រឿងបន្លែ ផ្លែឈើមានជាតិគីមី កំពុងក្លាយជាប្រធានបទក្តៅ!

2014-10-06 19:26:01
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្លែ ផ្លែឈើ និងផលិតផលហួសដឺលេ ដែលកំពុងចរាចរណ៍នៅលើទីផ្សារបច្ចុប្បន្ន បានក្លាយជាការព្រួយបារម្ភខ្លាំងឡើង ពីផលប៉ះពាល់ដល់សុខភាព ខណៈពលរដ្ឋទូទៅសុទ្ធតែបានដឹងពីការប្រើប្រាស់ថ្នាំ និងជីគីមី ដើម្បីរក្សាភាពល្អស្រស់បំព្រងនៃផលិតផលទាំងនោះ។ វេជ្ជបណ្ឌិតជំនាញផ្នែកចំណីអាហារបានព្រមានថា ការបរិភោគអាហារ ដែលមានសារធាតុគីមីនឹងនាំមកនូវផលប៉ះពាល់ដល់សុខភាព ក្នុងនោះមានជំងឺមហារីក និងតំរងនោមជាដើម។ ។

យុវជន សច្ចា អតីតនិស្សិតសាកលវិទ្យាល័យបញ្ញាជាតិបានរៀបរាប់ថា បន្លែផ្លែឈើ ទាំងអស់សុទ្ធតែល្អសម្រាប់សុខភាព ប៉ុន្តែវានឹងប្រកបទៅដោយគ្រោះថ្នាក់នៅពេលដែលអ្នកដាំដុះ ប្រើថ្នាំគីមី ឬ ប្រើសមាសធាតុគីមីដើម្បីរក្សាគុណភាព ដែលខុសពីធម្មតា។ "វាពិតជាមានផលប៉ះពាល់ ដោយយើងមិនអាចដឹងជាមុន។ ខ្ញុំមិនកំណត់ថាប្រភេទបន្លែ ផ្លែឈើណាប៉ះពាល់នោះទេ ប៉ុន្តែអ្នកប្រើប្រាស់គួរសាកសួរជាមុននូវប្រភពបន្លែផ្លែឈើទាំងនោះ”។

យុវជន តារា និស្សិតសាកលវិទ្យាល័យភូមិន្ទភ្នំពេញបានរៀបរាប់ពីផលប៉ះពាល់ភ្លាមៗ បន្ទាប់ពីទិញគ្រឿងកំប៉ុងហួសកាលបរិច្ឆេទដាក់លក់នៅលើទីផ្សារយកមកញ៉ាំកាលពីពេលថ្មីៗ និងស្នើរសុំឲ្យផ្នែកពាក់ព័ន្ធចុះត្រួតពិនិត្យ មុខទំនិញមួយចំនួននៅលើទីផ្សារ។ ម្យ៉ាងបន្លែផ្លែឈើក៏ដូចគ្នាដែរ អ្នកលក់ម្នាក់ធ្លោយមាត់ មិនហ៊ានបរិភោគផ្លែឈើនោះទេ ព្រោះបានដឹងពីការប្រើប្រាស់ថ្នាំគីមី។ "ខ្ញុំបានទិញទឹកដោះគោជូមកញ៉ាំស្រាប់តែឈឺពោះ លុះមើលដឺលេស្រាប់តែហួសបាត់ទៅហើយ។ បន្ទាប់មកថ្ងៃមួយខ្ញុំបានទៅទិញផ្លែឈើអ្នកលក់ស្គាល់គ្នា គាត់ថាយកល្អកុំសូវទិញផ្លែមៀនញ៉ាំ ព្រោះគេប្រើថ្នាំ ដើម្បីទុកលក់បាន។ គាត់អ្នកលក់ផង អត់ហ៊ានញ៉ាំ”។

ទន្ទឹមគ្នាដែរយុវជន ស៊ីណា ក៏បានរៀបរាប់ពីផលប៉ះពាល់ធ្ងន់ធ្ងរចំពោះសុខភាព នៅពេលដែលអ្នកបរិភោគបន្លែ ផ្លែឈើ មិនដឹងប្រភពមកពីខាងណា។ "បន្លែផ្លែឈើនាំចូលជាមុខព្រួញសង្ស័យ នូវការប្រើប្រាស់ថ្នាំ និងជីគឺមីខ្ពស់។ ដូច្នេះការបរិភោគបន្លែឆ្អិន និងត្រាំទឹកសម្លាប់មេរោគបន្លែទាំងនោះជាប្រការល្អ”។

“ខ្ញុំគិតថាយើងគប្បីយកចិត្តទុកដាក់លើបញ្ហានេះ។ កម្ពុជាជាប្រទេសកសិកម្មគួរតែ ជម្រុញការដាំដុះបន្លែធម្មជាតិ និងត្រូវគាំទ្រផលិតផលខ្មែរទាំងអស់គ្នា”។ ទាំងនេះគឺជាការរៀបរាប់របស់ កញ្ញា លីនី។ កញ្ញារៀបរាប់ថា កន្លងមកខ្លួនធ្លាប់ ក្អួត និងរាក រហូតព្យួរសេរ៉ូម ដោយសង្ស័យបន្លែមានថ្នាំពុល។

