ភាពយន្ត "Cinderella” បើកឆាកភ្លាមរកបាន ៧០លានដុល្លារ

2015-03-16 16:45:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងរយៈពេល ៣ថ្ងៃដំបូង ខ្សែភាពយន្តពីរឿងព្រេងនិទាន "Cinderella” អាចរកចំណូលបាន ៧០លានដុល្លារពីការបញ្ចាំងនៅសហរដ្ឋអាមេរិក ដែលជាចំណូលច្រើនបំផុតលើតារាង Box Office អាមេរិកសប្ដាហ៍នេះ។

ចំណាយដើមទុនផលិតអស់ ៩៥លានដុល្លារ ខ្សែភាពយន្ត "Cinderella” អាចរកចំណូលបាន ១៣២លានដុល្លារ បើគិតទាំងការបញ្ចាំងនៅប្រទេសផ្សេងៗទៀតទូទាំងពិភពលោក។ ខ្សែភាពយន្តថ្មីរបស់ក្រុមហ៊ុន Walt Disney នេះសម្ដែងដោយ Lily James ជាតួព្រះនាង Cinderella និង Richard Madden ជាព្រះអង្គម្ចាស់ Kit។

ភាពល្បីល្បាញរបស់ខ្សែភាពយន្ត "Cinderella” បានធ្វើឲ្យខ្សែភាពយន្ត "Run All Night” របស់តារាសម្ដែង Liam Neeson ដែលទើបតែចេញបញ្ចាំងសប្ដាហ៍ដំបូងដែរ អាចរកចំណូលបានត្រឹមតែ ១១លានដុល្លារ បើទោះជាជាប់ចំណាត់ថ្នាក់លេខ ២ក្ដី។ ខ្សែភាពយន្តបែបបាញ់ប្រហារដែលចំណាយដើមទុនផលិតអស់ ៥០លានដុល្លារនេះ បរិយាយពីបុរសវ័យចំណាស់ម្នាក់ដែលព្យាយាមការពារកូនប្រុសរបស់ខ្លួនពីការវាយប្រហាររបស់ក្រុមជនអន្ធពាល។

ចំណាត់ថ្នាក់លេខ៣ គឺរឿង "Kingsman: The Secret Service" ដែលនិយាយពីកម្មវិធីបង្វឹករបស់ភ្នាក់ងារស៊ើបអង្កេតមួយ និងការគំរាមកំហែងពីក្រុមជើងខ្លាំងផ្នែកបច្ចេកវិទ្យា សម្ដែងដោយ Samuel L. Jackson និង Colin Firth។ ក្នុងសប្ដាហ៍ទី៥ ភាពយន្តនេះអាចរកបាន ៦,២លានដុល្លារ។

ចំណាត់ថ្នាក់លេខ ៤គឺខ្សែភាពយន្ត "Focus” របស់តារាសម្ដែង Will Smith ដែលអាចរកចំណូលបាន ៥,៨០៥លានដុល្លារ ហើយចំណាត់ថ្នាក់លេខ ៥គឺខ្សែភាពយន្តមនុស្សយន្តវិទ្យាសាស្ត្រ "Chappie” ដែលរកបាន ៥,៨០០លានដុល្លារ នៅសប្ដាហ៍នេះ។

ខាងក្រោមនេះគឺជាចំណាត់ថ្នាក់កំពូលទាំង ១០លើតារាងចំណូលភាពយន្តអាមេរិក Box Office សប្ដាហ៍នេះ (ចំណូលចុងសប្ដាហ៍គិតចាប់ពីថ្ងៃទី១៣-១៥ ខែមីនា)៖

ចំ.	ចំណងជើងភាពយន្ត	ចំណូលចុងសប្ដាហ៍	ចំណូលសរុប	សប្ដាហ៍ទី
១	Cinderella (2015)	៧០លានដុល្លារ	៧០លានដុល្លារ	១
២	Run All Night	១១លានដុល្លារ	១១លានដុល្លារ	២
៣	Kingsman: The Secret Service	៦,២លានដុល្លារ	១០៧,៣លានដុល្លារ	៥
៤	Focus (2015)	៥,៨លានដុល្លារ	៤៤លានដុល្លារ	៣
៥	Chappie	៥,៨លានដុល្លារ	២៣,៣លានដុល្លារ	២
៦	The Second Best Exotic Marigold Hotel	៥,៧លានដុល្លារ	១៨លានដុល្លារ	២
៧	The SpongeBob Movie	៤,១លានដុល្លារ	១៥៤,៦លានដុល្លារ	៦
៨	McFarland, USA	៣,៦លានដុល្លារ	៣៤,៩លានដុល្លារ	៤
៩	American Sniper	២,៩លានដុល្លារ	៣៤១,៥លានដុល្លារ	១២
១០	The DUFF	២,៩លានដុល្លារ	៣០,៣លានដុល្លារ	៤