អ្នកដឹកនាំរឿងល្បីឈ្មោះ ធ្វើបុណ្យចម្រើនព្រះជន្ម វេរបច្ច័យទំាងអស់ជួយពេទ្យគន្ធបុប្ផា
- 2015-04-04 17:11:37
- ចំនួនមតិ 0 | ចំនួនចែករំលែក 0
អ្នកដឹកនាំរឿងល្បីឈ្មោះ ធ្វើបុណ្យចម្រើនព្រះជន្ម វេរបច្ច័យទំាងអស់ជួយពេទ្យគន្ធបុប្ផា
ចន្លោះមិនឃើញ
អ្នកនិពន្ធនិងដឹកនាំរឿងដ៏មានកេរ្តិ៍ឈ្មោះនៃប្រទេសកម្ពុជា អ្នកស្រី ពាន់ ភួងបុប្ផា កំពុងត្រៀមខ្លួនធ្វើបុណ្យចម្រើនព្រះជន្ម នៅចុងខែនេះ ដោយប្រកាសជូនបច្ច័យទំាងអស់ពីកម្មពិធីនេះទៅជួយដល់មន្ទីរពេទ្យគន្ធបុប្ផា។
ប្រាប់ Sabay នៅល្ងាចមិ្សលមិញ ម្ចាស់ភាពយន្ត "កុមារីម្ភៃប្រាំឆ្នាំ" បញ្ជាក់ថា បុត្រាបុត្រីដែលមានកតញ្ញុតាធម៌ជាអ្នកផ្តួចផ្តើមគំនិតរៀបចំបុណ្យចម្រើនព្រះជន្មជូនលោកស្រី ដែលជាមាតា ដូច្នេះហើយលោកស្រីក៏នឹកឃើញឆ្លៀតឱកាសមូលមិត្តជិតឆ្ងាយ ដែលរួមមានសិល្បករ មិត្តរួមអាជីព ពាណិជ្ជករ និងមន្ត្រី មកចូលរួមនោះ ក៏នឹងបរិច្ចាកបច្ច័យទំាងអស់ដល់មន្ទីរពេទ្យ ដែលកំពុងមានវិបត្តហិរញ្ញវត្ថុ។
លោកស្រីបន្តទៀតថា៖ "ខ្ញុំមិនចង់អោយមានការផ្សព្វផ្សាយអ្វីទេ ព្រោះនេះពុំមែនជាលើកដំបូងដែលសិល្បករយើងបាននាំគ្នាធ្វើអំពើសប្បុរសធម៌ និងសកម្មភាពសង្គមនោះដែរ ប៉ុន្តែសម្រាប់ Sabayដែលមានអ្នកមើលទំាងក្នុងនិងក្រៅប្រទេស ខ្ញុំជឿថា នេះអាចជាសារមួយដល់អ្នកមានលទ្ធភាពផ្សេងៗទៀតដែរ! ខ្ញុំចង់អោយយើងរកបានអ្នកចូលរួមកាន់តែច្រើនតាមគ្រប់រូបភាពដើម្បីជួយដល់មន្ទីរពេទ្យនេះ!”
លោកស្រី ពាន់ ភួងបុប្ផា ជយលាភីអ្នកដឹកនាំរឿងឆ្នើមនៃកម្មវិធីអាណាចក្រតារា គឺជាអ្នកនិពន្ធដែលមានមនសិកាសង្គមតាមរយៈស្នាដៃមានតម្លៃជាច្រើន។ ភាពយន្តរឿង "មមាចប្រលែងភ្លើង" របស់អ្នកស្រីកាលពីឆ្នាំ២០០២ បានធ្វើអោយមានការផ្លាស់ប្ដូរជាវិជ្ជមានដល់ផ្នត់គំនិតយុវវ័យខ្មែរ ដែលជាទស្សនិកជន។
"ខ្ញុំយល់ថាមនុស្សយើងក្រៅពីស្វែងរកកម្រៃ កតព្វកិច្ចដ៏សំខាន់មួយទៀតគឺធ្វើយ៉ាងណាទទួលខុសត្រូវអោយបានខ្ពស់ចំពោះសង្គម និងសហគមន៍ដែលយើងរស់នៅ! ខ្ញុំចង់ធ្វើអ្វីអោយច្រើនជាងនេះទៅទៀតប្រសិនបើមានឱកាស និងមានការគាំទ្រ!"។ លោកស្រីបានបន្ថែមដូច្នេះ។
លោកស្រី ពាន់ ភួងបុប្ផា ធ្លាប់ផលិតភាពយន្តដែលបង្កប់អត្ថន័យអប់រំជាច្រើនទៀត ហើយត្រូវបានទទួលការពេញចិត្តពីមជ្ឈដ្ឋានទូទៅមានដូចជា "គុណគ្រូបង្រៀន" "ទឹកចិត្តឳពុក" "កូនប្រសារស្រី" និងចុងក្រោយគឺរឿង "លោកម្ចាស់គ្រញូង" ដែលផ្តល់សារអោយអ្នកទស្សនាចេះថែរក្សាស្រលាញ់ធនធានធម្មជាតិ។
ភាពយន្តរឿង "ទឹកចិត្តម្ដាយ" របស់អ្នកស្រីក្នុងឆ្នាំ២០០៤បានទទួលពានរង្វាន់ប្រាក់ ហើយពាក្យស្លោក "ធ្វើបុណ្យទាន់ខែភ្លឺ" នៅក្នុង Trailer នោះត្រូវបានយុវវ័យយល់ន័យ ហើយលើកយកមកប្រើជារឿយៗ។
លោកស្រីថ្លែងដែរថា៖ "ក្រៅពីបរិច្ចាគប្រាក់លើកនេះ ខ្ញុំមានគម្រោងសំខាន់មួយទៀតគឺផលិតសារជាថ្មី នូវភាពយន្តដែលមានសារបំផុសកតញ្ញុតាធម៌ ហើយអាចនឹងដាក់ចំណងជើងថា ទឹកចិត្តម្តាយឆ្នាំ២០១៦"៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
