អ្នកជំនាញ៖ MH370 ត្រូវរុស្ស៊ីប្លន់យកទៅលាក់ទុកនៅប្រទេសកាហ្សាក់ស្ថាន

2015-02-25 18:43:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងហោះហើរ MH370 បានបាត់ខ្លួនយ៉ាងអាថ៌កំបាំងអស់រយៈពេលជិតមួយឆ្នាំហើយ។ រហូតមកទល់ពេលនេះ ដំណឹងទាក់ទងយន្តហោះដឹកអ្នកដំណើរឆ្ពោះទៅរដ្ឋធានីប៉េកាំង ប្រទេសចិន នៅតែស្ងាត់ឈឹងសូន្យគ្មានតម្រុយសូម្បីបន្តិច បើទោះមានការរុករកឥតស្រាកស្រាន្តដូចភ្លៀងរលឹមក៏ដោយ។ ក្រោយមានការប្រកាសជាផ្លូវការពីមន្ត្រីរដ្ឋាភិបាលម៉ាឡេស៊ី ថាជើងហោះហើរនេះជួបគ្រោះថ្នាក់សម្លាប់ជីវិតមនុស្សទាំងអស់ អ្នកជំនាញនានាបានលើកឡើងពីទ្រឹស្ដីមួយចំនួនជាបន្តបន្ទាប់។

ជើងហោះហើរ MH370 របស់ក្រុមហ៊ុនអាកាសចរណ៍ម៉ាឡេស៊ី ត្រូវប្លន់តាមការបញ្ជារបស់លោក Vladimir Putin ដែលជាប្រធានាធិបតីរបស់ប្រទេសរុស្ស៊ី។ នេះបើតាមការអះអាងរបស់អ្នកជំនាញ នៅក្នុងទ្រឹស្ដីដ៏ថ្មីសន្លាងមួយ។ លោក Jeff Wise ជាអ្នកនិពន្ធផ្នែកវិទ្យាសាស្ត្រ ដែលមានការងារស្នូលទាក់ទងនឹងប្រភេទយន្តហោះ Boeing 777-200E នៅសារព័ត៌មាន CNN បានបញ្ចេញទ្រឹស្ដីប្លែកពីគេមួយថា ជើងហោះហើរ MH370 បានបន្តហោះហើរអស់រយៈពេល ៧ម៉ោងទៀត ក្រោយពេលបាត់ការទាក់ទង។ លោកហ៊ានអះអាងបែបនេះ ដោយយោងតាមកំណត់ត្រារបស់ក្រុមហ៊ុនទូរគមនាគមន៍អង់គ្លេស Inmarsat។

លោក Jeff Wise

លោក Wise ជឿជាក់ថា ឧក្រិដ្ឋជនដែលប្លន់យន្តហោះ បានបង្វែងដានប្ដូរទិន្នន័យហោះហើរ ដើម្បីឲ្យគេយល់ច្រឡំថា យន្តហោះហោះទៅទិសដៅផ្សេង ប៉ុន្តែតាមពិតវាបានហោះទៅតំបន់ Baikonur Cosmodrome ដែលរុស្ស៊ីជួលពីប្រទេសកាហ្សាក់ស្ថាន។ ទោះបែបនេះក្ដី លោក Wise បានបញ្ជាក់តាមរយៈទស្សនាវដ្ដី New York Magazine ថា មិនដឹងហេតុអ្វីបានជាលោក Vladimir Putin លួចយកយន្តហោះដឹកអ្នកដំណើរដ៏ច្រើននោះទេ ហើយគំនិតនោះគឺជារឿងឆ្កួតលីលាបំផុត។

