បញ្ហាកង្វះឈាមបានឈានដល់ចំណុចប្រកាសអាសន្នហើយ!

2015-02-26 22:58:55
ចំនួនមតិ 0 | ចំនួនចែករំលែក 0

ចន្លោះមិនឃើញ

បញ្ហាកង្វះឈាមបានឈានដល់ចំណុចប្រកាសអាសន្ន ជាពិសេសប្រភេទឈាម A+ និង O+ ដែលកំពុងត្រូវការចាំបាច់ ដើម្បីជួយសង្គ្រោះអាយុជីវិតមនុស្ស។ មជ្ឈមណ្ឌលជាតិផ្តល់ឈាមបានជូនដំណឹងខ្លីមួយនៅថ្ងៃនេះ ទាក់ទងបញ្ហាខាងលើ និងអំពាវនាវ ទៅសាធារណៈជន មេត្តាចូលរួមបរិច្ចាគឈាមដើម្បីជួយបំពេញភាពខ្វះខាត។

កញ្ញា អ៊ូ បាណុង មន្ត្រីទំនាក់ទំនងសាធារណៈនៃមជ្ឈមណ្ឌលជាតិផ្តល់ឈាមបានប្រាប់ Sabay ថា នេះគឺជាបញ្ហាប្រឈមធ្ងន់ធ្ងរលើកទី១ សម្រាប់ឆ្នាំ២០១៥ នេះ ជាពិសេសប្រភេទឈាម A+ និង O+។ មជ្ឈមណ្ឌលជាតិផ្តល់ឈាមកំពុងខ្វះ លទ្ធភាពជួយដល់អាយុជីវិតមនុស្ស ដែលក្នុងនោះមានអ្នករងគ្រោះថ្នាក់ចរាចរណ៍ ព្រមទាំងបញ្ហាផ្សេងៗ។

កញ្ញាបានបន្ថែមថា មូលហេតុខ្វះឈាមនេះ អាចដោយសារការឈប់សម្រាកបុណ្យយូរ(ចូលឆ្នាំចិន)ពុំសូវមានអ្នកមកបរិច្ចាគឈាមច្រើន ប៉ុន្តែតម្រូវការឈាមបែរជាកើនឡើង។ " ឆ្នាំ២០១៤ យើងអត់មានបញ្ហាខ្វះដូចនេះទេ ប៉ុន្តែឆ្នាំ២០១៥ ស្រាប់តែកើតមាន។ ពេលដាច់ស្តុកបែបនេះ អាចកើតមានបញ្ហាច្រើនណាស់ មានជាអាទិ៍ ការទិញលក់ឈាម ក៏ដូចជាសុវត្ថិភាពឈាមជាដើម។ អ្នកផ្តល់ឈាម១០ នាក់ មានប្រភេទឈាមខាងលើយ៉ាងហោច៤ នាក់ ”។

ក្នុងមួយឆ្នាំកម្ពុជាត្រូវការឈាមជាក់ស្តែង ១៥ ម៉ឺនផ្លោក ប៉ុន្តែនៅក្នុងស្តុកមានឈាមត្រឹម៣៦% ប៉ុណ្ណោះ នៃតម្រូវការជាក់ស្តែង។ ដូច្នេះបើសាធារណៈជនចង់ចូលរួមបរិច្ចាគឈាមសូមទាក់ទងនៅ មជ្ឈមណ្ឌលជាតិ ដែលមានទីតាំងនៅក្នុងបរិវេណមន្ទីរពេទ្យព្រះអង្គឌួងក្បែរវត្តភ្នំ។ សូមទំនាក់ទំនងមកកាន់លេខ 011 789 742៕