បុណ្យភូមិថ្ងៃដំបូង មានអ្នកចូលរួមកុះករ

2015-04-04 00:42:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាគច្រើនជាយុវវ័យ បានទៅចូលរួមក្នុងកម្មវិធីបុណ្យភូមិលើកទី២យ៉ាងកុះករនៅថ្ងៃនេះ ដែលបានរៀបចំឡើងនៅបរិវេណវត្តព្រែកថ្លឹង ជាយរាជធានីភ្នំពេញ ក្រោមកម្ដៅថ្ងៃហួតហែង។

យុវតី រចនា និស្សិតសាកលវិទ្យាល័យវ៉េស្ទើន ប្រាប់ Sabay ថា មកបុណ្យភូមិតាមរយៈរថយន្តក្រុងរៀបចំជាស្រេច។ រចនា និយាយ៖"អឺ...ចង់ដឹងថា កម្មវិធីគេរៀបចំយ៉ាងម៉េច ដល់ពេលមកដល់សប្បាយ បានរាំបានអីទៀតផង"។

ស្រដៀងគ្នានេះដែរ ស្រីលក្ខណ៍ និយាយថា៖"មានមនុស្សមកច្រើនហើយ តែចង់ឱ្យមានដាក់លក់ផលិតផលបែបបុរាណខ្មែរឱ្យបានច្រើនជាងនេះ ព្រោះមើលទៅតិចណាស់"។ យ៉ាងណា យុវតីរូបនេះបង្ហាញជំហរ និងកោតសរសើរចំពោះគំនិតផ្ដួចផ្ដើមរៀបចំឡើង។

ងាកមក វណ្ឌី ពិសិដ្ឋ ជាតួឯករឿង "គ្រាប់ពេជ្រ" និយាយថា៖ សប្បាយតើ! មើលទៅប្លែក មានការតាំងពិព័រណ៍ផលិតផល និងល្បែងកម្សាន្តនានាគួរឱ្យចាប់អារម្មណ៍ នេះជាលើកទី១ហើយសម្រាប់ខ្ញុំ"។

យឹង យ៉ន និយាយថា បានសហការជាមួយសហការីបាននាំធ្នូខ្មែរទើបនឹងរកឃើញជាង១ឆ្នាំមកនេះមកបង្ហាញប្រជាពលរដ្ឋខ្មែរ។ ជយលាភីលេខ២ Hear my Song និយាយថា៖"មានមនុស្សច្រើនតើ ទៅសាកបាញ់ធ្នូ ដែលពូកគេមិនដែលឃើញពីមុនមក"។

ជាមួយគ្នានោះលោក Aplus ពិធីករវិទ្យុ ABC កម្ពុជា និងជាអ្នកចូលរួមរៀបចំកម្មវិធីនេះផងនោះនិយាយថា ទម្រាំកើតជារូបរាងនៃកម្មវិធីបុណ្យភូមិរយៈពេល៣ថ្ងៃ ត្រូវចំណាយពេល៣ខែឯណោះក្នុងបំណងធ្វើឱ្យប្រសើរជាងឆ្នាំមុន។ លោកថា៖" ខ្ញុំជឿជាក់ថា ឆ្នាំនេះនឹងមានមនុស្សចូលរួមកាន់តែច្រើនជាងឆ្នាំមុនមិនខាន ព្រោះក្រុមការងារទាំងអស់ប្រឹងប្រែងយ៉ាងខ្លាំង"៕

អានអត្ថបទ៖ សាមញ្ញៗ តែសង្ហាគួរសមពី ដួង ដាយ៉ា

អានអត្ថបទ៖ អ្នកគ្រប់គ្រងតារាដែលមានប្រវត្តិជាអ្នករត់តុ ដកខ្លួនពី Bigman