ការអះអាងរបស់អ្នកជំនាញខាងលើនេះ មានភាពស្របគ្នាទៅនឹងការអះអាងរបស់លោក Malcolm Brenner ដែលជាអ្នកជំនាញឈានមុខគេម្នាក់ក្នុងការស៊ើបអង្កេតមូលហេតុនៃគ្រោះ មហន្តរាយផ្លូវអាកាស។ ភាពស្របគ្នាត្រង់ថា យន្តហោះនេះនៅបន្តហោះហើរជាច្រើនម៉ោងទៀតក្រោយបាត់ការទាក់ទង ហើយគ្រោះថ្នាក់នេះកើតឡើងដោយចេតនាមនុស្ស មិនមែនបង្កឡើងដោយធម្មជាតិឡើយ។ យ៉ាងណាមិញ ការវិភាគទាំងពីរមានលក្ខណៈផ្ទុយគ្នាត្រង់ លោក Malcolm Brenner យល់ថាយន្តហោះបើកតម្រង់ទៅទ្វីបអង់តាកទិច ចំណែកឯលោក Jeff Wise លើកឡើងថាយន្តហោះបានបើកយកទៅលាក់ទុកនៅក្នុងប្រទេសកាហ្សាក់ស្ថាន ជាប់ព្រំដែនប្រទេសរុស្ស៊ី។

ប្រធានាធិបតីរុស្ស៊ី Vladimir Putin

នៅចាំបានថាក្រោយការបាត់ខ្លួនជើងហោះហើរ MH370 កាសែត Moskovsky Komsomolets របស់ប្រទេសរុស្ស៊ីផ្ទាល់ ធ្លាប់បានបង្ហាញតម្រុយថា យន្តហោះដឹកអ្នកដំណើរ Boeing 777 ត្រូវគេប្លន់ រួចបញ្ជាទៅលាក់ទុកនៅភូមិតូចមួយ ក្នុងប្រទេសអាហ្វហ្គានីស្ថាន។ ប្រភពដដែលបានបញ្ជាក់ទៀតថា អាកាសយានិកមិនមែនជាអ្នកនៅពីក្រោយគ្រោះថ្នាក់នេះទេ គឺយន្តហោះត្រូវប្លន់ដោយក្រុមភេរវជនមិនស្គាល់អត្តសញ្ញាណ។

ជើងហោះហើររបស់ម៉ាឡេស៊ី ព្រមទាំងមនុស្ស ២៣៩នាក់ អាចស្ថិតនៅក្នុងប្រទេសអាហ្វហ្គានីស្ថាន មិនឆ្ងាយប៉ុន្មានពីខេត្តកាន់ដាហា ជិតព្រំដែនប្រទេសប៉ាគីស្ថាន។ លើសពីនេះ គេថែមទាំងបង្ហើបទៀតថា មនុស្សទាំងអស់នៅលើយន្តហោះ ត្រូវគេបែងចែកជាក្រុម រស់នៅតំបន់ដាច់ស្រយាលស្ទើរតែគ្មានអាហារទទួលទាន។

ទោះយ៉ាងនេះក្ដី កន្លងទៅអស់ជិតមួយឆ្នាំហើយ ប្រសិនបើយន្តហោះត្រូវគេប្លន់ ហើយមនុស្សទាំងអស់នៅរស់មែននោះ គួរណាស់តែមានបែកធ្លាយដំណឹងខ្លះ។ រហូតមកទល់ពេលនេះ ទ្រឹស្ដីនានារបស់អ្នកជំនាញបានលើកឡើងជាបន្តបន្ទាប់ ខណៈក្រុមអ្នកស្រាវជ្រាវចម្រុះជាតិសាសន៍ បញ្ចេញបេសកកម្មរុករកធំបំផុតមិនធ្លាប់មាន នៅតែមិនអាចប្រទះដាននៃយន្តហោះដឹកមនុស្សសរុប ២៣៩នាក់នោះនៅឡើយ៕

ចុចអានព័ត៌មានជាច្រើនទៀតទាក់ទងនឹងគ្រោះថ្នាក់ MH370

ដោយ៖ គង់ វិសាល ប្រភព៖ dailymail