ស្ដាប់ការអត្ថាធិប្បាយរឿង ស៊ន សៀវម៉ី តាមវិទ្យុក៏រំជួលចិត្តស្ទើរស្រក់ទឹកភ្នែក

2014-10-08 15:29:30
ចំនួនមតិ 0 | ចំនួនចែករំលែក 0

ចន្លោះមិនឃើញ

«គ្រាន់តែស្ដាប់ ព័ត៌មាន ពេលគេចាក់សំឡេងតាមវិទ្យុ ក៏ខ្ញុំរំជួលចិត្តបាត់ហើយ ព្រោះ....រំភើបពេក មិនដែលមានអីចឹងពីមុនទេ។ ខ្ញុំមានមោទនភាពណាស់ ជាកូនខ្មែរម្នាក់ដែរ»។ នេះជាការលើកឡើងរបស់យុវជន គូ សុជាតិ និស្សិតនៃសាកលវិទ្យាល័យបញ្ញាសាស្ត្រកម្ពុជា។

សុជាតិ យល់ឃើញថា នេះជាមោទនភាពមួយដ៏ធំធេងរបស់ខ្មែរ ពីព្រោះកម្ពុជាមិនដែលឈ្នះមេដាយមាសទេពីមុនមក។ និស្សិតរូបនេះបន្តថា ពេលដែលបានស្ដាប់ការពិពណ៌នារបស់អ្នកអានព័ត៌មាននៃវិទ្យុអន្តរជាតិជាខេមរភាសាអមដោយការចាក់សំឡេងដើមផ្ទាល់ទៀតនោះ បានធ្វើឲ្យរូបគេរំជួលចិត្តយ៉ាងខ្លាំងស្ទើរតែស្រក់ទឹកភ្នែកដោយមិនដឹងខ្លួនទៅហើយ។

ស្រដៀងគ្នានេះដែរ យុវជន ផាន សុភក្ដិ បុគ្គលិកនៃសាកលវិទ្យាល័យខាងលើបន្ថែមថា ៖«អស្ចារ្យណាស់ មោទនភាពមែន វិទ្យុ និងទូរទស្សន៍អន្តរជាតិជាច្រើនសុទ្ធតែផ្សាយពីឈ្មោះស៊ន សៀវម៉ី។ គ្រាន់តែស្ដាប់តាមវិទ្យុ ខ្ញុំរំភើបហួស...»។ យុវជនរូបនេះបន្តថា នេះជាលើកទី១ ហើយដែលរូបគេឃើញសារព័ត៌មានជាតិ និងអន្តរជាតិជាច្រើនផ្ដោតការយកចិត្តទុកដាក់លើកីឡាការិនីខ្មែរ យ៉ាងភ្លូកទឹកភ្លូកដីដូច្នេះ។

រូបគេបន្តថា ប៉ុន្មានថ្ងៃនេះទៅណាមកណាក៏លឺតែគេនិយាយពីឈ្មោះ ស៊ន សៀវម៉ី ដែរ វាជាកិត្តិយសដែលនាងសមនឹងទទួលបានខ្លាំងណាស់។

ទស្សនិកជនមួយចំនួនធំប្រាកដជាបានទស្សនារួចមកហើយនូវវីដេអូនៃដំណើរវិលត្រឡប់របស់វីរៈនារី ម្ចាស់មេដាយមាស ស៊ន សៀវម៉ី និងក្រុមអត្តពលិកខ្មែរពីទីក្រុងអ៊ីនឆន ប្រទេសកូរ៉េខាងត្បូង ដោយក្នុងខ្សែវីដេអូនោះម្ចាស់មេដាយមាសរំភើបចិត្តរហូតដល់ទឹកភ្នែកស្រក់ចុះទាំងមិនដឹងខ្លួន ហើយមានអ្នកខ្លះក៏រំភើបយំតាម រីឯអ្នកខ្លះទៀតក៏ភ្នែកឡើងរលីងរលោងដែរ។

ចុះទស្សនិកជនវិញមានអារម្មណ៍ដូចអ្នកទាំងពីរខាងលើដែរឬទេ?

អត្ថបទ៖ អៀង សូទ្រី