ស្រីស្អាត ស៊ឹម សិរីរ័ត្នមុនី បានត្រឹមតួធំឆ្នាសឆ្នើម

2015-03-17 16:08:50
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមរយៈរឿង "You are my memory” និង រឿង "បេសកកម្មមរណៈ" ស៊ឹម សិរីរ័ត្នមុនី បានត្រឹមធ្វើជាតួធំឆ្នាសឆ្នើមប៉ុណ្ណោះ មិនបានក្លាយជាតួឯកដូចបំណងនៅឡើយទេ ដោយសាមីខ្លួនបានអះអាងថា សមត្ថភាពនៅមានកម្រិតជាចំណែកមួយ។

សិរីរ័ត្នមុនី ប្រាប់ Sabay ថា៖ " ការផ្លាស់ប្ដូរអត្តចរិតភ្លាមៗពីស្លូតទៅកាចហ្នឹងឯងជាឧបសគ្គសំខាន់ តែខ្ញុំព្យាយាមធ្វើបានហើយ"។ ស្រីស្អាតរូបនេះ បន្តថា នាងនៅមានបទពិសោធន៍ស្ដួចស្ដើងនៅឡើយ ក្នុងអាជីពសិល្បៈ ដោយបានធ្វើជាពិធីការិនី មួយរយៈខ្លីនៅទូរទស្សន៍អាស៊ីអាគ្នេយ៍ និង បានថតស្ប៉តពាណិជ្ជកម្មមួយចំនួន។

ប៉ុន្តែសាមីខ្លួនដដែលបានបញ្ជាក់ថា តាមរយៈបទពិសោធន៍ថតកុនទាំង ២ រឿងខាងលើ បានធ្វើឲ្យនាង ចេះបែងចែកពេលវេលាជាងមុន ពាក់ព័ន្ធទៅនឹងការងារសិល្បៈនៅពេលមានការហៅទៅសម្ដែងនានា។ តារាស្រីវ័យ ២១ ឆ្នាំ រូបនេះ បង្ហាញក្ដីសង្ឃឹមថា នឹងមានឱកាសសម្ដែងរឿងថ្មីទៀតនៅពេលខាងមុខមិនខានឡើយ និង ពេលវេលា ដែលត្រូវរៀនសូត្របន្ថែមសម្រាប់អាជីពសម្ដែង។

ពាក់ព័ន្ធទៅនឹងការងារជាពិធីការិនីវិញ តារាមានប្រភពមកពីខេត្តបាត់ដំបងខាងលើ បានអះអាងថា កំពុងស្ថិតនៅក្នុងដំណាក់កាលចរចាគ្នាជាមួយស្ថានីយទូរទស្សន៍ PNN ត្រៀមនឹងដំណើរការជាផ្លូវការនៅកំឡុងខែឧសភាខាងមុខ ក្នុងកម្មវិធីចុងភៅ។ ជាមួយនឹងអំណះអំណាងមិនបោះបង់សិល្បៈ សិរីរ័ត្នមុនី ក៏បានបង្ហាញផែនការបើកភោជនីយដ្ឋានបែបអឺរ៉ុបផងដែរ បន្ទាប់ពីនាងបញ្ចប់បរិញ្ញាបត្រជំនាញគណនេយ្យក្នុងឆ្នាំនេះ៕

អានអត្ថបទ៖ មូន ម៉ារ៉ា បន្តមកកាត់ចំណងដៃនៅភ្នំពេញទៀតយប់មិញ!

អានអត្ថបទ៖ សុគន្ធ ថេរ៉ាយុ៖ ឆ្នាំនេះ អាចផ្ទុះជាមួយ នាយ គ្រឿន ទៅរួចអត់?

អត្ថបទ៖ សំ ជំនាញ