គីម ជុងអ៊ុន ធ្វើដំណើរទស្សនកិច្ចបរទេសលើកដំបូងទៅរុស្ស៊ី

2015-03-18 17:07:18
ចំនួនមតិ 0 | ចំនួនចែករំលែក 0

ចន្លោះមិនឃើញ

មេដឹកនាំវ័យក្មេងរបស់កូរ៉េខាងជើង គីម ជុងអ៊ុន នឹងធ្វើដំណើរទស្សនកិច្ចបរទេសលើកដំបូងទៅកាន់ប្រទេសរុស្ស៊ី បន្ទាប់ពីឡើងកាន់អំណាចអស់រយៈពេលជាង ៣ឆ្នាំកន្លងមក។ ដំណើរទស្សនកិច្ចនេះ តបការអញ្ជើញរបស់លោក វ៉្លាឌីមៀរ ពូទីន ដែលជាប្រធានាធិបតីនៃប្រទេសរុស្ស៊ី ក្នុងគោលបំណងប្រារព្ធខួប ៧០ឆ្នាំ នៃការបញ្ចប់សង្គ្រាមលោកលើកទីពីរ ដែលនឹងប្រព្រឹត្តទៅនៅថ្ងៃទី៩ ខែឧសភាខាងមុខ។

មេដឹកនាំវ័យក្មេងរបស់កូរ៉េខាងជើង គីម ជុងអ៊ុន

លោក គីម ជុងអ៊ុន ស្ថិតក្នុងចំណោមមេដឹកនាំពិភពលោកទាំង ២៦រូប ដែលយល់ព្រមចូលរួមប្រារព្ធខួប ៧០ឆ្នាំ ក្នុងពេលសហភាពសូវៀត (បច្ចុប្បន្នរុស្ស៊ី) យកជ័យជម្នះលើក្រុមណាស៊ីអាល្លឺម៉ង់ ដើម្បីបញ្ចប់សង្គ្រាមលើកទីពីរកាលពីឆ្នាំ១៩៤៥។ រដ្ឋមន្ត្រីការពារជាតិរុស្ស៊ី លោក Sergey Lavrov បានបញ្ជាក់ពីដំណើរទស្សនកិច្ចរបស់មេដឹកនាំកូរ៉េខាងជើងហើយ ប៉ុន្តែកូរ៉េខាងជើងផ្ទាល់មិនបាននិយាយអ្វីទាក់ទងនឹងគម្រោងនេះទេ។

ការប្រកាសនេះ ធ្វើឡើងមួយថ្ងៃប៉ុណ្ណោះ ក្រោយវត្តមានជាថ្មីនៃប្រធានាធិបតីរុស្ស៊ី លោក វ៉្លាឌីមៀរ ពូទីន បន្ទាប់ពីបាត់ខ្លួនយ៉ាងអាថ៌កំបាំងអស់រយៈពេល ១០ថ្ងៃមក។ បើតាមការអះអាងរបស់រដ្ឋមន្ត្រីការពារជាតិរុស្ស៊ី នៅថ្ងៃប្រារព្ធពិធី នឹងមានព្យុហយាត្រា ដែលចូលរួមពីទាហាន ១៥០០០នាក់ លើទីលានក្រហម។

ប្រធានាធិបតីរុស្ស៊ី វ៉្លាឌីមៀរ ពូទីន

មេដឹកនាំបស្ចិមប្រទេសជាច្រើន មិនបានឆ្លើយតបរឿងចូលរួមព្រឹត្តិការណ៍ដ៏ធំរបស់រុស្ស៊ីនេះទេ ដោយសារគោលជំហររឿងជម្លោះជាមួយអ៊ុយក្រែន។ មេដឹកនាំប្រទេសផ្សេងទៀត ដែលនឹងបង្ហាញខ្លួនជាមួយមេដឹកនាំកូរ៉េខាងជើង គីម ជុងអ៊ុន អាចមាន ប្រទេសចិន គុយបា ឥណ្ឌា ម៉ុងហ្គោលី អាហ្វ្រិកខាងត្បូង និងវៀតណាម ដែលទទួលយកការអញ្ជើញរួចហើយនោះ៕

ចុចអាន៖ កូរ៉េខាងជើងបាញ់មីស៊ីល ៧គ្រាប់ចំពេលសមយុទ្ធរវាងកូរ៉េខាងត្បូង និងអាមេរិក

ប្រែសម្រួល៖ គង់ វិសាល ប្រភព៖ dailymail