វ៉េត រតនា មកលេងស្រុកសោះ ថតបាន ៣ ផលិតកម្មនឹងគេដែរ!

2015-02-27 12:11:18
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រាន់តែមកលេងស្រុកកំណើតមួយរយៈខ្លី តារាសម្ដែង វ៉េត រតនា ឆ្លៀតទៅចូលរួមថត MV បទចូលឆ្នាំបាន ៣ ផលិតកម្មនឹងគេដែរ ព្រមទាំងមានការលើកទឹកចិត្តពីស្វាមីទៀតផង ទោះបីជាពួកគេមានទ្រព្យសម្បត្តិស្ដុកស្ដម្ភយ៉ាងណាក្ដី។

តារាស្រីញញឹមស្រស់រូបនេះ និយាយថា៖ " មានសិល្បៈទើបមានថ្ងៃនេះ។ អញ្ចឹងទោះបីជាទៅដល់ទីណាក៏មិនអាចបំភ្លេចបានដែរ មានឱកាសនឹងចូលរួមមិនខាន"។ វ៉េត រតនា បន្ថែមទៀតថា កន្លងមកបានចូលរួមថត MV ឱ្យផលិតកម្មរៃមាស, សាន់ដេ ជាដើម។ ដោយឡែកផលិតកម្មថោន ទើបថតបញ្ចប់កាលពីយប់ម្សិលមិញ នៅភូមិវប្បធម៌ ខេត្តសៀមរាប។

រតនា បន្តទៀតថា នេះក៏ជាការរំលឹកអនុស្សាវរីយ៍មួយដែរ កាលនៅសិល្បៈ ហើយក៏ចង់ឱ្យទស្សនិកជនបានឃើញម្ដងទៀត ក្នុងរដូវកាលចូលឆ្នាំខ្មែរខាងមុខ។ ដូច្នេះទើបមិនសូវបដិសេធរាល់ការអញ្ជើញពីផលិតកម្មនានាឡើយ។ ប្រាក់ចំណូលពីការថត មិនមែនជារឿងសំខាន់សម្រាប់តារារូបនេះឡើយ។ រតនា និយាយ។

វ៉េត រតនា និយាយថា អ្វីដែលសំខាន់សម្រាប់ដំណើរលើកនេះ គឺបានឃើញស្នាមញញឹមរាក់ទាក់ពីអតីតអ្នករួមអាជីពសិល្បៈ និងសិល្បករជំនាន់ក្រោយ ព្រមទាំងទស្សនិកជននានាទៅវិញ។ ហេតុផលទាំងនេះ ធ្វើឱ្យថៅកែសណ្ឋាគារ និង ជាភរិយាអាណិកជនខ្មែរអាមេរិក បានសម្រេចចិត្តបន្តការស្នាក់នៅប្រទេសកំណើតរហូត ៣ ខែ ដោយឱ្យបងថ្លៃជាអ្នកមើលការខុសត្រូវហាងនៅអាមេរិក។

ទោះបីជាយ៉ាងណា ថៅកែស្រីរូបនេះ បានបញ្ជាក់ចុងក្រោយថា ត្រូវត្រឡប់ទៅកាន់សហរដ្ឋអាមេរិកវិញ នៅចុងខែ មីនា ខាងមុខនេះ។ ប្រសិនបើមានឱកាសនោះ អតីតតារារូបនេះ នឹងត្រឡប់មកប្រទេសកំណើតម្ដងទៀតនៅឆ្នាំក្រោយ៕

អានអត្ថបទ៖ “ល្បុក្កតោចម្លែក” ខ្សែភាពយន្តប្រជុំដោយកំពូលអ្នកប្រដាល់ខ្មែរ

អានអត្ថបទ៖ តារាជាច្រើនចូលរួមថត MV ឱ្យផលិតកម្ម Town ម្សិលមិញ

អត្ថបទ៖ សំ ជំនាញ