អញ្ចឹងតើ! ទើបសាំងដបថោកជាងសាំងនៅតាមស្ថានីយប្រេងឥន្ធនៈ (Video)

2014-10-07 21:24:57
ចំនួនមតិ 0 | ចំនួនចែករំលែក 0

ចន្លោះមិនឃើញ

សាំងដបនៅតាមផ្លូវមានដាក់លក់ជាហូរហែ ហើយតែងមានតម្លៃថោកជាងសាំងនៅតាមស្ថានីយប្រេងឥន្ធនៈ។ សាំងដបក្នុង១លីត្រតម្លៃមិនលើសពី ៥០០០៛ ឯសាំងនៅតាមស្ថានីយ១លីត្រ តម្លៃលើសពី៥០០០៛ ។

តើមូលហេតុអ្វីបានជាសាំងដបដែលគេដាក់លក់នៅតាមផ្លូវមានតម្លៃថោកជាងសាំងនៅតាមស្ថានីយប្រេងឥន្ធនៈ?

ជុំវិញនឹងចម្ងល់នេះ អ្នកស្រី សួន ស្រីនាង អ្នកលក់សាំងដបនៅតាមបណ្ដោយផ្លូវ ៣៦៩ ក្នុងខណ្ឌមានជ័យ បកស្រាយថាធម្មតាសាំងលក់រាយរងគេតែងលក់ថោក មិនខុសអីពីក្រុមហ៊ុនម៉ាកម៉ូតូដែរ ក្រុមហ៊ុនធំគេលក់ថ្លៃជាងក្រុមហ៊ុនតូចៗ តែតាមពិតគឺដូចតែគ្នាទេ។

អ្នកស្រីបន្ថែមថា ៖ "សាំងតាមពិតយកពីក្រុមហ៊ុនដូចតែគ្នាហ្នឹង គ្រាន់តែថាខាងហ្គារាសគេទៅយកពីក្រុមហ៊ុនផ្ទាល់ ហើយខ្ញុំយកពីហ្គារាសបន្ត ។ បើយើងលក់តម្លៃថ្លៃស្មើនឹងហ្គារាស គេនឹងមិនចាក់ទេ គេប្រាកដជាទៅចាក់នៅហ្គារាសវិញមិនខាន។ ខាងហ្គារាសពេលគេបោះដុំឲ្យ គេទុកឲ្យយើងចំណេញក្បាលកាក់រួចជាស្រេច ដូចនេះយើងអាចយកមកលក់ថោក ។ ហើយគេមិនបង្ខំថាទាល់តែយើងត្រូវលក់ក្នុងតម្លៃប៉ុណ្ណាទេ ស្រេចតែយើងយល់ថា លក់ក្នុងតម្លៃប៉ុណ្ណេះអាចចំណេញបានប៉ុណ្ណារួចសោហ៊ុយឬអត់ ។ ក្នុង១លីត្រ ខ្ញុំលក់ ៤៧០០៛ ហើយពេលខាងហ្គារាសបោះឲ្យ គឺបោះថោកជាងហ្នឹងច្រើនណាស់ ដែលតម្លៃវាអាចឲ្យយើងយកមកលក់អាចចំណេញបាន"។

មិនខុសគ្នាប៉ុន្មាន អ្នកលក់សាំងដបម្នាក់ទៀតនៅម្ដុំបុរីហាយតិច អ្នកស្រីសុភី អាយុ ៥០ឆ្នាំ និយាយថា ៖ "ក្នុងមួយលីត្រ ខ្ញុំលក់ក្នុងតម្លៃ៤៩០០៛ គឺខ្ញុំទៅយកផ្ទាល់ពីហ្គារាសសាំងតែម្ដង ហើយហ្គារាសនោះយកមកពីវៀតណាម។ ធម្មតាទេ គេលក់តាមហ្គារាសគេបង់ភាស៊ី ពន្ធ អនាម័យ បុគ្គលិក ចុះបញ្ជីអាជ្ញាប័ណ្ណពីក្រសួងជាដើម និង កន្លែងជួលរាប់ពាន់ដុល្លារ តែយើងលក់តាមផ្ទះគេមិនគិតពន្ធ មិនត្រូវការជួលបុគ្គលិក អញ្ចឹងអាចយកមកលក់ធូរថ្លៃបាន" ។