MC Bull៖ “ចេះឈឺចាប់ទើបរីកចម្រើន"

2015-03-17 18:34:26
ចំនួនមតិ 0 | ចំនួនចែករំលែក 0

ចន្លោះមិនឃើញ

វណ្ណ ពិសិដ្ឋ ហៅ MC Bull ដែលជាអតីតបេក្ខជនក្នុងកម្មវិធី "ពេញចិត្តឬអត់" បានប្រាប់គេហទំព័រ Sabay ថា ការឈឺចាប់គឺជាមេរៀនមួយដ៏ប្រសើរសម្រាប់អនាគត។ មនុស្សជោគជ័យ គឺចេះឈឺចាប់ហើយចេះប្រឹងប្រែង ទាំងអស់នេះហើយ ដែលធ្វើឲ្យលោកប្រឹងប្រែងបង្កើតបទចម្រៀងថ្មីមិនចម្លងពីគេ និង ការពុះប្រឡូកក្នុងវិស័យសិល្បៈ។

ម្ចាស់បទ “សិល្បៈកូនខ្មែរ” MC Bull បានបង្កើតបទចម្រៀងបានចំនួន ៨ បទរួចមកហើយ ក្រោយពីបានចូលប្រលូកក្នុងពិភពសិល្បៈក្នុងអំឡុងឆ្នាំ ២០១០។ បទភាគច្រើនដែលបង្កើតឡើងគឺជាស្នាដៃផ្ទាល់របស់ Bull។

សូមចុចអាន៖ ក្រុម DJ នៅភ្នំពេញ បង្កើតកម្មវិធីជួបជុំ រឹតចំណងសាមគ្គីភាព

MC Bull ច្រៀងបទ "សិល្បៈកូនខ្មែរ" ក្នុងកម្មវិធី DJ Party កាលពីថ្ងៃទី ១២ មីនា ២០១៥

MC Bull និយាយថា ការខ្មាសអៀនបានធ្វើឲ្យមនុស្សចេះប្រឹងតស៊ូ គ្រប់កាលៈទេសៈ។ Bull បានចាត់ទុកថា ការលួចចម្លងស្នាដៃពីគេគឺជារឿងខ្មាសអៀនមួយ ដូច្នេះ ហើយBull បានសម្រេចបង្កើតនូវបទចម្រៀងខ្លួនឯងទោះពីរោះមិនពីរោះ ប៉ុន្ដែ វាជារបស់ខ្លួនឯង។

MC Bull កើតនៅឆ្នាំ ១៩៩០ នៅខេត្តកំពង់ចាម។ នៅចន្លោះឆ្នាំ ២០០៧-២០១០ Bull ធ្លាប់បានបួស៣ ឆ្នាំ និង បានរៀនសូត្រនៅសាលាលោក ហើយចេះតែងកំណាព្យ និង ឆ្លៀតរៀននិពន្ធទំនុកច្រៀង។ ក្រោយពីសឹក Bull បានរៀនធ្វើបទភ្លេងតាមរយៈ YouTube។

នៅក្នុងខ្សែជីវិត Bull ក្រៅពីធ្លាប់ បួស រៀន MC Bull ធ្លាប់ធ្វើការជាកម្មករសំណង់, កម្មកររោងចក្រ, លាងម៉ូតូ, បញ្ចូលបទភ្លេង និង បុគ្គលិកខារ៉ាអូខេ នៅម្ដុំទួលគោក។ ការងារនៅខារ៉ាអូខេ ជាផ្នែកមួយបង្កើនចំណេះដឹងផ្នែកស្ដាប់ភ្លេង ដែលធ្វើឲ្យ Bull កាន់តែចេះស្ដាប់ទំនុកភ្លេង និង បង្កើតភ្លេងថ្មី ក្រោយពីរៀនសូត្រតាម YouTube បន្ថែម។ MC Bull និយាយប្រាប់។

MC Bull បាននិយាយថា "ខ្ញុំមានទេពកោសល្យខាង Rap តាំងពីនៅតូច តែខ្ញុំក៏មាននិស្ស័យខាងកំប្លែង ហើយខ្ញុំដាក់ប្រលងនៅ MYTV ហើយខ្ញុំបានធ្លាក់នៅជុំផ្ដាច់ព្រ័ត្រ គឺវគ្គទី ៦ កាលពីឆ្នាំ ២០១៤"។ MC Bull បានបន្តថា រហូតមកទល់ពេលនេះ បាននិពន្ធបទចម្រៀង និង ទំនុកភ្លេងថ្មី បានចំនួន ៨ បទ ហើយ ៦ បទទៀតត្រៀមចេញអបអរសាទរឆ្នាំថ្មីប្រពៃណីខ្មែរនាពេលខាងមុខនេះ៕