សមាជិក Baby KARA ធ្វើអត្តឃាត

2015-02-26 16:38:31
ចំនួនមតិ 0 | ចំនួនចែករំលែក 0

ចន្លោះមិនឃើញ

សមាជិកក្រុម Baby KARA គឺ Sojin បានស្លាប់កាលពីថ្ងៃទី ២៤ កន្លងទៅ ហើយប៉ូលិសបានសន្និដ្ឋានថា នោះជាការធ្វើអត្តឃាត។

តារាហាត់សម្ដែងរបស់ផលិតកម្ម DSP Media ម្នាក់នេះត្រូវបានគេប្រទះឃើញបាត់បង់ស្មារតីក្នុងសួនច្បារនា Apartment របស់នាងក្នុងសង្កាត់ Daejeon ខណ្ឌ Daedeok-gu ហើយភ្លាមៗត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះ តែអ្វីៗបានហួសអស់ទៅហើយ។

អ្នកនាំពាក្យស្ថានីយប៉ូលិសខណ្ឌ Daeduk និយាយថា នោះជាករណីអត្តឃាត ព្រោះប៉ូលិសមិនបានរកឃើញភស្តុតាងណាមួយពាក់ព័ន្ធនឹងការសង្ស័យផ្សេងទៀតឡើយ។

ដំណាលគ្នានោះ ផលិតកម្ម DSP Media បានចេញសេចក្ដីថ្លែងការណ៍រំលែកទុក្ខមួយដែរដោយបញ្ជាក់ដូច្នេះ៖ "យើងបានទទួលដំណឹងដ៏ក្រៀមក្រំភ្លាមៗនៅថ្ងៃនេះ។ វាជារឿងដ៏អកុសល។ យើងនឹងធ្វើគ្រប់យ៉ាងតាមដែលអាចធ្វើទៅបានដើម្បីជួយគ្រួសារនាង"។ ខាងផលិតកម្មដែលជាទ្រនំក្រុមចម្រៀង KARA ក៏បានបញ្ជាក់ឲ្យដឹងទៀតថា ខាងផលិតកម្មបានរំលាយកុងត្រាជាមួយ Sojin កាលពីមួយខែមុន ដែលនេះមានន័យថា នាងនឹងមិនបង្ហាញខ្លួនក្នុងក្រុមចម្រៀងថ្មីឈ្មោះ April របស់ផលិតកម្មឡើយ ហើយវាក៏អាចជាមូលហេតុនៃការធ្វើអត្តឃាតរបស់នាងដែរ។

Sojin បានចូលហ្វឹកហាត់ជាអ្នកហ្វឹកហាត់ក្នុងផលិតកម្ម និងជាតារាលេចធ្លោម្នាក់ក្នុងកម្មវិធី "KARA Projects” របស់ទូរទស្សន៍ MBC Music។ ក្រោយកម្មវិធីខាងលើបានបញ្ចប់នាងបានត្រឡប់មករស់នៅផ្ទះរបស់នាង រហូតមានដំណឹងអកុសលខាងលើតែម្ដង។

មើលការសម្ដែងរបស់ Sojin កាលនៅរស់៖

http://youtu.be/bPs92RCb6wo

ប្រភព៖ sbs