ពូទីន៖ រុស្ស៊ីនឹងប្រឹងប្រែងដើម្បីឯករាជ្យប៉ាឡេស្ទីន

2015-03-30 23:32:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតី វ៉្លាឌីមៀរ ពូទីន បាននិយាយថា រុស្ស៊ីនឹងប្រឹងប្រែងដើម្បីឯករាជ្យពេញលេញរបស់រដ្ឋប៉ាឡេស្ទីន និងប្រកាសឲ្យមានការដោះស្រាយបញ្ហាមជ្ឈិមបូព៌ាដោយសន្តិវិធី។ ការប្រកាសនេះ ចំពេលដែលប្រទេសរុស្ស៊ីកំពុងមានវិបត្តិជាមួយអ៊ុយក្រែននៅឡើយ។

ប្រធានាធិបតីរុស្ស៊ី វ្ល៉ាឌីមៀ ពូទីន

បើទោះបីមានការរិះគន់ជាអន្តរជាតិពាក់ព័ន្ធនឹងគោលជំហរលើវិបត្តិអ៊ុយក្រែន ក៏លោក ពូទីន បានប្រកាសក្ដែងៗថា រុស្ស៊ីមានសមត្ថភាពក្នុងការនាំសន្តិភាព ព្រមទាំងបញ្ចប់សង្គ្រាម។ បង្ហាញនៅក្នុងកិច្ចប្រជុំសម្ព័ន្ធអារ៉ាប់នាប្រទេសអេហ្ស៊ីប កាលពីថ្ងៃសៅរ៍ លោក ពូទីន បាននិយាយប្រឆាំងទៅនឹងអន្តរាគមន៍របស់បរទេសជុំវិញជម្លោះផ្ទៃក្នុងរបស់ខ្លួន និងបញ្ជាក់ពីតួនាទីរបស់រុស្ស៊ីក្នុងទំនាក់ទំនងការទូត។

លោកបានប្រាប់អង្គប្រជុំទាំងមូលនៅចុងសប្ដាហ៍នេះថា "ប៉ាឡេស្ទីនអាចមានសិទ្ធិក្នុងការបង្កើតរដ្ឋឯករាជ្យ និងស្ថិតស្ថេរជាមួយរដ្ឋធានីនៅទីក្រុងជេរូសាឡឹមខាងកើត"។ ប្រធានាធិបតីដ៏មានឥទ្ធិពលរូបនេះ បានបន្តទៀតថា "រុស្ស៊ីនឹងជួយគាំទ្រដើម្បីឲ្យប៉ាឡេស្ទីនសម្រេចគោលបំណង ទាំងតាមបណ្ដាញទ្វេភាគីក្ដី ទាំងតាមបណ្ដាញពហុភាគីក្ដី"។

កាលពីខែមុន ភាគីទាំងបួនរួមមាន សហរដ្ឋអាមេរិក សហគមន៍អឺរ៉ុប អង្គការសហប្រជាជាតិ និងរុស្ស៊ី បានចេញសេចក្ដីថ្លែងការណ៍រួមគ្នាបន្ទាប់ពីកិច្ចប្រជុំនៅអាល្លឺម៉ង់ ដើម្បីបង្ហាញពីការខកចិត្តរបស់ពួកគេ បន្ទាប់ពីបរាជ័យក្នុងកិច្ចចរចានៅអ៊ីស្រាអែល។ បរាជ័យនោះ កើតឡើងក្រោយភាគីទាំងពីរដែលមានអ៊ីស្រាអែល និងប៉ាឡេស្ទីនចាកចេញពីតុចរចា៕

ចុចអាន៖ គីម ជុងអ៊ុន ធ្វើដំណើរទស្សនកិច្ចបរទេសលើកដំបូងទៅរុស្ស៊ី

ប្រែសម្រួល៖ គង់ វិសាល ប្រភព៖ independent