងដែរ ដែលពូកគេចង់ឃើញស្នាដៃចង្វាក់ប្រពៃណីលើកដំបូងក្នុងផលិតកម្មDiamond Music។

យ៉ាងណាក៏ដោយ ក្នុងនាមជាផលិតករផងនោះ មុនីរិទ្ធ បានបន្ថែមថា ក្រុមការងារកំពុងដំណើរថតនៅឡើយ។ តាមការរំពឹងទុក នឹងអាចចេញលក់ជាCDនៅដើមខែមីនា ខាងមុខ និងចេញលក់ជាVCDនៅចុងខែដដែល ធ្វើយ៉ាងណាបានមុនពេលចូលឆ្នាំថ្មីមកដល់។ ផលិតកររូបនេះ និយាយថា ប្រសិនបើមានការយឺតយ៉ាវ អាចមានផលប៉ះពាល់ដល់អ្នកគាំទ្រ និងផលិតកម្ម ព្រមទាំងតារាចម្រៀងផងដែរ។

មុនីរិទ្ធ បានបញ្ជាក់ថា៖“អឺ!...ខ្ញុំជឿជាក់ថា បទចម្រៀងថ្មីទាំងអស់នោះ គឺ១០០% ច្បាស់ជាប្លែកភ្នែកទស្សនិកជនមិនខាន ព្រោះមានការយកចិត្តទុកដាក់"។

ជាមួយគ្នានោះលោកចាប់អារម្មណ៍ឃើញថា ទោះបីមិនទាន់បានទទួលជោគជ័យធំធេងយ៉ាងណាក្ដី ប៉ុន្តែផលិតកម្មDiamond Music កំពុងមានការបោះជំហានទៅមុខបណ្ដើរៗហើយ បន្ទាប់ពីចាប់ដំណើរការនៅអំឡុងដើមឆ្នាំ២០១២។ ដោយឡែកសន្ទុះនៃការរីកចម្រើនខ្លាំង គឺចាប់តាំងពីឆ្នាំ២០១៤រហូតមកដល់ពេលនេះ ដោយមានតារាចម្រៀងចំនួន៩នាក់ កំពុងរស់នៅក្រោមដំបូលផលិតកម្ម ដែលភាគច្រើនមានប្រភពចេញផលិតកម្មផ្សេងៗ។

ទោះបីជាយ៉ាងណា ដើម្បីឆ្លើយតបទៅនឹងការគាំទ្រ លោកបានអះអាងថា នឹងព្យាយាមបន្តស្វែងរកអ្វីដែលថ្មីសម្រាប់ទស្សនិកជនទាំងឡាយ ដែលមានភក្ដីភាពចំពោះផលិតកម្មតាំងពីដំបូងរហូតមកដល់បច្ចុប្បន្ន៕

ខាងក្រោមជាសកម្មភាពថតMVចូលឆ្នាំ