គីម ជុងអ៊ុន ប្រាប់កងទ័ពឲ្យប្រុងខ្លួនធ្វើសង្គ្រាមគំរាមអាមេរិក

2015-03-02 16:33:53
ចំនួនមតិ 0 | ចំនួនចែករំលែក 0

ចន្លោះមិនឃើញ

មេដឹកនាំកូរ៉េខាងជើង គីម ជុងអ៊ុន បានប្រាប់កងទ័ពរបស់ខ្លួនឲ្យត្រៀមអាវុធធ្វើសង្គ្រាមជាមួយសហរដ្ឋអាមេរិក ដែលជាមហាអំណាចយោធាពិភពលោក។ ប្រតិកម្មមេដឹកនាំវ័យក្មេងនេះ ធ្វើឡើងជាការឆ្លើយតបទៅនឹងសមយុទ្ធទ្វេភាគីរួមគ្នារវាងសហរដ្ឋអាមេរិក និងកូរ៉េខាងត្បូង មុនពេលប្រកាសប្រតិបត្តិការសមយុទ្ធមួយទៀត ដែលនឹងចាប់ផ្ដើមនៅថ្ងៃចន្ទនេះ។

ប្រតិបត្តិការសមយុទ្ធដ៏ធំដែលមានឈ្មោះថា Foal Eagle នឹងមានការចូលរួមពីទាហានកូរ៉េខាងត្បូងប្រហែល ២០០០០០នាក់ និងកងកម្លាំងអាមេរិក ៣៧០០នាក់ផ្សេងទៀត ប្រារព្ធធ្វើឡើងទាំងនៅលើដី លើផ្ទៃទឹក និងក្នុងដែនអាកាស។ ការធ្វើសមយុទ្ធដ៏កក្រើករវាងប្រទេសទាំងពីរនេះ បានធ្វើឲ្យកូរ៉េខាងជើងនៅមិនស្រណុកខ្លួន រហូតប្រកាសឲ្យកងទ័ពប្រុងជើងការទុកជាមុន។

លោក គីម ជុងអ៊ុន បាននិយាយថា អាមេរិកមិនមែនជា "មហាអំណាចផ្ដាច់មុខ" លើអាវុធនុយក្លេអ៊ែរទេ ហើយអាមេរិកពិតជាយល់ច្រឡំធំណាស់ ប្រសិនបើគិតថាទឹកដីរបស់ខ្លួនមានសុវត្ថិភាពនោះ។ កាលពីពេលថ្មីៗនេះ កូរ៉េខាងជើងក៏បានពង្រឹងកងកម្លាំងរបស់ខ្លួនតាមរយៈលំហាត់សមយុទ្ធទាំងលើគោក ក្នុងទឹក និងលើដែនអាកាស ដែលដាក់សម្ពាធទៅលើឧបទ្វីបកូរ៉េឲ្យកាន់តែកើនកម្ដៅ។

ភ្នាក់ងារសារព័ត៌មានរដ្ឋកូរ៉េខាងជើង(KCNA) បានបង្ហាញថា កូរ៉េខាងជើងនឹងចាប់ផ្ដើមធ្វើសង្គ្រាមប្រឆាំងយ៉ាងដាច់អហង្ការជាមួយសហរដ្ឋអាមេរិក ដែលពេលនេះងាកមកជ្រើសរើសការប្រឈមមុខដាក់គ្នា។ សារព័ត៌មាននេះថែមទាំងបញ្ជាក់ទៀតថា ស្ថានភាពទូទៅនៅពេលនេះ ជាសង្គ្រាមបង្រួបបង្រួមជាតិ ហើយវាស្ថិតនៅក្នុងដៃកងទ័ពកូរ៉េខាងជើងទាំងអស់ដែលតម្រូវឲ្យក្លាយជាឆ្មាំការពារប្រទេស ត្រៀមខ្លួនឲ្យបានពេញលេញទាំងបច្ចេកទេស ព្រមទាំងសម្ភារៈ ដើម្បីធ្វើសង្គ្រាមនយោបាយ និងមនោគមវិជ្ជា។

នេះគឺជាការវិវឌ្ឍដ៏តានតឹងថ្មីមួយទៀតនៅឧបទ្វីបកូរ៉េ បន្ទាប់ពីការដាក់បញ្ចាំងខ្សែភាពយន្តដ៏ចម្រូងចម្រាស “The Interview” របស់ផលិតកម្ម Sony ដែលនិយាយពីការលបធ្វើឃាតមេដឹកនាំផ្ដាច់ការកូរ៉េខាងជើង គីម ជុងអ៊ុន៕