លោកជំទាវអូបាម៉ា មកកម្ពុជា អស់ថ្លៃសណ្ឋាគារជាង ២៤ម៉ឺនដុល្លារ

2015-03-31 17:28:56
ចំនួនមតិ 0 | ចំនួនចែករំលែក 0

ចន្លោះមិនឃើញ

អំឡុងពេលដំណើរទស្សនកិច្ចវប្បធម៌ជាផ្លូវការរយៈពេល ៣ថ្ងៃ ២យប់ របស់លោកជំទាវទីមួយសហរដ្ឋអាមេរិក មីស៊្ហែល អូបាម៉ា មកកម្ពុជា ថ្លៃសណ្ឋាគារត្រូវចំណាយអស់ ២៤២ ៥០០ដុល្លារ។ នេះបើតាមកិច្ចសន្យារដ្ឋាភិបាលដែលបង្ហាញកាលពីថ្ងៃសុក្រ និងចុះផ្សាយលើសារព័ត៌មាន Washington Free Beacon របស់សហរដ្ឋអាមេរិកកាលពីថ្ងៃចន្ទម្សិលមិញ។

លោកជំទាវអូបាម៉ា និងគណៈប្រតិភូជាន់ខ្ពស់របស់សហរដ្ឋអាមេរិក បានស្នាក់នៅសណ្ឋាគារ Sofitel Angkor Phokeethra ដែលមានទីតាំងក្នុងខេត្តសៀមរាប។ ដំណើរទស្សនកិច្ចនេះ ត្រូវការបន្ទប់គេងគ្រែមួយដល់ទៅ៨៥ បន្ទប់គេងធំ៥ បន្ទប់ការិយាល័យ៥ និងសាលសន្និសីទមួយ សម្រាប់រយៈពេល ១៤ថ្ងៃ ខណៈលោកជំទាវអូបាម៉ា ស្នាក់នៅត្រឹម ២ថ្ងៃប៉ុណ្ណោះ។

ក្រៅពីចំណាយខាងលើ ឯកសារបានបង្ហាញពីចំណាយផ្សេងទៀតសម្រាប់សណ្ឋាគារមួយចំនួននៅក្នុងខេត្តសៀមរាប ដែលមានដូចជា Raffles Grand Hotel d’Angkor (៩០០០ដុល្លារ) និងសណ្ឋាគារ Victoria Angkor Resort and Spa។ ចំណែកកិច្ចសន្យាទីបី មានតម្លៃ ៣២៣០ដុល្លារ ធ្វើឡើងជាមួយសណ្ឋាគារ Park Hyatt សម្រាប់ប្រារព្ធព្រឹត្តិការណ៍កម្មវិធី Peace Corps។

អំឡុងពីថ្ងៃទី២០ ដល់ថ្ងៃទី២២ ខែមីនា ឆ្នាំ២០១៥ នេះ លោកជំទាវទីមួយ មីស៊្ហែល អូបាម៉ា បានធ្វើដំណើរទស្សនកិច្ចវប្បធម៌ជាផ្លូវការលើកដំបូងរបស់ខ្លួនមកកាន់កម្ពុជា។ ដំណើរទស្សនកិច្ចនេះ ផ្ដោតទៅលើការផ្សព្វផ្សាយគំនិតផ្ដួចផ្ដើមអប់រំស្ត្រីជាអន្តរជាតិថ្មីមួយដែលមានឈ្មោះថា “Let Girls Learn”។ គំនិតផ្ដួចផ្ដើមនេះ រៀបចំឡើងដោយលោកជំទាវ មីស៊្ហែល អូបាម៉ា និងប្រធានាធិបតីសហរដ្ឋអាមេរិក បារ៉ាក់ អូបាម៉ា ស្របពេលការចាប់ផ្ដើមយុទ្ធនាការផ្ដល់សិទ្ធិអំណាចដល់ស្ត្រី ដែលបានធ្វើឡើងនៅជុំវិញពិភពលោក ក្រោមការជួយគាំទ្រពីស្ថាប័នអន្តរជាតិជាច្រើន៕

ចុចអាន៖ ព័ត៌មានទាក់ទងនឹងដំណើរទស្សនកិច្ចលោកជំទាវ មីស៊្ហែល អូបាម៉ា មកកម្ពុជា

ប្រែសម្រួល៖ គង់ វិសាល ប្រភព៖ freebeacon