មិនគួរឲ្យជឿ មាស រចនា អង្គុយមើលទូរទស្សន៍សុខៗ គេទូរសព្ទហៅទៅធ្វើតារាចម្រៀងអាជីព

2015-03-27 14:08:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ធ្លាក់ពី The Voice Cambodia មាស រចនា មកពីខេត្តកំពង់ចាម ប្រាប់ថាលោកអស់សង្ឃឹមទៅហើយចំពោះអាជីពចម្រៀងដែលលោកស្រឡាញ់។ តែដឹងអី អង្គុយមើលទូរទស្សន៍សុខៗ ស្រាប់តែខាងហង្សមាសទូរសព្ទមកហៅ។

រចនា មិនចាំច្បាស់ទេថា ត្រូវនឹងថ្ងៃអ្វីដែលខាងផលិតកម្មរស្មីហង្សមាសទូរសព្ទមក ប៉ុន្តែគ្រាន់តែចាំថា បន្ទាប់ពីចប់កម្មវិធី The Voice Cambodia តែបន្តិចប៉ុណ្ណោះ។ "ខ្ញុំនឹកស្មានមិនដល់ទេបង ព្រោះយើងធ្លាក់ពីកម្មវិធីហើយ តែថ្ងៃនោះ បន្ទាប់ពីហូបបាយហើយ អង្គុយមើលទូរទស្សន៍អីជាមួយគ្រួសារធម្មតាហ្នឹង ស្រាប់តែខាងហង្សមាសគេទូរសព្ទមក តែគេអត់ប្រាប់អីវែងឆ្ងាយទេ គ្រាន់តែថាស្អែកឲ្យឡើងទៅភ្នំពេញជួបគេប៉ុណ្ណឹង!”។

មាស រចនា ចូលរួមលើកដំបូងថតកម្មវិធីអបអរបុណ្យចូលឆ្នាំខ្មែរនៅ CTN ថ្មីៗនេះ

បន្ទាប់ទទួលបានទូរសព្ទប៉ុណ្ណឹង ស្អែកឡើងតារាចម្រៀងវ័យ ២៥ឆ្នាំរូបនេះ ក៏ឡើងមកភ្នំពេញ។ រចនា ប្រាប់ថា មានអារម្មណ៍ធម្មតា លុះមកដល់ភ្នំពេញទៅជួបភាគីខាងផលិតកម្មរស្មីហង្សមាស គេឲ្យស៊ីញ៉េកុងត្រាតែម្ដង។ "ទៅដល់គេប្រាប់ថា ឥឡូវគេយកយើងធ្វើជាតារាចម្រៀងក្នុងផលិតកម្មគេហើយ យល់យ៉ាងម៉េចដែរ ហើយគេឲ្យមើលកុងត្រា...អត់មានគិតអីយូរទេ ខ្ញុំស៊ីញ៉េពេលហ្នុងភ្លាមតែម្ដង អ្ហើយសប្បាយចិត្តដល់ហើយបងអើយ(សើច)!"។

និយាយពីសិល្បៈចម្រៀង រចនា ប្រាប់ថា លោកស្រឡាញ់ខ្លាំងណាស់ តាំងតែពីធំពេញវ័យមក។ ដោយសារតែបែបនេះ រចនា ក៏បានដាក់ពាក្យចូលរួមប្រកួតក្នុងកម្មវិធី The Voice Cambodia កាលពីពាក់កណ្ដាលឆ្នាំមុន ដែលពេលនោះ លោកក៏គ្មានសង្ឃឹមដែរ ព្រោះតែមានបេក្ខជនច្រើនដល់ទៅខ្ទង់ពាន់នាក់ឯណោះ។

ជាលទ្ធផល អ្នកស្រុកកំពង់ចាមរូបនេះ បានឆ្លងផុតវគ្គ Pre Audition, Live Show តែមកដល់វគ្គ The Battle រចនា បានធ្លាក់ចេញដោយចាញ់ដៃមិត្តភ័ក្ដិខ្លួនឯង សុខ ម៉ារិន។ "និយាយទៅអស់សង្ឃឹមអាលីង...គិតថាខ្លួនឯងបានតែប៉ុណ្ណឹងទេព្រោះធ្លាក់ទៅហើយ...ដឹងអីបានមកជាអីចឹងវិញ សប្បាយចិត្តណាស់បង ម្យ៉ាងចំពេលខ្ញុំទើបរៀនចប់ផ្នែកធនាគារអត់ទាន់មានការងារអីធ្វើទៀត និយាយទៅនឹកមិនដល់ទេ"។ មាស រចនា បន្ថែម។

មាស រចនា មិនមែនជាបេក្ខជនធ្លាក់ពី The Voice Cambodia តែម្នាក់ទេ ដែលត្រូវបានផលិតកម្មរស្មីហង្សមាសទាញយកមកធ្វើជាតារាចម្រៀងអាជីពរបស់គេ គឺនៅមានបេក្ខជន ១៤រូបផ្សេងទៀត។ ដោយហង្សមាស បានបង្កើតផលិតកម្មថ្មីមួយទៀតឈ្មោះ We Productionសម្រាប់ពួកទាំង១៥នាក់។ ពួកគេទាំងនោះមាន មាននរណាខ្លះ សូមចុចទីនេះ

តាមលោក អ៊ិន ទីតូ បានប្រាប់ថា បទចម្រៀងរបស់ រចនា ក៏ដូចជាបេក្ខជន ១៤នាក់ផ្សេងទៀតនឹងចេញលក់លើទីផ្សារក្នុងពេលឆាប់ៗនេះ ខាងក្រោម គឺជាវីដេអូដែល មាស រចនា ធ្លាក់ចេញពី The Voice Cambodia។

តោះ...ទស្សនាទាំងអស់គ្នា