តារាចម្រៀងល្បីៗរួមគ្នាបង្កើតវិបសាយស្តាប់ចម្រៀងដើម្បីរកចំណូលខ្លួនឯង

2015-04-01 17:28:40
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងល្បីៗលំដាប់ពិភពលោកជាច្រើនរូបបានរួមគ្នា បង្កើតវិបសាយផ្ដល់សេវាកម្មស្ដាប់ចម្រៀងធំមួយ គឺវិបសាយ Tidal.com ដែលជាវិបសាយដំបូងដែលបង្កើតដោយសិល្បករផ្ទាល់។

នៅក្នុងព្រឹត្តិការណ៍សម្ពោធវិបសាយថ្មីនេះកាលពីថ្ងៃចន្ទ នៅមជ្ឈមណ្ឌល Skylight ទីក្រុង Manhattanតារាចម្រៀងល្បីៗដូចជា Madonna, Beyonce, Kanye West, Rihanna, Usher, Nicki Minajនិងតារាល្បីៗ ១០រូបទៀត បានប្រកាសថាពួកគេគឺជាម្ចាស់របស់វិបសាយនេះទាំងអស់គ្នា។

វិបសាយ Tidal បានបង្កើតឡើងដំបូងកាលពីខែតុលា ឆ្នាំ២០១៤ ប៉ុន្តែតារាចម្រៀង Jay Z បានទិញយកនាពេលថ្មីៗនេះ ដែលគេរំពឹងថាវិបសាយថ្មីនេះនឹងអាចប្រកួតប្រជែងជាមួយវិបសាយស្ដាប់ចម្រៀងធំៗផ្សេងទៀត ដូចជា Spotify, Deezer និង Google Play។ ប៉ុន្តែបច្ចុប្បន្ន Tidal មានបទចម្រៀង ២៥លានបទ ខណៈវិបសាយដទៃមានបទចម្រៀងច្រើនជាង ៣០លានបទ។

សម្រាប់តម្លៃសេវាកម្មក្នុងមួយខែ អ្នកលេងអ៊ីនធឺណិតត្រូវចំណាយ ៩,៩៩ដុល្លារអាមេរិក សម្រាប់ការស្ដាប់ធម្មតា និង១៩,៩៩ដុល្លារសម្រាប់កញ្ចប់ពិសេស ដែលមានបទចម្រៀងច្បាស់ល្អ។

តារាចម្រៀង Alicia Keys បាននិយាយតំណាងឲ្យសិល្បករទាំងអស់ថា "ពួកយើងមកជួបជុំគ្នាថ្ងៃនេះ នៅថ្ងៃទី៣០ ខែមីនា ឆ្នាំ២០១៥ ដោយសង្ឃឹមថានឹងអាចបង្កើតប្រវត្តិសាស្ត្រថ្មីមួយក្នុងវិស័យសិល្បៈចម្រៀង។ គោលបំណងពួកយើងគឺដើម្បីរក្សាតម្លៃបទចម្រៀងក្នុងជីវិតរបស់ពួកយើង"។

នេះគឺជាកំណែប្រែថ្មីមួយក្នុងផលិតកម្មចម្រៀងដែលកន្លងមកសិល្បករភាគច្រើនអាចចូលរួមតិចតួចប៉ុណ្ណោះក្នុងការគ្រប់គ្រង និងចែកចាយស្នាដៃរបស់ពួកគេ។

តារាចម្រៀង Jay Z បានរៀបចំយុទ្ធសាស្ត្រថ្មីៗ រួមទាំងការតម្រូវឲ្យផលិតកម្មរបស់តារាចម្រៀងនីមួយៗ ផ្ដល់បទចម្រៀងថ្មីឲ្យវិបសាយ Tidal មួយសប្ដាហ៍មុនពេលចេញលក់។ ស្វាមីរបស់តារាចម្រៀង Beyonce រូបនេះ បានប្រាប់ទស្សនាវដ្ដី Billboard ថា "ពួកយើងមិនពេញចិត្តចំពោះការធ្វើទីផ្សារលើបទចម្រៀងនាពេលបច្ចុប្បន្ននេះទេ ហើយយើងគិតថាយើងអាចចូលរួមផ្ទាល់ដើម្បីធ្វើឲ្យការងារនេះកាន់តែមានតម្លាភាព។ វាអាចកាត់បន្ថយចំណូលអ្នកមិនសូវពាក់ព័ន្ធ ប៉ុន្តែវានឹងបង្កើនចំណូលសម្រាប់ពួកយើងជាអ្នកសិល្បៈ ដូច្នេះវាពិតជាអស្ចារ្យ" ៕