របៀបគេងនៅតុការិយាល័យពេលម៉ោងសម្រាក

2015-02-15 23:01:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ការស្រាវជ្រាវបានបង្ហាញថាការគេងរយៈពេលខ្លីនាពេលថ្ងៃ ដែលមានរយៈពេល១០ ទៅ៣០នាទី ពិតជាមានប្រយោជន៍ចំពោះសុខភាពខ្លាំងណាស់ ពោលគឺអាចជម្រុញការគិតឲ្យបានរហ័ស បង្កើនការចងចាំ និងជួយឲ្យអារម្មណ៍ស្រស់ស្រាយជាដើម។

សម្រាប់បុគ្គលិកដែលធ្វើការក្នុងការិយាល័យ ម៉ោងដែលអាចគេងបាន ភាគច្រើនជាម៉ោងសម្រាកពេលញ៉ាំបាយថ្ងៃត្រង់។ សម្រាប់បុគ្គលិកដែលមិនទៅញ៉ាំអាហារនៅផ្ទះ ពួកគេភាគច្រើនបានវិលមកកាន់ការិយាល័យវិញដើម្បីសម្រាក ក្រោយទទួលទានអាហារនៅខាងក្រៅរួច។ តើអ្នកគួរគេងដោយរបៀបណា បើនៅកន្លែងធ្វើការ មិនមានគ្រែដូចនៅផ្ទះផងនោះ?

មានកាយវិការនៃការគេង៣ប្រភេទ ដែលគេចំណាំឃើញជាងគេ។ ទី១ គឺការគេងដោយទ្រោបក្បាលទៅលើដៃនៅលើតុ។ ការគេងបែបនេះ មានលក្ខណៈងាយស្រួលក៏ពិតមែន ប៉ុន្តែវាជាការគេងដែលមិនត្រឹមត្រូវ។ ការគេងបែបនេះ អាចប៉ះពាល់ដល់ឆ្អឹងខ្នងរបស់អ្នក ហើយអាចបណ្ដាលឲ្យឈឺ ប្រសិនបើទម្លាប់គេងបែបនេះញឹកញាប់។

ទី២ គឺការគេងដោយអង្គុយលើកៅអី រួចដាក់ជើងលើតុ។ ការគេងបែបនេះ មិនជាប៉ះពាល់អ្វីខ្លាំងនោះទេ ប៉ុន្តែការគេងដែលល្អបំផុតគឺត្រូវដាក់ជើងឲ្យទាបជាងក្បាល ឬផុតពីកម្រាលត្រឹមកម្ពស់ទាបល្មម។

ទី៣ គឺជាកាយវិការនៃការគេងដែលអ្នកគួរធ្វើតាម ពោលគឺទម្រេតខ្លួនលើកៅអី ដោយដាក់ជើងលើកំណល់ ឬវត្ថុអ្វីផ្សេងទៀតដែលមិនសូវខ្ពស់។ អ្នកត្រូវបិទភ្នែក ដកដង្ហើមឲ្យវែងៗ មួយៗ និងបន្ធូរអារម្មណ៍ដែលតានតឹង។ ប្រសិនបើការិយាល័យរបស់អ្នកមានសំឡេងរំខាន ចូរប្រើកាសត្រចៀក។ ដាក់ដៃទាំង២របស់អ្នកគងលើគ្នានៅលើដងខ្លួន នឹងជួយឲ្យមានផាសុកភាពជាងទម្លាក់ ឬដាក់វាលើកៅអី។

សម្រាប់ប្រិយមិត្តវិញ តើចូលចិត្តគេងដោយរបៀបណាដែរ?

ចុចអាន៖ គូស្នេហ៍១០៤ឆ្នាំ បង្ហើបអាថ៌កំបាំងស្នេហាអមតថ្ងៃ Valentine

ប្រែសម្រួល៖ សុខ សុវត្ថិ

ប្រភព៖ huffpost