កូន​ស្រី​របស់​កំពូល​តារា​ក្បាច់​គុន​ហុងកុង Bruce Lee (លីស៊ាវឡុង) ឈ្មោះ Shannon Lee នឹង​ផលិត​ខ្សែ​ភាពយន្ត​អំពី​ជីវប្រវត្តិ​ឪពុក​របស់​ខ្លួន ដែល​នេះ​នឹង​ជា​ភាពយន្ត​ដំបូង​អំពី​តារា​ក្បាច់​គុន​រូប​នេះ ដោយមាន​ការ​ចូលរួម​​ផលិត​ពេញលេញ​​ពី​ក្រុម​គ្រួសារ​របស់​លោក។

សារព័ត៌មាន Variety បាន​ចុះ​ផ្សាយ​កាល​ពី​ម្សិលមិញ​ថា ក្រុមហ៊ុន​របស់ Lee ដែល​មាន​ឈ្មោះ Bruce Lee Entertainment បាន​សហការ​ជាមួយ​ផលិតករ​ភាពយន្ត Lawrence Grey និង Janet Yang ដើម្បី​ផលិត​ខ្សែ​ភាពយន្ត​នេះ។

Shannon Lee និយាយ​ថា "ធ្លាប់​មាន​គម្រោង​ជា​ច្រើន​ពាក់ព័ន្ធ​នឹង​ការ​ផលិត​ភាពយន្ត​ពី​លោក​ប៉ា​ខ្ញុំ ប៉ុន្តែ​ពួក​គេ​មិន​បាន​យល់​ច្បាស់​ពី​ទស្សនវិជ្ជា និង​ជំនាញ​សិល្បៈ​របស់​គាត់​ទេ។ វិធី​តែ​មួយ​គត់​ដែល​អាច​ឲ្យ​ទស្សនិកជន​យល់​ច្បាស់​ពី​ចំណុច​ពិសេស​នៃ​លោក​ប៉ា​​ខ្ញុំ គឺ​ពួក​យើង​ត្រូវ​បង្កើត​វា​ដោយ​ខ្លួន​ឯង និង​ស្វែង​រក​ដៃ​គូ​សហការ​ដែល​មាន​ចិត្ត​ដូច​គ្នា"។​

តារា​សម្ដែង Bruce Lee បាន​ស្លាប់​កាល​ពី​ឆ្នាំ ១៩៧៣ ក្នុង​អាយុ ៣២ឆ្នាំ បន្ទាប់​ពី​ដួល​សន្លប់​អំឡុង​ពេល​បញ្ចូល​សំឡេង រឿង "Enter the Dragon” នៅ​ហុងកុង។

កូន​ស្រី​របស់​តារា​ក្បាច់​គុន​រូប​នេះ​បាន​បន្ត​ថា "មនុស្ស​ជា​ច្រើន​មិន​បាន​ដឹង​ថា​គាត់ (Bruce Lee) គឺ​ជា​អ្នក​និពន្ធ​ដ៏​មាន​ស្នាដៃ និង​ជា​អ្នក​បង្កើត​សិល្បៈ និង​ទស្សនវិជ្ជា​ផ្ទាល់​ខ្លួន​ឡើយ។ នេះ​ជា​អ្វី​ដែល​យើង​ចង់​បង្ហាញ គឺ​មិនមែន​តែ​ជំនាញ​វាយ​តប់​របស់​គាត់​ទេ គឺ​ត្រូវ​ស៊ី​ជម្រៅ​ពី​អត្តចរិត និង​ជំនឿ​របស់​គាត់​ដែរ"។ ទោះ​យ៉ាង​ណា ព័ត៌មាន​លម្អិត​ពាក់ព័ន្ធ​នឹង​ភាពយន្ត​នេះ ដូច​ជា​តួ​សម្ដែង និង​កាល​បរិច្ឆេទ​ផ្សេង​ៗ គឺ​មិន​ទាន់​បង្ហើប​ឲ្យ​ដឹង​នៅ​ឡើយ។ ​

ក្រៅ​ពី​គម្រោង​ផលិត​ភាពយន្ត​នេះ បច្ចុប្បន្ន​ក្រុមហ៊ុន Bruce Lee Entertainment ​កំពុង​តែ​ផលិត​កម្មវិធី​ទូរទស្សន៍​មួយ​​ដែល​​និយាយ​ពី​​ក្បាច់​គុន​ដើម​របស់ លីស៊ាវឡុង ដោយ​សហការ​ជាមួយ​អ្នក​ដឹកនាំ​រឿង "Fast & Furious 6” Justin Lin និង​កម្មវិធី​មួយ​ទៀត​សហការ​​ជាមួយ Keanu Reeves និង Stephen Hamel មក​ពី​ក្រុមហ៊ុន Company Films ដើម្បី​ចាក់​ផ្សាយ​នៅ​ប្រទេស​ចិន ៕

ចុច​អាន៖តារា​ស្រី​មាន​មុខ​ក្នុង​រឿង ទិនហ្វី សម្ដែង​រឿង​ថ្មី​ជាមួយ​តារា​ហូលីវូដ