រឿងរ៉ាវនានាមុន Beeline ឈានដល់ការដួលរលំ
- 2015-03-25 18:25:08
- ចំនួនមតិ 0 | ចំនួនចែករំលែក 0
រឿងរ៉ាវនានាមុន Beeline ឈានដល់ការដួលរលំ
ចន្លោះមិនឃើញ
ក្រុមហ៊ុន Sotelco (Beeline) បានបញ្ចប់ប្រតិបត្តិការអាជីវកម្មផ្គត់ផ្គង់សេវាទូរសព្ទនៅកម្ពុជា និងសម្រេចលក់ទ្រព្យសម្បត្តិនិងអាជ្ញាបណ្ណសេវាទូរសព្ទរបស់ខ្លួនទៅឲ្យក្រុមហ៊ុន Viettel (Metfone)។
ការសម្រេចចិត្តបិទអាជីវកម្មរបស់ក្រុមហ៊ុន Beeline ធ្វើឲ្យមានការភ្ញាក់ផ្អើលជាខ្លាំង និងនាំឲ្យមជ្ឈដ្ឋាននានាមានការចាប់អារម្មណ៍។ មុនពេលដែល Beeline សម្រេចចិត្តបិទទ្វារ ប្រិយមិត្តមួយចំនួនអាចចង់ដឹងពីដំណើរដើមទងរបស់ក្រុមហ៊ុន Beeline ក្នុងការចាប់ផ្ដើមប្រតិបត្តិការអាជីវកម្មនៅក្នុងប្រទេសកម្ពុជា ក៏ដូចជារឿងរ៉ាវនានាមុនពេលក្រុមហ៊ុននេះឈានដល់ការក្ស័យធន។
ក្រុមហ៊ុន Sotelco (Beeline) បានបើកដំណើរការអាជីវកម្មនៅប្រទេសកម្ពុជាក្នុងខែឧសភា ឆ្នាំ២០០៩ ស្ថិតនៅក្រោមអាណាព្យាបាលរបស់ក្រុមហ៊ុនមេ Vimple Com ដែលមានមូលដ្ឋាននៅប្រទេសហុល្លង់ បន្ទាប់ពីទទួលបានអាជ្ញាប័ណ្ណកាលពីខែ កក្កដា ២០០៨ ដោយប្រើប្រាស់ឈ្មោះក្រុមហ៊ុន Sotelco និងយីហោ Beeline។
ការចាប់ដំណើរការអាជីវកម្មដំបូង ក្រុមហ៊ុនបានសម្រេចជោគជ័យដោយបានក្លាយជាក្រុមហ៊ុនឈានមុខគេមួយ ក្នុងការផ្តល់សេវាទូរសព្ទលំដាប់ខ្ពស់ដល់អតិថិជន។ យ៉ាងណាស្ថានភាពអាជីវកម្មរបស់ក្រុមហ៊ុនចាប់ផ្ដើមវិវត្តទៅរកស្ថានភាពមិនសូវល្អនៅនៅឆ្នាំបន្តបន្ទាប់។
កាលពីឆ្នាំ២០១២ ក្រុមហ៊ុនប៊ីឡាញ (Beeline) បានប្រកាសឲ្យដឹងនៅក្នុងរបាយការណ៍ហិរញ្ញវត្ថុប្រចាំត្រីមាសទី៣ របស់ខ្លួន ដែលបានចុះផ្សានៅលើបណ្ដាញសារព័ត៌មាន Thekhmerdailyថាចំនួនអតិថិជនប្រើប្រាស់សេវាទូរសព្ទរបស់ខ្លួនបានធ្លាក់ចុះអស់ជាង ១០០.០០០ នាក់នៅក្នុងត្រីមាសទីពីរហើយប្រាក់ចំណូលជាមធ្យមរបស់ខ្លួនបានធ្លាក់ចុះមកនៅកម្រិតទាបបំផុតមិនធ្លាប់មានក្នុងរយៈពេលជាងមួយឆ្នាំកន្លងមកនេះ។
បើយោងតាមតួលេខពីក្រុមហ៊ុន បានបង្ហាញថាចំនួនអ្នកប្រើប្រាស់សេវាទូរសព្ទនៅឯក្រុមហ៊ុនបម្រើសេវាទូរសព្ទរបស់ខ្លួនក្នុងប្រទេសកម្ពុជា បានធ្លាក់ចុះអស់ចំនួន ១០៦.០០០ នាក់ពោលគឺចុះមកនៅត្រឹមចំនួនជាង ១ លាននាក់នៅចន្លោះពីខែកក្កដាដល់ខែកញ្ញា ឆ្នាំ ២០១២។ ចំណែកការចំណាយជាមធ្យមដោយអតិថិជនម្នាក់ៗរបស់ក្រុមហ៊ុនក៏បានធ្លាក់ចុះពីចំនួន ១,៧ ដុល្លារអាម៉េរិកនៅត្រីមាសទី២មកនៅត្រឹមចំនួន១,៥ដុល្លារអាមេរិក។
ក្នុងរបាយការណ៍របស់ក្រសួងប្រៃសណីយ៍និងទូរគមនាគមន៍គិតត្រឹមដំណាច់ឆ្នាំ ២០១២ ក៏បង្ហាញដែរថា ចំនួនអ្នកប្រើប្រាស់សេវាទូរសព្ទរបស់ Beeline នៅប្រហែលជិត ៦ សែននាក់ឈរនៅចំណាត់ថ្នាក់ទី ៥ ក្នុងចំណោមក្រុមហ៊ុនចំនួន ៨ ដែលប្រតិបត្តិការអាជីវកម្មនៅកម្ពុជា។
ដោយមិនអាចបន្តដំណើរការអាជីវកម្មទៅមុខទៀតបាន ក្នុងឆ្នាំ ២០១៣ ក្រុមហ៊ុន Vimple Com ដែលជាក្រុមហ៊ុនមេរបស់ Beeline ក៏សម្រេចលក់ភាគហ៊ុនខ្លួនទាំងស្រុកដល់ដៃគូក្នុងស្រុក ដើម្បីបន្តគ្រប់គ្រងអាជីវកម្មស្លាកសញ្ញាក្រុមហ៊ុនឲ្យដំណើរការទៅមុខកាន់តែល្អប្រសើរ។ ជាមួយការផ្លាស់ប្តូររចនាសម្ព័ន្ធថ្មីនេះ ក្រុមហ៊ុន ក៏បានខិតខំអភិវឌ្ឍបច្ចេកវិទ្យានិងហេដ្ឋារចនាសម្ព័ន្ធរបស់ខ្លួនឡើងវិញ ជាពិសេសការណែនាំនៅបច្ចេកវិទ្យា 4G ដើម្បីឈានមុខលើដៃគូប្រកួតប្រជែង។ ទោះបីជាមានការប្រឹងប្រែងយ៉ាងខ្លាំងក្លា អន្តរកាលរបស់ក្រុមហ៊ុនក៏បានបញ្ចប់នៅខែមីនានេះ ដោយក្រុមហ៊ុនបានប្រកាសពីការបញ្ចប់អាជីវកម្មរបស់ខ្លួននៅកម្ពុជា ដោយបានសម្រេចលក់ទ្រព្យសម្បត្តិនិងអាជ្ញាសេវាទូរសព្ទទៅឲ្យដៃគូ បន្ទាប់ពីមិនអាចបន្តដំណើរការទៅមុខទៀតបាន។
អត្ថបទ៖ ប៊ុណ្ណារ៉ា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
