ចូលរួមពាន សហគ្រិនឆ្នើម ដើម្បីទទួលបានផលចំណេញសម្រាប់អាជីវកម្មអ្នក

2015-03-21 15:52:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងការប្រកាសថ្ងៃជ្រើសរើសបេក្ខជនម្សិលមិញ អ្នកស្រី កែវ ចិន្តា ប្រធានផ្នែកជ្រើសរើសបេក្ខភាពពាន សហគ្រិនវ័យក្មេងកម្ពុជា (CYEA 2015) ពន្យល់ថាពានរង្វាន់នេះនឹងផ្ដល់គុណប្រយោជន៍ជាច្រើនដល់ បេក្ខជន ក្រៅតែពីសហគ្រិនអាចបង្កើនបណ្ដាញថ្មីៗ ជាមួយក្រុមពាណិជ្ជករឆ្នើមៗក្នុងសង្គមពាណិជ្ជកម្មកម្ពុជា។ អ្នកស្រីលើកយកអត្ថប្រយោជន៍ធំៗ ដែលបេក្ខជនចូលរួមអាចទាញផលចំណេញលើអាជីវកម្មខ្លួនដូចជា៖

-ផ្សព្វផ្សាយ យីហោអាជីវកម្ម និងសក្ដានុពល ក្នុងភាពជាបុគ្គលលេចធ្លោ -ឱកាសទទួលបានការផ្ដល់ជូន អត្រាការប្រាក់ពិសេស និងទាក់ទាញសម្រាប់ការវិនិយោគទុនដែលជាប្រយោជន៍ដល់អាជីវកម្ម -ទទួលបានការចែករំលែកពិសោធន៍ពីជនឆ្នើមៗផ្នែកអាជីវកម្ម នៅសមាគមសហគ្រិនវ័យក្មេងកម្ពុជា -ការបណ្ដុះបណ្ដាលពិសេសផ្នែកហិរញ្ញវត្ថុពីក្រុមជំនាញ -ដឹងពីចំណុចខ្វះខាតផ្នែកគ្រប់គ្រងអាជីវកម្មរបស់ខ្លួនដើម្បី បំពេញបន្ថែម -ឈានទៅចាប់យកឱកាសថ្មីៗសម្រាប់អាជីវកម្ម

លោក តា ជាសុខ ប្រធានសាខាធនាគារ ហ្វីលីព ដែលគាំទ្រដល់ការរៀបចំពានរង្វាន់សហគ្រិនវ័យក្មេងកម្ពុជា (CYEA) ថាធនាគារលោក លើកទឹកចិត្តខ្ពស់ដល់សហគ្រិនវ័យក្មេងទាំងឡាយចូលរួមក្នុងកម្មវិធី។ ធនាគារនឹងផ្ដល់ជូនការបញ្ចុះការប្រាក់ ដល់បេក្ខជន ពិសេសបេក្ខជនជាប់បញ្ជី១០នាក់ចុងក្រោយត្រឹម៨% ក្នុងមួយឆ្នាំសម្រាប់ឥណទានគ្មានការកំណត់។

នេះជាប្រវត្តិសាស្ត្រដំបូងក្នុងវិស័យធុរកិច្ច ដែលមានការបង្កើនពានរង្វាន់សម្រាប់សហគ្រិនវ័យក្មេងឆ្នើមនៅកម្ពុជា។ ប្រវត្តិបេក្ខជនឆ្នើមៗនឹងត្រូវកត់ត្រា និងបង្ហាញជាសាធារណៈ ទុកជាគំរូដល់យុវជនជំនាន់ក្រោយ។

លោក គូច ផេង ប្រធានសភាយុវពាណិជ្ជករអន្តរជាតិកម្ពុជា ដែលជាស្ថាប័ន ចាប់ដៃជាមួយ សមាគមសហគ្រិនវ័យក្មេងកម្ពុជា សម្រាប់គម្រោងបង្កើតឲ្យមានពាន CYEA ឡើយ ថាគម្រោងបង្កើតពាននេះ គឺមានតាំងពីប៉ុន្មានឆ្នាំមុនម៉្លេះ តែទើបអាចធ្វើឲ្យក្លាយជាការពិត លេចរូបរាងឡើងឆ្នាំនេះ។

