តារាថៃបង្ហោះវីដេអូជេរអ្នកទេសចរចិន ក្លាយជាប្រធានបទក្ដៅលើអ៊ីនធឺណិត

2015-03-17 16:46:01
ចំនួនមតិ 0 | ចំនួនចែករំលែក 0

ចន្លោះមិនឃើញ

វីដេអូបង្ហាញពីអារម្មណ៍ខឹងសម្បាររបស់អតីតបេក្ខភាពបវរកញ្ញាថៃមួយរូបចំពោះភ្ញៀវទេសចរចិន កំពុងក្លាយជាប្រធានបទយ៉ាងក្ដៅគគុកសម្រាប់អ្នកលេងអ៊ីនធឺណិតនៅប្រទេសថៃ។

តារាម៉ូដែលឈ្មោះ Duangjai Phichitamphon ហៅ Jhakyបានថតវីដេអូនេះកាលពីថ្ងៃព្រហស្បតិ៍សប្ដាហ៍មុន បន្ទាប់ពីទេសចរចិនមួយក្រុមបានប្រជ្រៀតប្រជែងនាងដោយគ្មានរបៀប នៅកន្លែងប្ដូរប្រាក់ពន្ធ នៅអាកាសយានដ្ឋានទីក្រុងសេអ៊ូល ប្រទេសកូរ៉េ។ តារារូបនេះ បានអះអាងថាមុនភ្ញៀវទេសចរចិនមួយក្រុមនេះមកដល់ គ្រប់គ្នាតម្រង់ជួរគ្នាល្អណាស់។

Jhaky បាននិយាយជាភាសាថៃថា "ដំបូងមនុស្សច្រើននាក់ មកពីប្រទេសផ្សេងៗគ្នាកំពុងតម្រង់ជួរ។ តែពេលក្រុមអ្នកទេសចរចិនមកដល់ គ្រប់យ៉ាងក៏ក្លាយជាបែបនេះ។ តើនេះជាស្អី?!”។

មកដល់ពេលនេះវីដេអូនាងមានអ្នកចូលទស្សនាជាង ៨សែនដង លើ Youtube បន្ទាប់ពីបង្ហោះកាលពីថ្ងៃទី១៥ ខែមីនា ហើយនៅលើ Facebook វិញមានអ្នក Like ជាង ២៥០០០នាក់ និង Share ជាង ៣ម៉ឺនដង។

ទស្សនាវីដេអូរបស់ Jhaky៖

វីដេអូរបស់ Jhaky បានទាក់ទាញចំណាប់អារម្មណ៍របស់ប្រជាជនថៃ ស្របពេលដែលពួកគេកំពុងបញ្ចេញកំហឹងយ៉ាងច្រើនដែរចំពោះភ្ញៀវទេសចរចិន ក្រោយធ្លាយរូបថត និងវីដេអូពីអាកប្បកិរិយាមិនសមរម្យរបស់ទេសចរចិនមួយក្រុមពេលមកលេងនៅប្រទេសថៃ។

រយៈពេលចុងសប្ដាហ៍កន្លងទៅនេះ ប្រជាជនថៃនាំគ្នាបញ្ចេញប្រតិកម្មខ្លាំងៗតាមរយៈបណ្ដាញសង្គម ចំពោះរូបថតភ្ញៀវទេសចរចិនដែលបានលើកជើងលាងនៅកន្លែងលាងដៃ ក្នុងបន្ទប់ទឹក នៅកោះ Phi Phi ៕