៨ចំណុច កុំដាក់ជាដាច់ខាតពេលសរសេរCV

2015-03-11 23:24:59
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនអាចបដិសេធបានទេ អំពីការពិតថាយើងកំពុងរស់នៅក្នុងពិភពលោកមួយដែលមានស្ថានភាពកាន់តែលំបាករកការងារខ្លាំងឡើងៗពីមួយថ្ងៃទៅមួយថ្ងៃ។

កំណើនប្រជាជននៅទូទាំងពិភពលោក និងអត្រាអ្នកគ្មានការងារធ្វើ មានន័យថា មនុស្សកាន់តែច្រើនឡើងបានប្រើមធ្យោបាយផ្ទាល់ខ្លួនក្នុងស្វះស្វែងដាក់ពាក្យរកការងារល្អៗ។ អ្នកខ្លះវិញត្រូវគេបដិសេធតាំងពីឃើញ CV ដំបូងតែម្ដង។ មានរឿងមួយចំនួនដែលយើងមិនគួរបង្ហាញលើប្រវត្តិរូបនោះទេ ដោយសារវាបំផ្លាញការចាប់អារម្មណ៍របស់អ្នកដែលកំពុងជ្រើសរើសយើង។

១. កុំព្យាយាមផ្ដល់ព័ត៌មានមិនពិត

នៅទីបញ្ចប់ ការពិតនៅតែជាការពិត។ សម័យនេះទៅហើយ គ្មានមធ្យោបាយណាមួយអាចលាក់កំបាំងការពិតបាននោះទេ ពិសេសប្រវត្តិការងាររបស់អ្នក។

២. កុំដាក់បទពិសោធន៍ការងារដែលពុំទាក់ទង

វាមិនត្រឹមគ្មានប្រយោជន៍ ថែមទាំងធ្វើឱ្យចំណុចសំខាន់ផ្សេងៗទៀត ត្រូវរញ៉េរញ៉ៃ ធ្វើឱ្យគ្មានប្រយោជន៍ដូចគ្នា។

៣. ការពិពណ៌នារាងកាយរូបសម្រស់

ការពិពណ៌នាអំពីខ្លួនយើងមិនគួរបញ្ចូលនៅលើប្រវត្តិរូបទេ។ វាមិនមែនជាជំនាញវិជ្ជាជីវៈ និងបង្កើតឱ្យមានការចំអកថា យើងនឹងប្រើពេលធ្វើការយកយកចិត្តទុកដាក់នឹងរឿងគ្មានបានការអស់នោះ។

៤. ការសរសេរតារាងនៃចំណង់ចំណូលចិត្ត

ប្រសិនបើអ្នកមានចំណូលចិត្តចម្លែកមិនត្រូវនឹងជនទូទៅ សូមពិចារណាឱ្យបានបីដងមុននឹងសរសេរវា ឬមិនចាំបាច់ដាក់វាតែម្ដង។ ចំណូលចិត្តទូទៅនៃការអាន ឬការសរសេរ កីឡា សិល្បៈ ជាជម្រើសអាចទទួលយកបាន ប៉ុន្តែមិនដល់ថ្នាក់ការឡើងភ្នំនោះឡើយ។ ដូច្នេះ បញ្ជីចំណង់ចំណូលចិត្តគួរតែខ្លី និងច្បាស់លាស់។

៥. ព័ត៌មានឯកជនមិនចាំបាច់លាតត្រដាង

ជំនឿសាសនា ចំណូលចិត្តផ្លូវភេទ ជាអ្វីដែលមិនទាក់ទងនៅលើប្រវត្តិរូបការងារទេ គួរតែលាក់ដឹងតែម្នាក់ឯងចុះ។ គ្មានហេតុផលក្នុងការដាក់ព័ត៌មាននេះបើកចំហសម្រាប់ការអង្កេតនោះទេ។

៦. វេយ្យាករណ៍

ការសរសេរខុសបង្ហាញពីការធ្វេសប្រហែស និងខ្ជិលច្រអូសផ្ទៀងផ្ទាត់។ និយោជកអាចខូចអារម្មណ៍តាំងពីកំហុសដ៏តូចនៃការសរសេរនោះ។

៧. មធ្យោបាយទំនាក់ទំនង

អាសយដ្ឋានអ៊ីមែលមិនសមរម្យ ដូចជា kadet-Cuttee@yahoo.com ឬ Chanthou_loveyou @gmail.com នាំមកនូវការវាយតម្លៃ។

៨. ការច្នៃប្រឌិត

គ្មាននិយោជកណាចង់សម្លឹងមើលជីវប្រវត្តិរបស់អ្នកដោយព្យាយាមពេញមួយព្រឹកដើម្បីរកមើលអ្វីទៅជាចំណុចសំខាន់នោះទេ។ ពួកគេក៏មិនចង់ឱ្យការពង្វក់ស្មារតីដោយសារពណ៌ចម្រុះក្នុងព័ត៌មានរបស់អ្នកឡើយ។ ទុកឱ្យ CV មានលក្ខណៈសាមញ្ញ និងធម្មតាបង្ហាញពីភាពបរិសុទ្ធ និងវិជ្ជាជីវៈ៕

អានអត្ថបទ៖ របៀបគេងនៅតុការិយាល័យពេលម៉ោងសម្រាក

ដោយ៖ សុផាត ប្រភព៖ theundercoverrecruiter