វៀតណាមព្រួយបារម្ភរឿងផ្លែឈើនាំចូលគ្មានគុណភាព
- 2015-03-10 23:06:27
- ចំនួនមតិ 0 | ចំនួនចែករំលែក 0
វៀតណាមព្រួយបារម្ភរឿងផ្លែឈើនាំចូលគ្មានគុណភាព
ចន្លោះមិនឃើញ
សារព័ត៌មាន Tuoitrenews បានចុះផ្សាយនៅថ្ងៃអង្គារនេះថា ប្រជាជនវៀតណាមកំពុងងាកមកទិញផលិតផលផ្លែឈើដាំក្នុងស្រុក ជាជាងផ្លែឈើដែលនាំចូលខុសច្បាប់ពីប្រទេសនានា ព្រោះព្រួយបារម្ភរឿងគុណភាព។ ការព្រួយបារម្ភនេះ បានកើតឡើងក្រោយប្រជាជនអូស្ត្រាលី ១៣នាក់ មានរោគថ្លើមប្រភេទ A បន្ទាប់ពីទទួលទានផ្លែបឺរីកក ដែលវេចខ្ចប់ដោយរោងចក្រមួយនៅក្នុងប្រទេសចិន។
អ្នកស្រី Thuy Mai នៅស្រុក Tan Phu ក្រុងហូជីមិញ បាននិយាយថា ខ្លួនធ្លាប់ទិញផ្លែឈើថ្លៃៗដែលនាំចូលពីសហរដ្ឋអាមេរិក និងអូស្ត្រាលី ឲ្យកូនស្រីទទួលទាន ប៉ុន្តែពេលនេះឈប់ទិញដូចមុនទៀតហើយ។ ជំនួសឲ្យការទិញផ្លែឈើនាំចូលពីបរទេស អ្នកស្រីបានឲ្យគេផ្ញើពីស្រុកកំណើតមកវិញ ព្រោះព្រួយបារម្ភរឿងគុណភាព។ បច្ចុប្បន្ននេះ ផ្លែឈើបរទេសនាំចូលវៀតណាម បានដាក់លក់ព្រោងព្រាតនៅតាមបណ្តាហាងនានា ផ្សារទំនើប និងតាមអនឡាញ ព្រមទាំងមានភាពងាយស្រួលដើម្បីទិញផងដែរ បើប្រៀបធៀបទៅនឹងប៉ុន្មានឆ្នាំមុន។
មានផ្លែឈើជាច្រើនប្រភេទដែលនាំចូលប្រទេសវៀតណាម ពីសហរដ្ឋអាមេរិក ប៉េរូ អាហ្វ្រិកខាងត្បូង និងប្រទេសហ្វីលីពីន។ ផ្លែឈើទាំងនោះមានដូចជា ប៉ោម ទំពាំងបាយជូរ និងក្រូចជាដើម ហើយសុទ្ធតែមានតម្លៃខ្ពស់ទៀតផង។
បើតាមអ្នកលក់ផ្លែឈើក្នុងប្រទេសវៀតណាម បានបញ្ជាក់ថា ប្រជាជនកំពុងងាកមកចាប់អារម្មណ៍ផលិតផលធម្មជាតិក្នុងស្រុកវិញ ដូចជាផ្លែទៀប ឪឡឹក និងស្រកានាគ ដែលមានតម្លៃថោក និងគុណភាពគួរឲ្យទុកចិត្ត។
កាលពីប៉ុន្មានថ្ងៃមុន ក៏មានផ្ទុះពាក្យចចាមអារ៉ាមពាក់ព័ន្ធនឹងស៊ុតនាំចូលពីប្រទេសចិន បានចាក់បញ្ចូលមេរោគអេដស៍ មុនដាក់លក់លើទីផ្សារវៀតណាមផងដែរ។ យ៉ាងណាមិញ ភ្លាមៗនោះ មន្ត្រីមានសមត្ថកិច្ចបានចេញមុខមកបញ្ជាក់ថា ពាក្យចចាមអារ៉ាមគ្មានមូលដ្ឋានច្បាស់លាស់ និងអះអាងថាវីរុសអេដស៍មិនអាចរស់នៅក្នុងស៊ុតមាន់បានទេ៕
ចុចអាន៖ វៀតណាមបកស្រាយរឿងចាក់មេរោគអេដស៍ចូលក្នុងស៊ុតមុនដាក់លក់
ប្រែសម្រួល៖ គង់ វិសាល ប្រភព៖ tuoitrenews