ចាប៉ីដងវែងនឹងត្រូវស្នើបញ្ចូលជាសម្បត្តិបេតិកភណ្ឌពិភពលោក

2015-03-03 20:20:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប៉ីដងវែង របស់ខ្មែរនឹងត្រូវស្នើសុំដាក់បញ្ចូលជាសម្បត្តិបេតិកភណ្ឌពិភពលោកនាពេលខាងមុខ។ នេះបើតាមសម្តេចនាយករដ្ឋមន្ត្រី ហ៊ុន សែន បានថ្លែងនៅក្នុងទិវាវប្បធម៌ជាតិ ៣ មីនា កាលពីព្រឹកមិញនេះ។ សម្តេចបានបន្ថែមថា នៅលើពិភពលោកមានតែខ្មែរមួយគត់ដែលមានចាប៉ីដងវែង។ ដូច្នេះសង្ឃឹមថាការស្នើសុំ ទៅអង្គការយូណេស្កូនឹងមិនមានការជំទាស់នោះទេ។ "ព្រោះអាហ្នឹងគ្មានអ្នកណាមកជំទាស់កើតទេ ចាប៉ីដងវែងមានតែខ្មែរទេ គេមានចាប៉ីបែបរបស់គេ អាហ្នឹងគេដាក់ទៅរឿងរបស់គេ ប៉ុន្តែចាប៉ីបែបខ្មែរនេះគ្មានទេ ពិភពលោកមានតែខ្មែរមួយគត់”។ ក្នុងអភិរក្សសិល្បៈវប្បធម៌ខ្មែរសម្តេច បានស្នើឱ្យមានជំនួបរវាង យុវជនជំនាន់ក្រោយ និងវិរសិល្បៈករជើងចាស់ឲ្យបានច្រើន ដើម្បីសិក្សាស្វែងយល់។ យោងតាមឯកសារមួយឲ្យដឹងថា «ចាប៉ី» ជាពាក្យយារមកពីពាក្យសំស្ក្រឹតថា «ចក្ឆប៉ី» ។ ហៅឈ្មោះថា ចាប៉ីដងវែង មកពីចាប៉ី នេះមានដងវែងទន្ទាំ ។ ចាប៉ីនេះមានមុខងារសំខាន់៤យ៉ាងគឺ ៖

១. សំខាន់ ក្នុងវង់ភ្លេងអារក្ស ដោយគេយកឧបករណ៍នេះទៅប្រគំចូលជាមួយឧបករណ៍ដទៃទៀតក្នុងពេលលៀង អារក្សម្ដងៗតាំងពីសម័យយូរលង់ណាស់មកហើយ ។ ២. សំខាន់ក្នុងវង់ភ្លេងការបុរាណដែលជាប្រពៃណីរបស់ដូនតាយើងតាំងពីរាប់ពាន់ឆ្នាំមកហើយ ។ ៣. សំខាន់សម្រាប់កំដរចំរៀងបែបកំណាព្យ ដែលអ្នកច្រៀងត្រេះផងច្រៀងផងមានប្រជាប្រិយបំផុត ។ ៤. សំខាន់ ក្នុងវង់ភ្លេងមហោរីសម័យដំបូងបង្អស់ ប៉ុន្ដែសម័យបច្ចុប្បន្ននេះ ចាប៉ីដងវែងគ្មានវត្ដមានក្នុងវង់ភ្លេងមហោរីនេះទៀតទេ ។