លោកថាកន្លងមក សហគ្រិនក្មេងៗថ្មីៗ មិនសូវទទួលបានការលើកទឹកចិត្ត គឺមានតែពាណិជ្ជករធំៗ ដែលមានគេស្គាល់ជាសាធារណៈច្រើន ហើយការបើកប្រវត្តិសាស្ត្រពាននេះ គឺជាការជំរុញទឹកចិត្តយុវសហគ្រិនទាំងឡាយ។ លោកថា សហគ្រិនក្មេងៗជាច្រើន បានចូលរួមក្នុងបង្កើតការងារ ដែលជាផ្នែកជំរុញការអភិវឌ្ឍន៍សេដ្ឋកិច្ចជាតិ ហើយពួកគេគួរតែទទួលបានអ្វីតបស្នងវិញ។

ពានរង្វាន់ឆ្នើមៗ៤នឹងផ្ដល់សហគ្រិន

- ពានរង្វាន់ អាជីវកម្មលេចធ្លោ

ពានរង្វាន់សហគ្រិនស្ត្រីឆ្នើម - ពានរង្វាន់ជីវកម្មទ្រទ្រង់សង្គម
ពានរង្វាន់ អាជីវកម្មប្រើបច្ចេកវិទ្យាខ្ពស់

CYEA បើកឲ្យសហគ្រិនទូទៅ បំពេញសំណុំបែបបទដាក់ពាក្យតាំងពីថ្ងៃទី២៨ ខែមករា ហើយនឹងបិទនៅថ្ងៃទី៣១មីនា។ គណៈកម្មការមានជំនាញនិងបទពិសោធន៍ នឹងវាយតម្លៃសម្រិតសម្រាំងយកបេក្ខជនសហគ្រិនលេចធ្លោបំផុត១០នាក់នៅថ្ងៃទី២៨មេសា ដើម្បីធ្វើប្រវត្តិរូប និងរៀបរាប់អាជីវកម្មពួកគេជាវីដេអូ ចេញផ្សាយជាសាធារណៈ។ ដំណាក់កាលបន្ទាប់គឺការវាយតម្លៃសហគ្រិន១០នាក់នោះ ស្វែងរកសហគ្រិនល្អជាងគេ៤នាក់ ដែលស័ក្ដិសមបំផុតតាមប្រភេទពានទាំង៤ខាងលើ ហើយនឹងប្រកាសឲ្យឈ្នះពានទាំងនោះនៅថ្ងៃទី៣០ឧសភា២០១៥។

សហគ្រិនដែលអាចចូលរួមក្នុងការប្រជែងពានរង្វាន់វិស័យធុរកិច្ចជាប្រវត្តិសាស្ត្រដំបូងនៅកម្ពុជាលុះត្រាតែ៖

មានអាយុចាប់ពី១៨ដល់៤០ឆ្នាំ
បានបើកអាជីវកម្មយ៉ាងតិចពីរឆ្នាំ
មានក្រុមហ៊ុនចុះបញ្ជីស្របច្បាប់
មានសញ្ជាតិកម្ពុជា
មានក្រុមហ៊ុនយ៉ាងតិចមានបុគ្គលិក៥នាក់
អាជីវកម្ម ឬក្រុមហ៊ុន ដែលមិនផ្ដល់សេវាកម្មទាក់ទងនឹងល្បែងស៊ីសង ជួញដូរឈើខុសច្បាប់ ថ្នាំជក់ និងគ្រឿងស្រវឹង
មិនមែនសមាជិកគណៈកម្មការរៀបចំកម្មវិធី
សហគ្រិនវ័យក្មេងដែលជានារីត្រូវបានលើកទឹកចិត្ត

សហគ្រិនទាំងឡាយចង់ចូលរួមកម្មវិធីក្នុងកម្មវិធីពានអាជីវកម្ម ទំព័រដំបូងបំផុតនៅកម្ពុជាមួយនេះ អាចទាក់ទងតាមទូរសព្ទលេខ ០៧១ ៣១៧ ៣៣៣៣ ឬ ០៧១ ៣១៧ ៣៣៣៣៕ អត្ថបទ៖ ប៉ែន សុផាន់ណា