ទ្រី សក្កដា អ្នកនិពន្ធ Original Song ៖ ដោយសារការមើលងាយទើបខ្ញុំមានថ្ងៃនេះ

2015-04-02 17:08:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ទ្រី សក្កដា អ្នកនិពន្ធនិយមធ្វើបទចម្រៀង Original Song ដែលទើបចាប់អាជីពជាអ្នកនិពន្ធចម្រៀងអាជីពជាមួយផលិតកម្ម Mega Studio ថ្មីៗនេះ បានបញ្ជាក់ថា អាជីពមួយនេះកើតឡើង ក្រោយទទួលរងការរិះគន់ពីមនុស្សមួយចំនួន។

ការរិះគន់ទាំងនោះ កើតឡើងក្រោយលោកបាននិពន្ធបទចម្រៀងមួយបទមានចំណងជើងថា "ប៉ាម៉ាក់ខ្ញុំជាមនុស្សអស្ចារ្យជាងគេ"។ សក្កដា ថ្លែងថា "បន្ទាប់ពីចេញបទនេះ ស្រាប់តែមានអ្នករិះគន់ថា ខ្ញុំថា ជាអ្នកស្រែមកពីតាមខេត្តសោះ មកធ្វើជាអ្នកនិពន្ធអី...តែខ្ញុំអត់ខ្វល់ រឹតតែប្រឹង ទើបមានថ្ងៃនេះ!"។

អ្នកនិពន្ធវ័យក្មេងរូបនេះ មិនបានបញ្ជាក់ថា អ្នកណាជាអ្នករិះគន់ទេ តែថា ការរិះគន់មិនសំដៅលើទឹកដីនិពន្ធរបស់លោកទេ តែដូចជាដោយសារច្រណែនច្រើនជាង។ ដូច្នេះហើយ ទើបលោក មិនខ្វល់ និងមិនអាក់អន់ស្រពន់ចិត្តអ្វីឡើយ គឺមានតែខំប្រឹងជំនះឆ្ពោះមករកភាពជោគជ័យនៅលើវិថីសិល្បៈបន្តទៀត។ មកទល់នឹងពេលបច្ចុប្បន្ននេះ លោកផលិតបានប្រហែលជាង១០បទទៀត សុទ្ធតែជាបទOriginal Song មានបង្ហោះលើបណ្ដាញសង្គម ឬ Youtube។

បទទាំងនោះ មានដូចជា ”Forever Alone” "ឈ្លោះគ្នាដើម្បីអ្វី” "ទិញផ្កាជូនខ្លួនឯង” និងបទ "សុចិបុលិ" ទើបចេញថ្មីៗសម្ដែងជាមួយ PeyPey Dy ដោយទទួលបានការគាំទ្រជាច្រើនពីសំណាក់មិត្តៗយុវវ័យនៅក្នុងបណ្ដាញសង្គមហ្វ៊េសប៊ុក។ ទ្រី សក្កដា ថ្លែងថា លោកពិតជារីករាយណាស់ ដែលបទចម្រៀងរបស់លោកមានការទទួលស្គាល់ និងមានអ្នកចូលមើលច្រើន។

ថ្មីៗនេះ លោក សក្កដា ទើបត្រូវបានផលិតកម្មក្នុងស្រុកមួយគឺ Mega Studioហៅលោកទៅធ្វើជាអ្នកនិពន្ធថែមទៀតផង។ អ្នកនិពន្ធមកពីខេត្តព្រះវិហាររូបនេះ ថ្លែងថា លោកសូមអរគុណនូវពាក្យរិះគន់និងមើលងាយពីមុនៗមក ព្រោះនោះជាហេតុដែលធ្វើឲ្យលោកមានថ្ងៃនេះ។ ម្ចាស់បទ "ទិញផ្កាជូនខ្លួនឯង" រូបនេះ បញ្ជាក់ថា បទចម្រៀងរបស់លោកដែលនិពន្ធពីមុនៗមកនឹងដាក់បញ្ចូលក្នុងផលិតកម្ម Mega Studioរួមទាំងបទនិពន្ធថ្មីមួយចំនួនផង នឹងចេញលើទីផ្សារឆាប់ៗ៕