ជុំវិញបញ្ហានេះ លោក ហ៊ឹម ខទៀត មន្រ្តីផ្នែកទំនាក់ទំនងនៅអង្គការសេដាកបានរៀបរាប់ថា បច្ចុប្បន្នកម្ពុជាបានខិតខំ យ៉ាងខ្លាំងជម្រុញការនាំចេញស្រូវទៅក្រៅប្រទេស។ ប៉ុន្តែចំពោះបន្លែផ្លែឈើនៅតែមានការនាំចូលរង្វង់ ៤០ ទៅ ៥០ ភាគរយ ដើម្បីផ្គត់ផ្គង់ទីផ្សារ ក្នុងស្រុក។ បន្លែផ្លែឈើនាំចូលប្រមាណ ៩៥ ទៅ១០០ ភាគរយបានប្រើថ្នាំគីមី និងបន្លែផ្លែឈើកំពុងផ្គត់ផ្គង់ទីផ្សារ ក្នុងស្រុកតែ ១ ឬ ២ ភាគរយ ទៀតត្រូវបានចាត់ទុកថា មានសុវត្ថិភាព ។

លោកបានបន្ថែមថា អង្គការសេដាកបានបង្កើតទីផ្សារកសិផលធម្មជាតិ ៩ កន្លែង ដោយមិនប្រើថ្នាំ និងជីគីមី ដើម្បីចែកចាយដល់អតិថិជន ក៏ដូចជួយលើកទឹកចិត្តដល់កសិករឲ្យផលិតបន្លែ ផ្លែឈើ ដែលមានសុវត្ថិភាព។ ប៉ុន្តែ បច្ចុប្បន្ន ផលិតផលទាំងនោះ មិនអាចផ្គត់ផ្គង់គ្រប់គ្រាន់ ទៅនឹងតម្រូវការទីផ្សារនោះទេ។ ដូច្នេះនេះគឺជាពេលវេលាដ៏ល្អសម្រាប់ យុវជន ក្នុងការចាប់យកអាជីពជាអ្នកដាំដុះបន្លែ ផ្លែឈើ សរីរាង្គ ជាជាងធ្វើចំណាកស្រុក ឬធ្វើការងារឆ្ងាយពីផ្ទះ។ "កន្លងមកសេដាក បានបណ្តុះបណ្តាលយុវជនជាច្រើននាក់ ទាក់ទងនឹងការដាំដុះបន្លែ ផ្លែឈើបែបសរីរាង រហូតមានអ្នកខ្លះអាចរកប្រាក់ចំណូលបាន ១០០០ ដុល្លារ ក្នុងមួយខែ”។

ទោះយ៉ាងណា លោកវេជ្ជបណ្ឌិត ងី មានហេង អនុប្រធានមន្ទីរ សុខាភិបាលរាជធានីភ្នំពេញបានថ្លែងថា យើងមិនមានការសិក្សាច្បាស់លាស់ណាមួយទាក់ទងនឹងការប្រើប្រាស់សារធាតុគីមីលើបន្លែ ផ្លែឈើ កម្រិតណានោះទេ។ លោកថា សារធាតុគីមីមានច្រើនប្រភេទណាស់។ កាលណាយើងបរិភោគបន្លែ ដែលមានសារធាតុគីមីច្រើននឹងអាចធ្វើឲ្យពុលភ្លាមៗតែម្តង ចំណែកការញ៉ាំបន្លែ ដែលមានបរិមាណតិច រាប់ខែឆ្នាំនឹងអាចធ្វើឲ្យប៉ះពាល់តំរងនោម កង់សែ និងជំងឺមហារីកជាដើម។ "ការរក្សាបន្លែផ្លែឈើឲ្យបានយូរត្រូវបានបែងចែកជាពីរប្រភេទ ក្នុងនោះមាន ការរក្សាក្នុងប្រព័ន្ធត្រជាក់ និងការប្រើសារធាតុគីមី។ សារធាតុគីមីខ្លះត្រូវប្រើ នឹងរក្សាក្នុងសីតុណ្ហភាព ២៥ អង្សារ ប៉ុន្តែបន្លែ ផ្លែឈើខ្លះ យកទៅទុកនៅកន្លែង ដែលមានសីតុណ្ហភាពជាង ៣០ អង្សារ។ ដូច្នេះយកល្អមុននឹងបរិភោគយើងត្រូវលាងនឹងត្រាំ ក្នុងទឹកស្អាតរយៈពេលពី៥ ទៅ១០ នាទី នឹងអាចកាត់បន្ថយបានខ្លះ”៕

អានអត្ថបទ៖ ករណីជាប់បាក់ឌុបស្វ័យប្រវត្តិរបស់ ស៊ន សៀវម៉ី នាំឲ្យមានការពន្យល់ពីមន្រ្តីអប់រំ ចុចត្រង់នេះ

អត្ថបទ៖មៃ សុខលីម